ខេត្តព្រះសីហនុ ៖ ទីបំផុត ជនដែលបង្ហោះតាមហ្វេសប៊ុកបង្ហាញក្រុមបុរសមានសាច់ដុំធំៗ និងមានរូបសាក់ពេញខ្លួនកាន់ដំបង កាំបិត ដោយផ្សាយថា ជាក្រុមអ្នកលេងជនជាតិចិននៅខេត្តព្រះសីហនុនោះ ត្រូវបានសមត្ថកិច្ចឃាត់ខ្លួនហើយ កាលពីថ្ងៃទី៥ ធ្នូ ។ បុរសរូបនេះ ឈ្មោះ លឹម រ័ត្ន ត្រូវបានសមត្ថកិច្ចថា ការបង្ហោះដោយបំប៉ោងព័ត៌មានបែបនេះ បានធ្វើឱ្យមានការយល់ច្រឡំដល់សាធារណមតិ ដែលការពិតនោះ គឺមិនមាននៅខេត្តព្រះសីហនុនោះទេ ។
១-ឈ្មោះ លឹម រ័ត្ន កាលពីថ្ងៃទី២ ធ្នូ បានសរសេរក្នុងហ្វេសប៊ុកឈ្មោះ គណបក្សយុវជនកម្ពុជាខេត្តព្រះសីហនុថា មើលចរិតបងធំនៃក្រុមជនជាតិចិន នៅបរទេសឱ្យហើយទៅ បងប្អូនប្រជាពលរដ្ឋ ប៉ូលិសខ្សោយៗមិនអាចមកទប់ទល់នឹងក្រុមជនជាតិចិននេះបានឡើយ ដោយពួកក្រុមនេះ មានអ្នកកាងពីក្រោយខ្នងដ៏រឹងមាំ ដូច្នោះបងៗប៉ូលិស សូមទៅជាក្រុមផង ដើម្បីចាត់ការលើពួកទាំងអស់នេះ អ្នកធំស៊ីលុយ កូនប៉ូលិសឬអ្នកតូចតាច បានត្រឹមរងគ្រោះ ឬពេលខ្លះអាចស្លាប់បាត់បង់ជីវិតទៀតផង ។ អាជ្ញាធរត្រូវមានចំណាត់ការជាបន្ទាន់លើក្រុមបង្កពេញក្នុងខេត្តព្រះសីហនុ ។
បានសរសេរផ្សាយទៀតថា ឈប់ទទួលលុយគេទៀតទៅ កុំទុកឱ្យប្រជារាស្ត្រភ័យខ្លាច ស្ទើរមិនអាចរស់នៅក្នុងខេត្តបាន (លឹម រ័ត្ន) ។ អមមកជាមួយនឹងសំណេរខាងលើនេះផងដែរ ឈ្មោះ លឹម រ័ត្ន ក៏បាន
ដាក់រូបថតបងធំចិនមួយក្រុមឈរដោះអាវ ព្រមទាំងមានកាន់ដាវម្នាក់មួយដើមៗផង ។
មុននេះ លោកឧត្តមសេនីយ៍ទោ ជួន ណារិន្ទ ស្នងការនគរបាលខេត្ត បានបង្ហាញដល់បណ្តាញសារព័ត៌មាននិងសារធារណជនឱ្យដឹងថា រូបភាពក្រុមបុរស ដែលមានសាក់រូបពេញខ្លួនជាច្រើននាក់ ខ្លះកាន់កាំបិត ខ្លះកាន់អាវុធផ្សេងៗទៀតប្រៀបដូចជាក្រុមអ្នកលេងគួរឱ្យខ្លាចដែលគេផ្សាយថាគឺជាក្រុមជនជាតិចិនរស់នៅកម្ពុជា ។
លោកបដិសេធថា មិនមែនចិននៅកម្ពុជាទេ តាមពិតក្រុមទាំងនេះ គឺជាជនជាតិវៀតណាម ហើយម្ចាស់គណនីហ្វេសប៊ុកឈ្មោះ GIA DINH VUI TINH ដែលជារឿយៗបានបង្ហោះរូបក្រុមនេះដើម្បីបង្អួតសាក់ ដាក់បណ្តាញសង្គមហ្វេសប៊ុក មិនមែនជាក្រុមអ្នកលេងនោះទេ ។ ប៉ុន្តែជាអកុសលត្រូវគេយករូបនោះមកបង្ហោះថាជាជនជាតិចិននៅខេត្តព្រះសីហនុដែលនេះជាការព្យាយាមបំពុលសង្គមខ្មែរយើង ឱ្យអាប់អួរមិនស្រាកស្រាន្តប៉ុណ្ណោះ ។
