រាជធានីភ្នំពេញ ៖ ដីស្រែប្រជាពលរដ្ឋដែលស្ថិតនៅជាប់រណ្តៅដីដ៏ជ្រៅហួសនគរប្រេតរបស់ឈ្មួញជីកដីលក់ម្នាក់ឈ្មោះ វឌ្ឍនា ដែលអ្នកស្រុកនិយាយថាជាឈ្មួញមានអំណាច កំពុងត្រូវបានបាក់គួរឱ្យព្រួយបារម្ភ ពេលម្ចាស់ដីស្រែតវា៉ត្រូវឈ្មួញខាងលើបានសុំទិញយកក្នុងតម្លៃថោកៗបំផុត ។ ក្នុងរយៈពេលប៉ុន្មានឆ្នាំកន្លងមកនេះមានម្ចាស់ដីប្តឹងជាបន្តបន្ទាប់ រហូតមកដល់ពេលនេះនៅមិនទាន់បានដោះស្រាយចប់នៅឡើយទេ ជាហេតុបង្កការឈឺក្បាលដល់អាជ្ញាធរមូលដ្ឋានមិនចេះចប់ឡើយ ។
មិនតែប៉ុណ្ណោះរថយន្តបែនប្រភេទយីឌុបរាប់សិបគ្រឿងដែលដឹកដីចេញពីក្នុងរណ្តៅមរណៈនោះមួយគ្រឿងៗផ្ទុកទម្ងន់រាប់សិបតោនកំពុងបើកបរយា៉ងគគ្រឹកគគ្រេងដូចគេហែកឋិនបំផ្លាញកំណាត់ផ្លូវជាតិលេខ២ និងផ្លូវចំការដូងព្រមទាំងផ្លូវនានាផ្សេងទៀតដោយសេរី ។ ប្រជាពលរដ្ឋនៅតំបន់នោះបានឱ្យដឹងថា រណ្តៅដីរបស់លោក វឌ្ឍនា មួយនេះមានទីតាំងស្ថិតនៅក្នុងភូមិស្រីស្នំ ភូមិក្រាំងស្វាយ សង្កាត់ព្រែកកំពឹស ខណ្ឌដង្កោ និងបានដំណើរការជីកយកអាចម៍ដីលក់មានរយៈពេលជាង៤ឆ្នាំកន្លងមកហើយ ពេលនេះមានជម្រៅមិនខ្វះពីជាង៤០ម៉ែត្រនោះទេ និងមានទំហំដីប្រមាណជិត១០ហិកតា ។
ម្យា៉ងទៀតអ្នកកាសែតមិនត្រូវបានគេអនុញ្ញាតឱ្យទៅក្បែរទេ សូម្បីតែអ្នកភូមិដែលជាប្រជាពលរដ្ឋធម្មតាក៏មិនបានទៅជិតផង ព្រោះមានអ្នកយាមតឹងរឹុងណាស់ មិនមានអ្នកក្រៅណាថ្លើមធំហា៊នទៅកាន់តំបន់នោះឡើយ ។ ពួកគាត់មិនបានដឹងថាអ្នកយាមតំបន់នោះជាកម្លាំងមកពីខាងណានោះទេសុទ្ធតែជាមនុស្សកាច ។ អ្នកស្រុកបាននិយាយបន្តថា មានម្ចាស់ដីស្រែជាច្រើនដែលបាក់ដីស្រែចូលទៅក្នុងរណ្តៅដីនោះកាលពីឆ្នាំមុន មានរាប់សិបគ្រួសារនៅក្នុងភូមិស្រីស្នំ និងភូមិក្រាំងស្វាយបាននាំគ្នាធ្វើបាតុកម្មដុតសំបកកង់រថយន្តនៅលើកំណាត់ផ្លូវជាតិលេខ២នោះធ្វើការតវា៉ប្រឆាំងនឹងឈ្មួញជីកដីមួយ នេះ ។
នៅក្នុងខណៈនោះបន្ទាប់ពីមានការតវា៉ពីសំណាក់ប្រជាពលរដ្ឋ ខាងឈ្មួញជីកដីក៏បានយល់ព្រមដោះស្រាយដោយសុំទិញដីដែលនៅជុំវិញរណ្តៅដែលគេជីកធ្វើឱ្យបាក់រាលដាលនោះប្រមូលបង្ខំទិញថោកៗយកតែម្តង ។ ប៉ុន្តែអ្វីដែលធ្វើឱ្យពួកគាត់មានការឈឺចាប់នោះគឺដោយសារតែការទិញមានតម្លៃថោកហួសពីហាងឆេងដែលពួកគាត់ត្រូវលក់ តែបើមិនព្រមលក់ទេគឺអត់ព្រោះដីស្រែបាក់អស់ហើយ ។
