រាជធានីភ្នំពេញ៖ អាជ្ញាធររាជធានីភ្នំពេញបានបើកកិច្ចប្រជុំមួយ ត្រៀមរៀបចំខួប៥ឆ្នាំនៃការដាក់បញ្ចូលប្រាសាទព្រះវិហារជាបេតិកភណ្ឌពិភពលោក កាលពីវេលាម៉ោង២រសៀលថ្ងៃទី២៤ មិថុនា ២០១៣ ក្រោមការអញ្ជើញចូលរួមពីលោកប៉ា សុជាតិវង្ស អភិបាលរាជធានីភ្នំពេញ មន្រ្តីពាក់ព័ន្ធគ្រប់ស្ថាប័ន តំណាងនគរបាល និងមន្ត្រីសំខាន់ៗសាលារាជធានីភ្នំពេញជាច្រើនរូបទៀត ។
មន្ត្រីសាលារាជធានីភ្នំពេញបានឱ្យដឹងថា អាជ្ញាធរ និងប្រជាពលរដ្ឋទូទាំងរាជធានីភ្នំពេញ គ្រោងធ្វើមហាមិទ្ទិញធំមួយ ដើម្បីអបអរខួប៥ឆ្នាំនៃការដាក់បញ្ចូលប្រាសាទព្រះវិហាររបស់ខ្មែរជាបេតិកភណ្ឌពិភពលោក ហើយអាជ្ញាធររាជធានីនឹងមានការអំពាវនាវនៅតាមសាលារៀន វត្តអារាមនានាទូទាំងរាជធានីភ្នំពេញ ឱ្យមានការប្រារព្ធពិធីនោះ ព្រមទាំងវាយជួង វាយស្គរ គ្រវីទង់ជាតិ និងច្រៀងបទពង្សាវតាទៀតផង ។
ការរៀបចំខួប៥ឆ្នាំនៃការដាក់បញ្ចូលប្រាសាទព្រះវិហារជាបេតិកភណ្ឌពិភពលោកនេះ នឹងមានអ្នកចូលរួមជាង៥ម៉ឺននាក់ ហើយពិធីនឹងធ្វើឡើងនៅពហុកីឡដ្ឋានជាតិអូឡាំពិកថ្ងៃទី៧ កក្តដា ២០១៣ ដោយពេលល្ងាចមានការប្រគំតន្ត្រីផងដែរ ។
ចែករំលែកព័តមាននេះ