ខេត្តបន្ទាយមានជ័យ ៖ ផលប៉ះពាល់នៃគ្រឿងញៀន ទន្ទឹមនឹងខូចប្រព័ន្ធសរសៃប្រសាទ បាត់បង់អនាគត បាត់បង់ការសិក្សា អ្នកប្រើប្រាស់គ្រឿងញៀន អាចបង្កបទល្មើសផ្សេងៗបន្ថែមទៀត បន្ទាប់ពីលួចទ្រព្យសម្បត្តិ ឪពុកម្តាយក្នុងផ្ទះ នឹងឈានដល់ការប្រព្រឹត្តបទល្មើសដល់អ្នកដទៃ ដូចជាប្រព្រឹត្តអំពើឆក់ ប្លន់ លួចទ្រព្យអ្នកដទៃ ក៏ប្រព្រឹត្តនូវអំពើហឹង្សាផ្សេងៗទៀតផងដែរធ្វើឲ្យមានភាពអសន្តិសុខក្នុងសង្គម។ នេះគឺជាការលើកឡើង របស់លោកឧត្តមសេនីយ៍ទោ អាត់ ខែម ស្នងការនគរបាលខេត្តបន្ទាយមមានជ័យ ក្នុងអង្គប្រជុំប្រចាំខែ ដោយជំរុញឲ្យគ្រប់អធិការដ្ឋាន នគរបាលស្រុក ក្រុង ត្រូវតែយកចិត្តទុកលើបញ្ហាជួញដូរ និងប្រើប្រាស់គ្រឿងញៀន គឺត្រូវតែបង្ក្រាប។
ដើម្បីអនុវត្តនូវគោលនយោបាយ ភូមិ ឃុំ មានសុវត្ថិភាព រក្សាបាននូវសន្តិសុខ សណ្តាប់ធ្នាប់សង្គម។ កម្លាំងនគរបាលស្រុកម៉ាឡៃ នៅថ្ងៃទី៣០ ខែវិច្ឆិកា ឆ្នាំ២០១៨ វេលាម៉ោង៣ និង២០នាទីរសៀល កម្លាំងអធិការដ្ឋាននគរបាលស្រុកម៉ាឡៃចុះបង្ក្រាបករណីជួញដូរដោយខុសច្បាប់ នូវសារធាតុញៀន នៅចំណុចភូមិថ្មបាំង ឃុំ បឹងបេង ស្រុក ម៉ាឡៃ ខេត្ត បន្ទាយមានជ័យ ក្នុងនោះឃាត់ជនសង្ស័យជា បន្តបន្ទាប់បានចំនួន៣នាក់។ លោកវរសេនីយ៍ឯក អ៊ុក សំអាត អធិការនគរបាល ស្រុកម៉ាឡៃ បានឲ្យដឹងថា៖ បន្ទាប់ពីកម្លាំង នគរបាលយើងបានធ្វើស្រាវជ្រាវ និងចាប់ឃាត់ខ្លួនឈ្មោះ អឿង សារិន ភេទប្រុស អាយុ២៩ឆ្នាំ មុខរបរកសិករ រស់នៅភូមិថ្មបាំង ឃុំបឹងបេង ស្រុកម៉ាឡៃ ខេត្តបន្ទាយមានជ័យ និងចាប់វត្ថុតាងថ្នាំញៀន ប្រភេទគ្រាប់ពណ៌ក្រហម(WY)ចំនួន១២១គ្រាប់។
ដោយយោងតាមចម្លើយសារភាពរបស់ឈ្មោះ អឿង សារិន និយាយថា៖ ថ្នាំញៀនទាំងនេះ ខ្លួនបានទិញពីឈ្មោះ ឈួន គឹមហុក ហៅម៉ៅ រស់នៅភូមិអូរសំព័រ ឃុំអូរសំព័រ ស្រុក ម៉ាឡៃ ខេត្តបន្ទាយមានជ័យ។ នៅថ្ងៃទី០១ ខែធ្នូ ឆ្នាំ២០១៨ វេលាម៉ោង០៦ និង១០យប់ យើងបានបន្តធ្វើការឃាត់ ខ្លួនឈ្មោះ ឈួន គឹមហុក ហៅម៉ៅ ក្នុងនោះឈ្មោះ ឈួន គឹមហុក បានសារភាពថ្នាំញៀនទាំងនេះ គឺខ្លួនបានទិញពីឈ្មោះ ស៊ូ ផា ភេទស្រី អាយុ៦០ឆ្នាំ រស់នៅភូមិអូរសំព័រ ឃុំម៉ាឡៃ ស្រុកម៉ាឡៃ ខេត្ត បន្ទាយមានជ័យ ដោយយើងបានបន្តឆែកឆេរផ្ទះ ស៊ូ ផា និងចាប់យកវត្ថុតាង ថ្នាំញៀនប្រភេទគ្រាប់ ពណ៌ក្រហមចំនួន៨៩គ្រាប់ និងពណ៌ខៀវ ចំនួន០១គ្រាប់ សរុបថ្នាំញៀនទាំងអស់២១០គ្រាប់។
លោកអធិការបានបញ្ជាក់ថា៖ តាមបទបញ្ជារបស់លោកឧត្តមសេនីយ៍ទោ អាត់ ខែម ស្នងករនគរបាលខេត្ត និងដោយមានការសម្របសម្រួលព្រះរាជអាជ្ញា លោក មាស ច័ន្ទពិសិដ្ឋ ព្រះរាជអាជ្ញាអមសាលាដំបូងខេត្ត បន្ទាយមានជ័យ និងផ្អែកតាមចម្លើយសារភាព រួមទាំងមានវត្ថុតាងជាក់ស្តែងដែលដកហូតបាន ជនសង្ស័យទាំង៣នាក់ ហើយវត្ថុតាងត្រូវបានកម្លាំងនគរបាលជំនាញ នៃអធិការដ្ឋាននគរបាលស្រុកម៉ាឡៃ បានរៀបចំកសាងសំណុំរឿង ជនសង្ស័យ និងវត្ថុតាងទៅស្នងការដ្ឋាននគរបាល ខេត្ត ដើម្បីចាត់ការតាមនីតិវិធីច្បាប់៕
ចែករំលែកព័តមាននេះ