ខេត្តព្រៃវែង ៖ ស្ត្រីម្នាក់ត្រូវស្លាប់ភ្លាមៗនិងមនុស្សក្មេងចាស់ប្រុសស្រី២៤នាក់ទៀតបានរងរបួសធ្ងន់ និងស្រាលនៅក្នុងហេតុការណ៍គ្រោះថ្នាក់ចរាចរណ៍ដ៏រន្ធត់មួយ ដែលបានកើតឡើងនៅលើកំណាត់ផ្លូវជាតិលេខ១ ស្ថិតក្នុងភូមិធំ ឃុំល្វា ស្រុកព្រះស្តេច កាលពីវេលាម៉ោង៣រសៀលថ្ងៃទី២២ មិថុនា ។ ប្រភពព័ត៌មានពីសាក្សីនៅកន្លែងកើតហេតុបានឱ្យដឹងថា រថយន្តកូរ៉េចំណុះ១តោនកន្លះមួយគ្រឿងពណ៌ខៀវ ពាក់ស្លាកលេខភ្នំពេញ 2A-5619 បើកបរមកពីកើតទៅលិចក្នុងល្បឿនលឿន ដែលនៅលើរថយន្តនោះមានផ្ទុកម៉ាស៊ីនក្រឡុកស៊ីម៉ងត៍ដ៏ធំមួយ និងសម្ភារគ្រឿងសំណង់មួយចំនួន ហើយថែមទាំងមានមនុស្សប្រុសស្រីជិត៣០នាក់អង្គុយរយីងរយោងព្រោងព្រាតនៅលើសម្ភារសំណង់ទាំងនោះ ដែលមើលទៅគួរឱ្យស្រៀវសាច់ខ្លាំងណាស់ ។
ពេលមកដល់ចំណុចកើតហេតុ ដោយសារតែរថយន្តផ្ទុកចំណុះច្រើនពេក ហើយបើកលឿនទៀត ធ្វើឱ្យតួរថយន្តខាងក្រោយយោលរេឆ្វេងស្តាំ ក៏បណ្តាលឱ្យមនុស្សដែលជិះតោងខ្ពស់នៅខាងក្រោយភ័យស្លន់ស្លោនាំគ្នាស្រែកប្រាប់ឱ្យអ្នកបើកបរឈប់ ។ នៅពេលឮសំឡេងស្រែកខ្លាំងអ្នកបើករថយន្តក៏ជាន់ហ្វ្រាំងឈប់ទាំងបង្ខំ ធ្វើឱ្យរថយន្តយោលបោកទៅកណ្តាលថ្នល់ចាក់ម៉ាស៊ីនក្រឡុកស៊ីម៉ងត៍ដ៏ធ្ងន់នេះចោល និងមនុស្សខ្ចាត់ខ្ចាយ ដេកដួលរដូករណែលពេញលើថ្នល់ ។ ក្នុងស្ថានភាពបែបនេះចាត់ទុកថាសំណាងល្អដែរ ដែលមិនមានរថយន្តផ្សេងបើកមក ទើបអ្នកខ្ទាតទៅលើថ្នល់បានរួចផុតពីការស្លាប់ គ្រាន់តែរបួសធ្ងន់ស្ទើរគ្រប់គ្នា ។
ក្រោយពេលកើតហេតុភ្លាម អ្នកស្រុកនៅក្បែរកន្លែងកើតហេតុបាននាំគ្នារត់ទៅមើល និងជួយលើកអ្នកដែលខ្ទាតចាក់ទៅកណ្តាលថ្នល់យកមកដាក់នៅចិញ្ចើមថ្នល់វិញដើម្បីកុំឱ្យស្ទះចរាចរណ៍ ។ ភ្លាមៗនោះគេឃើញស្ត្រីម្នាក់ត្រូវស្លាប់បាត់បង់ជីវិត និងមនុស្សប្រុសស្រី២២នាក់ផ្សេងទៀតដេកសន្លប់ស្តូកស្តឹងនៅនឹងកន្លែង ។ ឯក្មេងស្រីតូច២នាក់របួសស្រាលនៅឈរមើលម្តាយដែលដេកសន្លប់ស្តូកស្តឹងគួរឱ្យអាណោចអាធ័មជាទីបំផុត ។ ភ្លាមនោះ មានការទាក់ទងហៅសមត្ថកិច្ចឱ្យមកជួយអន្តរាគមន៍នៅកន្លែងកើតហេតុ និងហៅរថយន្តសង្គ្រោះមន្ទីរពេទ្យបង្អែកកំពង់ត្របែក និងរថយន្តសង្គ្រោះមណ្ឌលសុខភាពឃុំល្វាមកជួយដឹកជនរងគ្រោះទាំងអស់ទៅមន្ទីរពេទ្យ ដោយជនរងគ្រោះខ្លះត្រូវបានដឹកទៅកាន់មន្ទីរពេទ្យបង្អែកខេត្តស្វាយរៀង និងខ្លះទៀតដឹកយកទៅមន្ទីរពេទ្យបង្អែកខេត្តព្រៃវែង ។
ដោយឡែក សពស្ត្រីម្នាក់ដែលគេពុំទាន់ស្គាល់អត្តសញ្ញាណត្រូវបានយកទៅតម្កល់នៅសាលរក្សាសពនៃមន្ទីរពេទ្យបង្អែកកំពង់ត្របែក រង់ចាំក្រុមគ្រួសារមកទទួលយកទៅធ្វើបុណ្យ ។ តាមប្រភពព័ត៌មានបានឱ្យដឹងថា ក្រុមកម្មករទាំងអស់ដែលរងគ្រោះនេះ គឺជាកម្មកររបស់ក្រុមហ៊ុនសំណង់មួយ ដែលមានទីតាំងនៅផ្សារដើមថ្កូវក្នុងខណ្ឌចំការមន រាជធានីភ្នំពេញ ។ មុនពេលកើតហេតុ ក្រុមជនរងគ្រោះបានទៅចាក់សាបក្រាលផ្លូវ និងធ្វើរបងផ្ទះនៅផ្សារកំពង់ត្របែក ។ លុះធ្វើការរួចរាល់ហើយ ក៏នាំគ្នាជិះលើរថយន្តកូរ៉េដែលក្រឡាប់នេះធ្វើដំណើរត្រឡប់ទៅកាន់ទីតាំងនៅរាជធានីភ្នំពេញវិញទាំងអស់គ្នា តែជាអកុសលក៏ជួបគ្រោះថ្នាក់តាមផ្លូវបែបនេះដោយសារតែការផ្ទុកមិនស្គាល់ប្រមាណនៃរថយន្តរបស់ក្រុមអ្នកម៉ៅការសំណង់ ។
តាមការសន្និដ្ឋានរបស់សមត្ថកិច្ចបង្ហាញថា មូលហេតុនៃគ្រោះថ្នាក់ចរាចរណ៍នេះបណ្តាលមកពីរថយន្តផ្ទុកចំណុះធ្ងន់ពេក ចំណែកមនុស្សជិះបាននាំគ្នាតោងរយីងរយោង មិនរកកន្លែងអង្គុយឱ្យបានត្រឹមត្រូវ ធ្វើឱ្យតួរថយន្តយោលឆ្វេងស្តាំ លុះពេលរថយន្តបើកលឿន ក៏ភ័យនាំគ្នាស្រែកឱ្យឈប់ ឯអ្នកបើកបរពេលឮគេស្រែកឱ្យឈប់យ៉ាងសន្ធាប់បែបនេះ ក៏ជាន់ហ្វ្រាំងទាំងប្រថុចញ៉ុច ទើបបណ្តាលឱ្យរថយន្តបោកក្រឡាប់ចាក់ទាំងមនុស្ស និងសម្ភារខ្ចាត់ខ្ចាយរដូករណែលពេញផ្លូវតែម្តង ៕
ចែករំលែកព័តមាននេះ