មនុស្សជាច្រើនពាន់នាក់កាលពីថ្ងៃទី១៨ មិថុនា បាននាំគ្នាធ្វើបាតុកម្មនៅកណ្តាលក្រុងសាវ ប៉ូឡូ ទីក្រុងសេដ្ឋកិច្ចរបស់ប្រេស៊ីល ជាបាតុកម្មលើកទី៦ រយៈពេល១០ថ្ងៃ សំដៅតវ៉ាប្រឆាំងនឹងការបង្កើនតម្លៃនៃការដឹកជញ្ជូន ។មុននេះមានបាតុកម្មមួយប្រមូលផ្តុំមនុស្ស៦៥.០០០នាក់នៅទីក្រុងនាភាគខាងត្បូងប្រទេសនេះ ហើយមានមនុស្សសរុប២៥០.០០០នាក់ ធ្វើបាតុកម្មក្នុងទីក្រុងឯទៀតៗរបស់ប្រេស៊ីល ។ បាតុកម្មទាំងនេះជាបាតុកម្មធំបំផុតនៅប្រេស៊ីលចាប់តាំងពី២០ឆ្នាំមកហើយ ។
នៅក្រុងសាវ ប៉ូឡូ ដែលសំបុត្រជិះរថយន្តក្រុងត្រូវបានតម្លើងពី៣REAIS ដល់ ៣,២០REAIS នោះពួកបាតុករទាមទារឱ្យលុបចោលការតម្លើងថ្លៃនោះរហូតដល់ជិះមិនបាច់បង់ប្រាក់សម្រាប់ការដឹកជញ្ជូនសាធារណៈ ។អភិបាលក្រុងសាវ ប៉ូឡូ លោកហ្វ័រណានដូ ហាដដាដ កាលពីថ្ងៃទី១៨ មិថុនា បានយល់ព្រមពិនិត្យឡើងវិញលើតម្លៃដឹកជញ្ជូន ក្រោយកិច្ចប្រជុំមួយជាមួយបណ្តាតំណាងចលនាតវ៉ាទាមទារកុំយកប្រាក់សម្រាប់ការដឹកជញ្ជូនសាធារណៈ ។
ចលនាតវ៉ានោះបានគំរាមបន្តបាតុកម្មរហូតដល់លុបចោលការតម្លើងថ្លៃដឹកជញ្ជូន ។ ក្រុង PORTO ALEGRE និងក្រុង RECIFE ព្រមទាំងទីក្រុងប្រេស៊ីលធំៗដទៃទៀតក៏ប្រកាសផងដែរ កាលពីថ្ងៃទី១៨ មិថុនា កាត់បន្ថយតម្លៃនៃការដឹកជញ្ជូនសាធារណៈ បន្ទាប់ពីបាតុកម្មនានាមក ៕
ចែករំលែកព័តមាននេះ