ខេត្តប៉ៃលិន ៖ ប្រជាពលរដ្ឋជាច្រើននាក់រស់នៅក្នុងក្រុងប៉ៃលិន ដែលប្រកបមុខរបរដាំដំឡូងមី មានការសប្បាយរីករាយក្នុងចិត្តយ៉ាងខ្លាំង ខណៈឃើញតម្លៃទីផ្សារដំឡូងមីឡើងខ្ពស់ ចាប់តាំងពីចុងឆ្នាំ២០១៧ បន្តរហូតមកដល់ចុងឆ្នាំ២០១៨នេះក៏នៅតែថេរដដែលពោល គឺមិនការធ្លាក់ចុះខ្លាំងដូចកាលពីប៉ុន្មានឆ្នាំមុនៗ គួរឱ្យកត់សម្កាល់នោះទេ…
ខេត្តប៉ៃលិន ៖ ប្រជាពលរដ្ឋជាច្រើននាក់រស់នៅក្នុងក្រុងប៉ៃលិន ដែលប្រកបមុខរបរដាំដំឡូងមី មានការសប្បាយរីករាយក្នុងចិត្តយ៉ាងខ្លាំង ខណៈឃើញតម្លៃទីផ្សារដំឡូងមីឡើងខ្ពស់ ចាប់តាំងពីចុងឆ្នាំ២០១៧ បន្តរហូតមកដល់ចុងឆ្នាំ២០១៨នេះក៏នៅតែថេរដដែលពោល គឺមិនការធ្លាក់ចុះខ្លាំងដូចកាលពីប៉ុន្មានឆ្នាំមុនៗ គួរឱ្យកត់សម្កាល់នោះទេ ។
បើតាមការរៀបរាប់ពីកសិករម្នាក់ឈ្មោះ អយ គឹមហូយ ភេទប្រុស អាយុ៤៥ឆ្នាំ ប្រពន្ធឈ្មោះ គុណ ម៉ាលី អាយុ៤៣ឆ្នាំ រស់នៅក្នុងភូមិសួនអំពៅលិច សង្កាត់ប៉ៃលិន ក្រុងប៉ៃលិន បានរៀបរាប់ឱ្យដឹងថា គាត់បានដាំដំណាំដំឡូងមីចំនួន៤ហិកតាជាង គឺស្ថិតនៅក្នុងភូមិសួនអំពៅកើត សង្កាត់ប៉ៃលិន ក្រុងប៉ៃលិន ហើយនៅពេលនេះគាត់បាននាំប្រពន្ធទៅកាប់ដើមដំឡូងមីនៅក្នុងចម្ការរបស់ខ្លួន ដើម្បីលក់ឱ្យអ្នកផ្សេងទិញយកទៅដាំនៅចម្ការរបស់គេ ។ ហើយមិនពន្យាពេលយូរទៀតនោះទេ ព្រោះដាំបានរយៈពេល១ឆ្នាំហើយ ដូច្នេះគាត់ក៏នឹងចាប់ផ្តើមជួលកម្មករឱ្យចូលដកលក់ រួចភ្ជួរដីហាលបន្តិចសិន ទើបយកដើមដំឡូងពីកន្លែងផ្សេងមកដាំបន្តនៅលើដីនេះ ។
គាត់បានបន្តទៀតថា តម្លៃទីផ្សារដំឡូងមីស្រស់ បច្ចុប្បន្នពិតជានៅល្អដដែលដោយ១គីឡូក្រាមឈ្មួញទិញ២.២កាក់ (ប្រាក់ថៃ) ទៅ២.៣កាក់ ដែលជាតម្លៃមួយអាចទទួលយកបាន ព្រោះអីបើនឹកដល់ កាលពីប៉ុន្មានឆ្នាំមុនៗ តម្លៃទីផ្សារមើមដំឡូងមីមានការធ្លាក់ចុះយ៉ាងខ្លាំង រហូតដល់១គីឡូក្រាមត្រឹមតែ០.៩កាក់ ទៅ១បាត (ប្រាក់ថៃ) ប៉ុណ្ណោះជាហេតុធ្វើឱ្យប្រជាពលរដ្ឋស្ទើរតែពេញខេត្តប៉ៃលិនមានការជំពាក់បំណុលគេរហូតដល់អ្នកខ្លះប្រកាសលក់ដីចម្ការ និងដីផ្ទះសម្បែងថែមទៀតផង ។
ប៉ុន្តែរហូតមកដល់បច្ចុប្បន្ននេះដោយសារតម្លៃដំណាំដំណាំដំឡូងមីនេះមានការស្ទុះឡើងវិញ ទើបធ្វើឱ្យប្រជាពលរដ្ឋជាច្រើនគ្រួសារសងបំណុលគេជិតរួចរាល់អស់ហើយដែរ ដោយអ្នកខ្លះទៀតក៏ដោះស្លាកប្រកាសលក់ដីរបស់ខ្លួនចេញវិញ ។ គាត់បន្ថែមថា នៅក្នុងចម្ការរបស់គាត់ មិនត្រឹមតែដាំដំឡូងមីប៉ុណ្ណោះទេ គាត់ក៏បានដាក់ដាំដើមស្វាយកែវរមៀតជាច្រើនដើមផងដែរ ដើម្បីជៀសវាងតម្លៃទីផ្សារដំឡូងមីធ្លាក់ចុះគាត់អាចប្រមូលផលផ្លែស្វាយទប់ទល់ ព្រោះអីតម្លៃទីផ្សារកសិផលមិនសូវឋិតថេរប៉ុន្មាននោះទេ ។
គាត់បញ្ជាក់ទៀតថា បើសិនជាតម្លៃទីផ្សារនៅតែល្អដូចពេលបច្ចុប្បន្ននេះ ប្រហែលជា១ទៅ២ឆ្នាំទៀតប្រជាពលរដ្ឋដែលប្រកបរបរដាំដំឡូងមីនឹងសម្រុកនាំគ្នាដាំបន្តទៀត ដើម្បីផ្គត់ផ្គង់ជីវភាពគ្រួសារធូរធារផងដែរ ៕
ចែករំលែកព័តមាននេះ