ប្រភពដដែលបានបន្តថា ហាងឆេងដីនៅតំបន់នោះក្នុងមួយម៉ែត្រការ៉េតម្លៃដែលពួកគាត់ត្រូវលក់គឺជិត២០ដុល្លារឯណោះ ប៉ុន្តែនៅពេលបាក់ចូលរណ្តៅដីត្រូវបានឈ្មួញខាងលើទិញត្រឹមតែ៣,៥ដុល្លារតែប៉ុណ្ណោះ និងឱ្យលុយតាមរបៀបបង់រំលោះរាល់ខែទៀតផង ។ ពួកគាត់និយាយប្រាប់កោះសន្តិភាពថា ត្រូវខាតបង់ផលប្រយោជន៍ដោយសារតែឈ្មួញជីកដីនោះខ្លាំងណាស់ ប៉ុន្តែដល់ពេលដំណាក់កាលនេះហើយ ពួកគាត់គ្មានជម្រើសអ្វីផ្សេងទេ ព្រោះគ្មានរដ្ឋអំណាចណាជួយឈឺឆ្អាលទេ មានតែលក់ទាំងបង្ខំចិត្ត និងទឹកភ្នែកឈឺចាប់តែប៉ុណ្ណោះ ។ ពុំដឹងថាត្រូវធ្វើបែបណាឡើយបើមិនលក់ទេ នឹងត្រូវបាក់ចូលរណ្តៅអស់គ្មាន សល់ ។ មិនតែប៉ុណ្ណោះចង់ធ្វើស្រែក៏ធ្វើមិនកើតទៀត ព្រោះក្លាយជាការដ្ឋានគេ ។
មន្ត្រីសង្កាត់ព្រែកកំពឹសសុំមិនឱ្យបញ្ចេញឈ្មោះបានឱ្យដឹងថា កន្លងមកពិតជាធ្លាប់មានប្រជាពលរដ្ឋក្នុងភូមិស្រីស្នំ និងភូមិក្រាំងស្វាយធ្វើបាតុកម្មដុតសម្បកកង់រថយន្តតវា៉រឿងបាក់ដីស្រែពួកគាត់ពិតមែន ប៉ុន្តែក្រោយមកដីទាំងនោះត្រូវបានក្រុមហ៊ុនជីកដីមួយនោះទិញយកទាំងអស់ និងបានចប់មួយវគ្គហើយ ។ ពេលនេះមានប្រជាពលរដ្ឋ៤ទៅ៥គ្រួសារទៀតកំពុងធ្វើការតវា៉រឿងបាក់ដីស្រែបង្កបង្កើនផលរបស់ពួកគាត់ រកធ្វើស្រែមិនកើត ។ ហើយនៅព្រឹកថ្ងៃទី២៤ មិថុនា ២០១៣ ក៏ត្រូវបានអាជ្ញាធរសង្កាត់ កោះហៅទាំងលោក វឌ្ឍនា និងខាងប្រជាពលរដ្ឋឱ្យទៅជួបធ្វើការដោះស្រាយគ្នានៅក្នុងសាលាសង្កាត់ផងដែរ ។
ការជួបដោះស្រាយគ្នានោះ គឺត្រូវរ៉ូវឯកភាពគ្នាលក់និងទិញ ប៉ុន្តែនៅខុសគ្នាតែរយៈពេលប្រគល់លុយទេ ដោយឈ្មួញដីនោះសុំបង់លុយរំលោះរយៈពេល១ខែម្តង ។ ចំណែកឯម្ចាស់ដីស្រែបានទាមទារសុំឱ្យប្រគល់ក្នុងរយៈពេលកន្លះខែម្តងវិញ ។ ទោះបីបែបណាអ្នកស្រុកតំបន់នោះ មានបំណងចង់ឱ្យអាជ្ញាធររាជធានីភ្នំពេញពិនិត្យមើលរណ្តៅដីមួយនេះផង ជីកកាន់តែជ្រៅទៅៗហើយ និងប៉ះពាល់ដល់ការរស់នៅរបស់ពួកគាត់ខ្លាំងណាស់ ព្រោះវាមានជម្រៅជ្រៅគួរឱ្យខ្លាច និងបំផ្លាញផ្លូវគ្រប់កន្លែងថែមទៀតផង ។ ឯឈ្មួញជីកដីប្រើអំណាចខ្លាំងណាស់ជាក្រុមមានប្រាក់មានអំណាច បើមិនទប់ស្កាត់ទេនឹងបាក់ដីពួកគាត់ជាបន្តបន្ទាប់ទៀតហើយ ។
សូមបញ្ជាក់ថា កោះសន្តិភាពបានទទួលពាក្យបណ្តឹងពីអ្នកស្រុកនៅតំបន់នោះច្រើនដងមកហើយ ប៉ុន្តែអ្នកកាសែតមិនអាចទៅកាន់ទីនោះថតរណ្តៅដីមរណៈនេះបានឡើយ ។ គ្មានអ្នកកាសែតណាថ្លើមធំហា៊នទៅពិនិត្យជាក់ស្តែង ដើម្បីពិពណ៌នារណ្តៅដីនោះបានទេ ។ ម្លោ៉ះហើយបានត្រឹមតែថតរថយន្តដឹកដីដ៏គគ្រឹកគ្រេងនោះតែប៉ុណ្ណោះ ព្រមទាំងលាក់លៀមបំផុតទៀតផង ៕
ចែករំលែកព័តមាននេះ