សម្តេចនាយករដ្ឋមន្រ្តី ហ៊ុន សែន កាលពីថ្ងៃទី១៧ មិថុនា ២០១៣ បានចុះហត្ថលេខាលើសារាចរណែនំាស្តីពីការប្រគល់ភារកិច្ចជូនអភិបាលនៃគណៈអភិបាលរាជធានី ខេត្ត ជួយសម្របសម្រួលការគ្រប់គ្រងរោងចក្រ សហគ្រាស ដែលស្ថិតនៅក្នុងភូមិសាស្រ្តរាជធានី ខេត្ត ។
សារាចរណែនំារបស់រាជរដ្ឋាភិបាលកម្ពុជា ដែលត្រូវបានផ្សព្វផ្សាយដល់អ្នកកាសែតនៅថ្ងៃទី១៩ មិថុនានេះ មានអត្ថន័យជាអាទិ៍ថា ដើម្បីបន្តពង្រឹងការអភិវឌ្ឍវិស័យកម្មន្តសាល ឲ្យមានការរីកចម្រើនលូតលាស់ទៅគ្រប់រាជធានី ខេត្ត សំដៅជំរុញការអភិវឌ្ឍសេដ្ឋកិច្ច និងដោះស្រាយការងារជូនប្រជាពលរដ្ឋនៅជិតលំនៅឋានបានល្អប្រសើរ រាជរដ្ឋាភិបាលប្រគល់ភារកិច្ចជូនអភិបាលនៃគណៈអភិបាលរាជធានី ខេត្ត ជួយសម្របសម្រួលការគ្រប់គ្រងរោងចក្រ សហគ្រាស ដែលស្ថិតនៅក្នុងភូមិសាស្រ្តរាជធានី ខេត្ត ដូចតទៅ៖
០១- អភិបាលរាជធានី ខេត្ត ត្រូវបន្តបង្កលក្ខណៈងាយស្រួល និង ជួយឧបត្ថម្ភគំាទ្រដល់រោងចក្រ សហគ្រាស គ្រឹះស្ថាន ក្នុងដំណើរការផលិតកម្ម អាជីវកម្ម ដែលស្ថិតនៅភូមិសាស្រ្តរបស់ខ្លួនឲ្យបានល្អ ។
០២-អភិបាលរាជធានី ខេត្ត មានសិទ្ឋិអញ្ជើញនាយករោងចក្រ សហគ្រាស គ្រឹះស្ថាន ផលិតកម្ម អាជីវកម្ម ដែលស្ថិតនៅភូមិសាស្រ្តរបស់ខ្លួន ដើម្បីពិភាក្សាការងារដែលពាក់ព័ន្ឋនឹងសមត្ថកិច្ច ។
០៣-អភិបាលរាជធានី ខេត្ត ដោយមានមន្ទីរជំនាញជាសេនាធិការ អាចធ្វើអធិការកិច្ចតាមការចំាបាច់ចំពោះរោងចក្រ សហគ្រាស គ្រឹះស្ថាន ផលិតកម្ម អាជីវកម្ម និង ចាត់វិធានការតាមច្បាប់ជាធរមាន ។
០៤-នាយករោងចក្រ សហគ្រាស គ្រឹះស្ថាន ផលិតកម្ម អាជីវកម្ម ត្រូវមានទំនាក់ទំនងសហការឲ្យបានល្អជាមួយអភិបាលរាជធានី ខេត្ត និង អាជ្ញាធរដែនដី ដែលរោងចក្រ សហគ្រាស គ្រឹះស្ថាន ផលិតកម្ម អាជីវកម្ម បោះទីតំាង ។
០៥-ក្នុងករណីមានវិវាទការងារ កូដកម្ម បាតុកម្ម អភិបាលរាជធានី ខេត្ត និង ជាប្រធានគណៈបញ្ជាការឯកភាពរាជធានី ខេត្ត ត្រូវចាត់វិធានការដោះស្រាយតាមបទប្បញ្ញត្តិជាធរមាន ជាពិសេសតាមបទបញ្ជាលេខ០៣ បប ស្តីពីការរក្សាការពារ សន្តិសុខ សណ្តាប់ធ្នាប់សាធារណៈ នៅតាមរោងចក្រ សហគ្រាស និង តំបន់ឧស្សាហកម្ម ។
គ្រប់ក្រសួងស្ថាប័ន រាជធានី ខេត្ត ត្រូវអនុវត្តន៏សារាចរណែនំានេះឲ្យមានប្រសិទ្ឋភាព ៕
ចែករំលែកព័តមាននេះ