លោកឧត្តមសេនីយ៍ស្នងការនគរបាលខេត្តបានអំពាវនាវដល់សារធាណជន មេត្តាយកចិត្តទុកដាក់ពិនិត្យឱ្យបានច្បាស់លាស់ មុននិងវាយតម្តៃទៅលើរូបភាពទាំងនោះ និងសូមឱ្យបងប្អូនជនរួមជាតិមេត្តាមានស្មារតីខ្ពស់ក្នុងការលើកតម្កើងថែរក្សាកិត្តិយស មុខមាត់ និងសេចក្តីថ្លៃថ្នូររបស់ប្រទេសជាតិទាំងមូល ។ បញ្ហាទាក់ទងទៅនឹងជនជាតិចិនពេលនេះកំពុងក្លាយជាការលាបពណ៌ ពីសំណាក់ក្រុមអ្នកមិនសប្បាយចិត្តចំពោះកំណើនយ៉ាងគំហុកនៅកម្ពុជា ដោយពួកគេបានលើកយក តែទង្វើអវិជ្ជមានមួយចំនួនមកបំប៉ោង និងធ្វើការស្តីបន្ទោសទៅដល់រាជរដ្ឋាភិបាលថា បណ្តែតបណ្តោយឱ្យក្រុមជនជាតិចិនប្រព្រឹត្តិនូវទង្វើល្មើសច្បាប់នានា បង្កភាពអនាធិបតេយ្យ ធ្វើឱ្យសន្តិសុខសណ្តាប់ធ្នាប់ និងសង្គមខ្មែរច្របូកច្របល់ ។ ទោះបីជាបែបណាក្តី មតិមួយជ្រុងនោះមិនបានបង្ហាញពីសញ្ញាវិជ្ជមានទាក់ទងនឹងជនជាតិចិននោះទេ ។
អគ្គស្នងការដ្ឋាននគរបាលជាតិដាក់បទបញ្ជាឱ្យរកជនដែលបង្ហោះវីដេអូឃ្លីបចិនកាប់ចាក់គ្នានៅភ្នំពេញ
អ្នកនាំពាក្យអគ្គស្នងការដ្ឋាននគរបាលជាតិ បានបដិសេធចោលទាំងស្រុងនូវវីដេអូឃ្លីបមួយ ដែលបានបង្ហោះចែកចាយគ្នាក្នុងបណ្ដាញសង្គមបង្ហាញពីរូបភាពឃោរឃៅកាប់ចាក់គ្នា ហើយដែលគេអះអាងថាកើតនៅរាជធានីភ្នំពេញ ដោយក្រុមជនជាតិចិន ។អ្នកនាំពាក្យអគ្គស្នងការដ្ឋាននគរបាលជាតិបានបញ្ជាក់ថា «វីដេអូដែលបង្ហោះតាមបណ្តាញសង្គមនេះ មិនមែនជាការពិតដូចមាននៅក្នុងវីដេអូឃ្លីបនេះឡើយ ។ តាមការពិនិត្យរបស់សមត្ថកិច្ចនៃក្រុមជំនាញបានបញ្ជាក់ថា វីដេអូនេះមានការកាត់តរូបភាពក្នុងចេតនាបំពុលបរិយាកាសសង្គម បង្កឲ្យមានការភាន់ច្រឡំ និងបង្កើតឲ្យមានការរើសអើងពូជសាសន៍(ជនជាតិចិន)ក្នុងប្រទេសកម្ពុជា» ។
អ្នកនាំពាក្យអគ្គស្នងការដ្ឋាននគរបាលជាតិ បានសង្កត់ធ្ងន់ថា វីដេអូនោះមិនមែនកើតឡើងក្នុងប្រទេសកម្ពុជាឡើយ ។ ចំណែកសំឡេងដែលបានថតក្នុងសាច់រឿងនោះគឺជាសំឡេងថតបញ្ចូលធ្វើឲ្យមានការយល់ច្រឡំ ក្នុងបំណងបំពុលសង្គមប៉ះពាល់ដល់បរិយាកាសសន្តិសុខ ។ សមត្ថកិច្ចកំពុងតាមប្រមាញ់ហើយលើអ្នកបង្ហោះវីដេអូឃ្លីបនេះហើយព្រមទាំងចាប់ខ្លួនបាននៅថ្ងៃទី៥ ធ្នូ ។ ក្រោយការចាប់ខ្លួន សមត្ថកិច្ចគ្រាន់តែធ្វើការអប់រំហើយក៏បានតម្រូវឱ្យឈ្មោះ លឹម រ័ត្ន ធ្វើការសុំទោសជាសាធារណៈជុំវិញកំហុសបំប៉ោងព័ត៌មានបែបនេះ ដែលយើងថតចម្លងទាំងស្រុងដោយមិនធ្វើអត្ថាធិប្បាយឡើយ ដូចខាងក្រោមនេះ ៕
ចែករំលែកព័តមាននេះ