ខេត្តព្រះសីហនុ ៖ មន្ត្រីសាខាកាំកុងត្រូលខេត្ត បានចុះត្រួតពិនិត្យគុណភាពផលិតផលម្ហូបអាហារវេចខ្ចប់រួចនៅតាមអគារលក់ទំនិញក្នុងក្រុងព្រះសីហនុ កាលពីព្រឹកថ្ងៃទី២០ មិថុនា និងបានរកឃើញប្រភេទនំកញ្ចប់ ស្ករគ្រាប់ ម្សៅស្ករ និងចាហួយសម្រាប់ក្មេង ដែលអាជីវករកំពុងដាក់លក់មិនមានដាក់ស្លាកសញ្ញា និងបញ្ជាក់កាលបរិច្ឆេទប្រើប្រាស់ ។ កត្តាទាំងនេះអាចបង្កជាហានិភ័យផ្នែកសុខភាពដល់កុមារ ពិសេស កុមារា កុមារី ដែលកំពុងសិក្សាក្នុងសាលារៀន ប្រសិនបើម្ហូបអាហារមិនធានាគុណភាពទាំងនោះត្រូវដាក់លក់ ។
មន្ត្រីសាខាកាំកុងត្រូលខេត្តបានអះអាងថា នំកញ្ចប់ ម្សៅស្ករ ស្ករគ្រាប់ និងចាហួយដែលមានភាពមិនប្រក្រតីនេះ គឺជាផលិតផលនាំចូលពីប្រទេសក្រៅ ហើយក្រោយពីរកឃើញនៅតាមកន្លែងលក់ដូរមួយចំនួន ក៏បានធ្វើការដកហូត ដើម្បីកម្ទេចចោល ។ ចំពោះបញ្ហានេះ មន្ត្រីសាខាកាំកុងត្រូលខេត្ត ក៏បានអប់រំ និងឱ្យអាជីវករពាក់ព័ន្ធធ្វើកិច្ចសន្យាបញ្ឈប់ការលក់ដូរផលិតផលមិនធានាគុណភាពដូចនេះបន្តទៀត ហើយមន្ត្រីជំនាញនឹងចុះត្រួតពិនិត្យឱ្យបានញឹកញាប់បន្ថែមទៀត ដើម្បីលុបបំបាត់ការដាក់លក់ម្ហូបអាហារមិនល្អ ៕
ចែករំលែកព័តមាននេះ