រាជធានីភ្នំពេញ ៖ កម្មករ-កម្មការិនីរោងចក្រកាត់ដេរសម្លៀកបំពាក់ ឌូហឺស្ត ជាច្រើននាក់បានដួលសន្លប់បន្តគ្នា ខណៈមានការជ្រួលច្របល់កើតឡើងដោយសារចរន្តអគ្គិសនីនៅក្នុងរោងចក្របានដាច់ ហើយថៅកែបានបញ្ឆេះម៉ាស៊ីនភ្លើងដើម្បីធ្វើការបន្ត ។ ពេលនោះ ម៉ាស៊ីនភ្លើងមានផ្សែងហុយចេញមកយ៉ាងខ្មួលខ្មាញ់ធ្វើឱ្យកម្មករ-កម្មការិនីទាំងនោះនឹកស្មានថាភ្លើងឆេះរោងចក្រ ក៏មានការភិតភ័យស្លន់ស្លោរត់ចេញមកក្រៅរោងចក្រក៏មានអ្នកខ្លះដួលសន្លប់ជាបន្តបន្ទាប់ ។
ហេតុការណ៍នេះបានកើតឡើងកាលពីវេលាម៉ោង៩ និង៣០នាទីព្រឹក ថ្ងៃទី២៤ មិថុនា នៅរោងចក្រកាត់ដេរខាងលើ ស្ថិតក្នុងភូមិទួលពង្រ សង្កាត់ចោមចៅ ខណ្ឌពោធិ៍សែនជ័យ ។ ប្រភពព័ត៌មានឱ្យដឹងថា មុនពេលកើតហេតុ ក្រុមកម្មករ-កម្មការិនីទាំងនោះបាននាំគ្នាធ្វើការងារធម្មតាតាំងពីព្រលឹមមិនមានបញ្ហាអ្វីកើតឡើងទេ លុះពេលចរន្តអគ្គិសនីដាច់ ធ្វើឱ្យសង្វាក់ផលិតកម្មនៅក្នុងរោងចក្រទាំងមូលឈប់ដំណើរការ ។ ខណៈនោះថៅកែរោងចក្របានបញ្ជាឱ្យបញ្ឆេះម៉ាស៊ីនភ្លើងដើម្បីធ្វើការងារបន្ត ប៉ុន្តែនៅពេលម៉ាស៊ីនបញ្ឆេះ ស្រាប់តែមានផ្សែងហុយចេញមកក្រៅយ៉ាងខ្មួលខ្មាញ់ធ្វើឱ្យក្រុមកម្មករទាំងនោះនឹកស្មានថា ជាផ្សែងឆេះរោងចក្រក៏មានការជ្រួលច្របល់ នាំគ្នារត់ជែងជើងចេញមកក្រៅទាំងស្ថានភាពភ័យស្លន់ស្លោបំផុត ។
ប្រភពដដែលបន្តថា ខណៈកម្មករបានរត់ចេញពីរោងចក្រ មានអ្នកខ្លះតក់ស្លុតរហូតដល់សន្លប់បាត់ស្មារតីជាបន្តបន្ទាប់ច្រើននាក់ ។ តាមប្រភពព័ត៌មានពីកន្លែងកើតហេតុឱ្យដឹងថា អ្នកដួលសន្លប់មានចំនួនដល់ទៅជាង៤០នាក់ ប៉ុន្តែសមត្ថកិច្ច និងតំណាងរោងចក្រនិយាយថា កម្មករដែលដួលសន្លប់មានចំនួនត្រឹមតែ៤ទៅ៥នាក់ប៉ុណ្ណោះ ។ ប្រភពដដែលបានបន្តទៀតថា ខណៈនោះ អាជ្ញាធរ និងសមត្ថកិច្ចមូលដ្ឋានបានចុះទៅកន្លែងកើតហេតុភ្លាមៗ ឯក្រុមរថយន្តពន្លត់អគ្គិភ័យបានត្រៀមខ្លួនចេញអន្តរាគមន៍ផងដែរ ។
ចំណែកក្រុមរថយន្តសង្គ្រោះបានចេញទៅកន្លែងកើតហេតុដឹកកម្មករដែលដួលសន្លប់ទៅកាន់មន្ទីរពេទ្យ មិនតែប៉ុណ្ណោះមានអ្នកសន្លប់ខ្លះត្រូវបានគេដឹកតាមរថយន្តរោងចក្រទៅសង្គ្រោះភ្លាមៗផងដែរ ។ នេះជាលើកទី១ហើយសម្រាប់រោងចក្រកាត់ដេរមួយនេះ ត្រូវបានគេបិទទ្វារជាបណ្តោះអាសន្ន ៕
ចែករំលែកព័តមាននេះ