ខេត្តតាកែវ ៖ ដើម្បីអបអរសាទរ ទិវានារីអន្តរជាតិ ៨មីនា ក្រោមប្រធានបទ «ទេសចរណ៍រីកលូតលាស់ក្នុងសន្ដិភាព» នៅថ្ងៃអាទិត្យ ទី០៨ ខែមិនា…
ខេត្តតាកែវ ៖ ដើម្បីអបអរសាទរ ទិវានារីអន្តរជាតិ ៨មីនា ក្រោមប្រធានបទ «ទេសចរណ៍រីកលូតលាស់ក្នុងសន្ដិភាព» នៅថ្ងៃអាទិត្យ ទី០៨ ខែមិនា ឆ្នាំ២០២៦ ក្រសួងទេសចរណ៍ សហការជាមួយ រដ្ឋបាលខេត្តតាកែវ រៀបចំ ព្រឹត្តិការណ៍ជិះកង់ (ភ្នំពេញ-តាកែវ) ដែលមានការចូលរួមពីរក្រុមកីឡាករអត្តពលិក ខ្មែរ និងជនបរទេស ប្រមាណជិត ១០០០កង់ ដង្ហែរជាក្បួនជិះ មកកាន់តំបន់ទេសចរណ៍ប្រវត្តិសាស្ត្រ ប្រាសាទភ្នំជីសូរ្យ ប្រាសាទសែនភូវាំង និងប្រាសាទសែនត្មុល ស្ថិតនៅឃុំរវៀង ស្រុកសំរោង ខេត្តតាកែវ និងបញ្ចប់នៅក្រុងដូនកែវ។
លោក ហួត ហាក់ រដ្ឋមន្ត្រីក្រសួងទេសចរណ៍ និង លោក វ៉ី សំណាង អភិបាល នៃគណៈអភិបាលខេត្តតាកែវ បានអញ្ជើញទទួលស្វាគមន៍បងប្អូនក្រុមកីឡាករដោយផ្ទាល់នៅជើងភ្នំជីសូរ្យ។
ក្នុងព្រឹត្តិការណ៍ ជិះកង់ ខាងលើនេះ ក៏មានការចែកជាសម្ភារៈសិក្សាដល់សិស្សានុសិស្សដែលខ្វះខាត និងបន្តដំណើរមកជួបជុំគ្នាពិសារ «បបរបង្កង និងពងទាកូន» ដែលជាអាហារដ៏ល្បីល្បាញប្រចាំខេត្តតាកែវ ផងដែរ ។
សូមបញ្ជាក់ថា ព្រឹត្តិការជិះកង់រយៈចម្ងាយ ៧៨គីឡូម៉ែត្រនេះ គឺក្នុងបំណងបង្ហាញពីរការអបអរសាទរទិវានារីអន្តរជាតិ ៨ មីនា ចូលរួមផ្សព្វផ្សាយ សក្តានុពលទេសចរណ៍ខេត្តតាកែវ ពិសេសតំបន់ប្រាសាទភ្នំជីសូរ្យ និងបង្ហាញពីស្មារតីសាមគ្គីភាព និងអរគុណដល់ «សន្តិភាព» ដែលអនុញ្ញាតឱ្យយើងមានឱកាសរៀបចំព្រឹត្តិការណ៍ដ៏អស្ចារ្យបែបនេះ៕
ចែករំលែកព័តមាននេះ