រដ្ឋមន្ត្រីការបរទេសរបស់បណ្តាប្រទេសក្រុមមិត្តស៊ីរី ដែលរួមប្រជុំគ្នាកាលពីថ្ងៃទី២២ មិថុនា នៅក្រុងដូហា រាជធានីកាតា ដើម្បីវាយតម្លៃពីសភាពការណ៍នៅស៊ីរី បានព្រមព្រៀងគ្នាពង្រឹងជំនួយសម្រាប់ពួកឧទ្ទាមស៊ីរី ។ក្នុងសេចក្តីថ្លែងការណ៍រួមមួយចេញផ្សាយក្រោយកិច្ចប្រជុំនេះ ក្រុមមិត្តរបស់ស៊ីរីបានសម្រេចផ្តល់ជំនួយបន្ទាន់ជាសម្ភារ និងឧបករណ៍ដល់ពួកឧទ្ទាមដើម្បីឱ្យពួកគេអាចប្រឈមមុខនឹងការវាយប្រហារដ៏ខ្លាំងក្លារបស់រដ្ឋាភិបាល ។
រដ្ឋមន្ត្រីការបរទេសទាំងនោះបានថ្កោលទោសដល់អន្តរាគមន៍របស់ពួកហេសប៊ុលឡាហ៍ លីបង់និងពួកយុទ្ធជនអីុរ៉ង់ និងអីុរា៉កក្នុងជម្លោះ ស៊ីរី ។រដ្ឋមន្ត្រីការបរទេសរបស់ប្រទេសចំនួន១១បានចូលរួមក្នុងកិច្ចប្រជុំក្រុងដូហានេះ ក្នុងនោះមានសហរដ្ឋអាមេរិក បារាំង អង់គ្លេស អាល្លឺម៉ង់ អីុតាលី អារា៉ប៊ីសារអូ៊ឌីត កាតា អេមីរា៉ត់អារា៉ប់រួម អេហ្ស៊ីប ហ្ស៊កដានី និងតួកគី ។
នាយករដ្ឋមន្ត្រីកាតាព្រះអង្គម្ចាស់ BEN JASSIM AL THANI ថ្លែងពេលបើកកិច្ចប្រជុំនោះថា មធ្យោបាយតែមួយគត់ដើម្បីបញ្ចប់ជម្លោះស៊ីរី គឺការបំពាក់អាវុធឱ្យពួកឧទ្ទាមហើយផ្តល់ឱ្យពួកគេនូវរាល់រូបភាពនៃការជួយទ្រទ្រង់ ។
ចំណែកលោក ចន គ័ររី រដ្ឋមន្ត្រីការបរទេសអាមេរិកថ្លែងថា គ្រប់ភាគីបានព្រមព្រៀងគ្នាបញ្ចប់អំពើហិង្សា ដើម្បីឱ្យពលរដ្ឋស៊ីរីអាចជ្រើសរើសអនាគតរបស់ខ្លួន ។ ការបង្ហូរឈាមដោយរបបលោក អាសាដ និងការលូកដៃរបស់អីុរ៉ង់ ជាសម្ព័ន្ធមិត្តរបស់ ហេសបុ៊លឡាហ៍ បានគំរាមកំហែងទស្សនៈវិស័យនៃដំណោះស្រាយ នយោបាយមួយ ហើយការប្រើអាវុធគីមី ដោយរបបស៊ីរីគឺដើរកាត់ហួសខ្សែបន្ទាត់ក្រហមរបស់លោកបារា៉ក់ អូបាមា៉ និងរបស់ប្រទេសផ្សេងៗទៀត ៕
ចែករំលែកព័តមាននេះ