រាជធានីភ្នំពេញ ៖ បុរសម្នាក់បើករថយន្តលឿនខ្វះការប្រុងប្រយ័ត្នជ្រុលទៅបុករបាំងថ្មពុះចែកទ្រូងផ្លូវពេញទំហឹង បណ្តាលអោយដួលរលំមួយកង់ និងបែកបាក់អស់មួយកង់ ធ្វើឲ្យរងរបួសធ្ងន់ស្ត្រីម្នាក់ ចំណែកបុរសម្នាក់ និងស្ត្រីម្នាក់ទៀតរងរបួសស្រាល រីឯរថយន្តដាច់កង់ម្ខាងរងការខូចខាតយ៉ាងធ្ងន់ធ្ងរ ។
ហេតុការណ៍នេះបង្កឲ្យមានការភ្ញាក់ផ្អើលកាលពីវេលាម៉ាង១០យប់ថ្ងៃទី៥ ខែធ្នូ ឆ្នាំ២០១៨ ទល់មុខព្រលានយន្តហោះអន្តរជាតិភ្នំពេញ នៅតាមបណ្ដោយផ្លូវសហព័ន្ធរុស្ស៊ី ភូមិក្បាលដំរី២ សង្កាត់កាកាបទី២ ខណ្ឌពោធិសែនជ័យ ។
រថយន្តខាងលើម៉ាកកូរ៉ូឡា ពណ៌ស្លែ ពាក់ស្លាកលេខ ភ្នំពេញ ២B -៦១៧១ បើកបរដោយបុរសម្នាក់ ចំណែកស្ត្រី២នាក់ទៀតជាអ្នករួមដំណើរ ។
តាមប្រភពពីប្រជាពលរដ្ឋនៅកន្លែងកើតហេតុបានដឹងថា នៅមុនពេលកើតហេតុ ពួកគាត់បានឃើញស្ត្រី២នាក់ជាអ្នករួមដំណើរ និងបុរសម្នាក់ជាអ្នកបើកបររថយន្តមួយគ្រឿងក្នុងល្បឿនយ៉ាងលឿនដូចហោះក្នុងទិសដៅពីកើតទៅលិច តាមបណ្ដោយផ្លូវសហព័ន្ធរុស្សី ។
លុះមកដល់ចំណុចទល់មុខព្រលានយន្តហោះពោធិចិនតុងក៏បានរេចង្កូតទៅបុកនឹងរបាំងថ្មពុះចែកទ្រូងផ្លូវពេញទំហឹងបណ្ដាលឲ្យរថយន្តខ្ទេចផ្នែកខាងមុខចំហៀងខាងឆ្វេងបានដាច់កង់មុខខ្ទាតចេញពីរថយន្តទើបរថយន្តទៅមុខលែងរួច ចំណែករបាំងថ្មពុះចែកទ្រូងផ្លូវអស់ចំនួន២កង់ បណ្តាលអោយស្ត្រីម្នាក់ដែលជិះខាងក្រោយមិនពាក់ខ្សែក្រវាត់រងការគ្រោះថ្នាក់យ៉ាងធ្ងន់ធ្ងរ រីឯស្ត្រីជាអ្នករួមដំណើរម្នាក់ទៀត និងបុរសជាអ្នកបើកបរបានរងរបួសស្រាល ។
បន្ទាប់មក ស្ត្រីដែលរងរបួសធ្ងន់ខាងលើត្រូវបាន រថយន្តសាមុយរបស់គ្លីនិកឯកជនដឹកយកទៅសង្គ្រោះភ្លាមៗផងដែរ ហើយត្រូវបានបងប្អូនដឹកបន្តទៅសំរាកព្យាបាលនៅមន្ទីរពេទ្យខេត្តកំពង់ស្ពឺ ៕
ក្រោយពេលកើតហេតុ កម្លាំងសមត្ថកិច្ចមូលដ្ឋានបានមកដល់ភ្លាមៗហើយបានទាក់ទងទៅជំនាញចរាចរណ៍ផ្លូវគោករាជធានីភ្នំពេញធ្វើការវាស់វែងនិងស្ទូចយករថយន្តបង្កទៅរក្សាទុករងចាំម្ចាស់ចូលខ្លួនមកដោះស្រាយទៅតាមផ្លូវច្បាប់ ៕
ចែករំលែកព័តមាននេះ