ADផ្ទាំងផ្សព្វផ្សាយពាណិជ្ជកម្ម

ជនសង្ស័យ ២នាក់ ជិះម៉ូតូដេញគាបប្លន់ម៉ូតូ ១គ្រឿង មិនបានសម្រេចធាក់ផ្តួលរងរបួសធ្ងន់១ ស្រាល១

12 ឆ្នាំ មុន

១៩ ខែ មិថុនា ឆ្នាំ ២០១៣ ម៉ោង ០២:៣៨

រាជធានីភ្នំពេញ ៖ ជនសង្ស័យ ២នាក់ ជិះម៉ូតូម៉ាកSL ពណ៌ស ១គ្រឿង អត់ចាំស្លាកលេខ បានបើកដេញគាបប្លន់ម៉ូតូស្មាស់វី ពណ៌ខ្មៅ ១គ្រឿង ពាក់ស្លាកលេខ កណ្តាល 1O-0617 ជិះដោយយុវជន ២នាក់ កាលពីវេលាម៉ោង ២ និង ០៥នាទី យប់រំលងអាធ្រាត្រឈានចូលថ្ងៃទី១៩ មិថុនា ២០១៣ នៅតាមបណ្តោយផ្លូវសហព័ន្ធរុស្ស៊ី ក្នុងភូមិក្បាលដំរី សង្កាត់កាកាប ខណ្ឌពោធិ៍សែនជ័យ ។

តាមប្រភពព័ត៌មាន បានឱ្យដឹងថា យុវជន ២នាក់ ខាងលើ បានធ្វើដំណើរតាមបណ្តោយផ្លូវសហព័ន្ធរុស្ស៊ី គោលបំណងទៅស្រុកកណ្តាលស្ទឹង លុះមកដល់ផ្លូវម៉ៃដា ក៏ស្រាប់តែលេចជនសង្ស័យ ២នាក់ ជិះម៉ូតូ ១គ្រឿង ដេញតាមបង្ខំឱ្យឈប់ តែពួកគេមិឈប់ក៏បើករហូតដល់រង្វង់មូលចោមចៅ រួចបកត្រលប់ក្រោយវិញ លុះមកដល់ចំណុចមុខព្រលានយន្តហោះ ដោយតាមគាបប្លន់យកម៉ូតូមិនបាន ជនសង្ស័យក៏បានធាក់ផ្តួលម៉ូតូជនរងគ្រោះឱ្យដួលរងការខូចខាតខ្ទេចមួយកំណាត់មុខ និងបណ្តាលឱ្យយុវជនម្នាក់របួសធ្ងន់ និងម្នាក់របួសស្រាល ។

យុវជនរងរបួសធ្ងន់ឈ្មោះ ប៊ុន សំបូរ អាយុ ២១ឆ្នាំ ជានិស្សិត មានទីលំនៅក្នុងភូមិកំពង់ទួល ស្រុកកណ្តាលស្ទឹង ខេត្តកណ្តាល ចំណែកម្នាក់ទៀតមិនបានប្រាប់ឈ្មោះទេ ជានិស្សិតដូចគ្នា ស្នាក់នៅម្តុំពេទ្យរុស្ស៊ី ។ ក្រោយកើតហេតុ ជនរងគ្រោះត្រូវរថយន្តសាមុយដឹកយកទៅសង្រ្គោះនៅគ្លីនិកឯកជន ឯម៉ូតូត្រូវយុវជនរងរបួសស្រាលដឹកតាមរ៉ឺម៉កម៉ូតូយកទៅផ្ទះរបស់ខ្លួន ៕