រាជធានីភ្នំពេញ ៖ បុរសម្នាក់ជិះកង់ទៅហាត់ប្រាណ រួចជិះកង់ត្រឡប់ទៅផ្ទះវិញ ខណៈផ្លូវកំពុងតែស្ទះចរាចរណ៍ក៏បានឈប់បណ្តើរកង់ ស្រាប់តែខ្យល់គដួលស្លាប់ផ្អើលសមត្ថកិច្ចចុះមកដល់កន្លែងកើតហេតុកាលពីម៉ោង៥និង៣០នាទីល្ងាច ថ្ងៃទី២៧ ខែវិច្ឆិកា ឆ្នាំ២០១៨ តាមបណ្តោយផ្លូវ៥១…
រាជធានីភ្នំពេញ ៖ បុរសម្នាក់ជិះកង់ទៅហាត់ប្រាណ រួចជិះកង់ត្រឡប់ទៅផ្ទះវិញ ខណៈផ្លូវកំពុងតែស្ទះចរាចរណ៍ក៏បានឈប់បណ្តើរកង់ ស្រាប់តែខ្យល់គដួលស្លាប់ផ្អើលសមត្ថកិច្ចចុះមកដល់កន្លែងកើតហេតុកាលពីម៉ោង៥និង៣០នាទីល្ងាច ថ្ងៃទី២៧ ខែវិច្ឆិកា ឆ្នាំ២០១៨ តាមបណ្តោយផ្លូវ៥១ នៅចំណុចមុខក្រសួងរ៉ែនិងថាមពល ស្ថិតក្នុងភូមិ៥ សង្កាត់ផ្សារថ្មី៣ ខណ្ឌដូនពេញ ។
ជនរងគ្រោះខាងលើមានឈ្មោះ គេត ចាន់ថន ភេទប្រុស អាយុ៣៨ឆ្នាំ ស្នាក់នៅម្តុំវត្តកោះ សង្កាត់បឹងរាំង ខណ្ឌដូនពេញ ។
តាមសាក្សីឃើញហេតុការណ៍បានឱ្យដឹងថា មុនកើតហេតុគេបានឃើញបុរសខាងលើជិះកង់ពណ៌លឿងមួយគ្រឿងទៅហាត់ប្រាណ ដោយពាក់ពួកសុវត្ថិភាពត្រឹមត្រូវ រហូតដល់ម៉ោងកើតហេតុគាត់ជិះកង់ត្រឡប់ទៅផ្ទះវិញ ដោយធ្វើដំណើរតាមបណ្តោយផ្លូវ៥១ពីជើងទៅត្បូង មកដល់ចំណុចកើតហេតុផ្លូវកំពុងតែស្ទះចរាចរណ៍ ដោយសារតែផ្លូវ៥១កែងផ្លូវ១៥៤កំពុងតែជាប់ស្តុប ។
សាក្សីបន្តថា ពេលនោះទើបជនរងគ្រោះគាត់ឈប់ជិះកង់ចុះបណ្តើរកង់ ខណៈកំពុងតែបណ្តើរកង់ ស្រាប់តែជនរងគ្រោះដួលដេកនៅតាមចិញ្ចើមផ្លូវមុខក្រសួងរ៉ែ និងថាមពល ភ្លាមៗនោះដែរ សន្តិសុខរួមនឹងអ្នកជិតខាងនាំគ្នាជួយសង្គ្រោះ និងជួយហៅរថយន្តសង្គ្រោះមកដឹកយកទៅសង្គ្រោះ តែជាអកុសលពេលដែលរថយន្តសង្គ្រោះមកដល់ជនរងគ្រោះដាច់ខ្យល់ស្លាប់បាត់ទៅហើយ ។
សមត្ថកិច្ចមកដល់បានឆែកឆេរខ្លួនជនរងគ្រោះ ដើម្បីរកអត្តសញ្ញាណសាច់ញាតិបងប្អូន ប៉ុន្តែជនរងគ្រោះមិនមានអីជាប់ខ្លួននោះទេ មានតែថ្នាំមួយកញ្ចប់តែប៉ុណ្ណោះ សង្ស័យគាត់មានជំងឺលើសឈាម និងជំងឺគាំងបេះដូងបានជាដាក់ថ្នាំជាប់ខ្លួនយ៉ាងនេះ ។ ក្រោយកើតហេតុមានសារព័ត៌មានផ្សព្វផ្សាយ មានបុរសម្នាក់ស្គាល់ក៏ទៅហៅក្រុមគ្រួសារសាច់ញាតិមកកន្លែងកើតហេតុ រួចដឹកយកសពយកទៅធ្វើបុណ្យតាមប្រពៃណី៕
ចែករំលែកព័តមាននេះ