ខេត្ដបន្ទាយមានជ័យ ៖ គ្រោះថ្នាក់ចរាចរណ៍មួយកើតឡើងដោយរថយន្ដកាមរី ពណ៌ស ពាក់ស្លាកលេខ ប.មានជ័យ2A-4508 របស់សាលាបង្រៀនបើកបរមួយកន្លែង ត្រូវរថយន្ដតាក់ស៊ីម៉ាកកាមរីមួយគ្រឿងទៀត ពណ៌សំបកឪឡឹក ពាក់ស្លាកលេខ បាត់ដំបង2A-1146 ជ្រុលបុកពេញទំហឹង បណ្ដាលឱ្យរថយន្ដតាក់ស៊ីរេចង្កូតទៅបុកសសរស្លាកពន្ធនាគារខេត្ដ ស្រុញក្បាលរបើកកាបូ តែសំណាងល្អគ្មានមនុស្សរងរបួស ។ ហេតុការណ៍នេះកើតឡើងកាលពីវេលាម៉ោង១១និង៣០នាទីព្រឹកថ្ងៃទី២១ មិថុនា នៅលើកំណាត់ផ្លូវជាតិលេខ៥ ត្រង់ចំណុចផ្លូវបត់ចូលពន្ធនាគារខេត្ដ ស្ថិតក្នុងភូមិគាប សង្កាត់ទឹកថ្លា ក្រុងសិរីសោភ័ណ ។
ប្រភពព័ត៌មានពីមន្ដ្រីនគរបាលខេត្ដឱ្យដឹងថា មុនពេលកើតហេតុ រថយន្ដកាមរីមួយគ្រឿងរបស់សាលាបង្រៀនបើកបរយីហោ «ហេងចំណាន» មានគ្រូបង្រៀនម្នាក់កំពុងបង្រៀនសិស្សនារី២នាក់ ដោយបើកពីទិសខាងលិចទៅកើតក្នុងល្បឿនយឺតៗ ហើយរថយន្ដបានបត់ទៅខាងឆ្វេងដោយមិនបានស៊ីញ៉ូភ្លើង ស្រាប់តែមានរថយន្ដតាក់ស៊ីម៉ាកកាមរីមួយគ្រឿងទៀតបើកបរដោយឈ្មោះ សៀក ឆាលី ភេទប្រុស អាយុ៣០ឆ្នាំ រស់នៅភូមិបាលិលេយ្យ សង្កាត់-ក្រុងប៉ោយប៉ែត ក្នុងទិសដៅស្របគ្នាមកដល់ជាន់ហ្វ្រាំងមិនទាន់ក៏ជ្រុលទៅបុករថយន្ដបង្រៀនបើកបរពេញទំហឹង បណ្ដាលឱ្យរថយន្ដតាក់ស៊ីរេចង្កូតធ្លាក់ផ្លូវទៅបុកសសរស្លាកពន្ធនាគារខេត្ដស្រុញក្បាលរបើកកាបូ ។ ចំណែករថយន្ដរៀនបើកបរខ្ទាតចេញពីផ្លូវទៅខាងឆ្វេងដៃ ក្រពឹតទ្វារមួយចំហៀង តែសំណាងល្អដែលគ្មានមនុស្សរងរបួស ។
ក្រោយពេលកើតហេតុភាគីទាំងពីរបានសម្រួលគ្នាសងថ្លៃខូចខាតទ្រព្យសម្បត្ដិពន្ធនាគារ និងយករថយន្ដទៅជួសជុលរៀងខ្លួន ។
លោក ឈឿម សុផុន ប្រធានការិយាល័យចរាចរណ៍ខេត្ដបញ្ជាក់ថា គ្រោះថ្នាក់ចរាចរណ៍នេះមានកំហុសមួយផ្នែកម្នាក់ ដោយសារភាគីរៀនបើកបរមុនពេលបត់មិនស៊ីញ៉ូភ្លើងឱ្យអ្នកធ្វើដំណើរពីក្រោយបានដឹង ចំណែករថយន្ដតាក់ស៊ីបើកបរលឿនក្នុងទីប្រជុំជន ពេលជួបឧបសគ្គចំពោះមុខជាន់ហ្វ្រាំងមិនទាន់ក៏ជួបគ្រោះថ្នាក់ ៕
ចែករំលែកព័តមាននេះ