កិច្ចប្រជុំកំពូលរបស់ប្រទេសមហាឧស្សាហកម្មទាំង៨ ហៅក្រុម G-8 បានចាប់ផ្តើមកាលពីថ្ងៃទី១៧ មិថុនា នៅទីក្រុង LOUGH ERNE អៀរឡង់ខាងជើង ដោយកិច្ចប្រជុំនេះផ្តោតសំខាន់លើបញ្ហាស៊ីរីផងដែរ ។បណ្តាមេដឹកនាំរបស់ G-8 អះអាងកាលពីថ្ងៃទី១៧ មិថុនា ពីឆន្ទៈបន្តគម្រោងនៃសន្និសីទសន្តិភាព ស្តីពីស៊ីរី ទោះបីមានការខ្វែងគំនិតគ្នាខ្លាំងរវាងពួកលោកខាងលិច និងរុស្ស៊ី នាថ្ងៃដំបូងនៃកិច្ចប្រជុំកំពូលនេះក៏ដោយ ។
ក្រោយការជួបទល់មុខគ្នាលើកដំបូងចាប់តាំងពី១ឆ្នាំមកហើយ ប្រធានាធិបតីអាមេរិកលោកបារ៉ាក់អូបាម៉ា និងសមភាគីរុស្ស៊ី លោកវ៉្លាឌីមៀរពូទីន អះអាងថា លោកទាំង២ពុំបោះបង់ចោលគំនិតបើកធ្វើសន្និសីទនោះហៅហ្សឺណែវទី២ឡើយ ។លោកអូបាម៉ា និងលោកពូទីន មានឥរិយាបថហាក់ដូចជាតានតឹង ដោយពុំញញឹមដាក់កាមេរ៉ាឡើយ ក្រោយការជួបពិភាក្សាគ្នា១ម៉ោងក្នុងសាឡុងទំនើបមួយនៃប្លុកសណ្ឋាគារក្រុង LOUGH ERNE ដែលទទួលរៀបចំកិច្ចប្រជុំកំពូល G-8 រហូតដល់ថ្ងៃទី១៨ មិថុនា ។
ភាពតានតឹងនេះមកពីលោកពូទីនពុំព្រមបោះបង់ចោលជំហរម៉ឺងម៉ាត់របស់លោកចំពោះបញ្ហាស៊ីរី។ ភាពតានតឹងនេះក៏អាចប៉ះពាល់ដល់ការជួបគ្នាទ្វេភាគីឯទៀតៗរវាងលោកពូទីន និងបណ្តាសមភាគីរបស់លោក ។ នាយករដ្ឋមន្ត្រីកាណាដាលោក STEPHEN HARPER មុនកិច្ចប្រជុំកំពូលនេះនិយាយថា បើលោកពូទីនមិនផ្លាស់ប្តូរជំហរទេ នោះយើងនឹងពុំមានជំហររួមមួយជាមួយលោកឡើយនៅ G-8 ។ កិច្ចប្រជុំកំពូល G-8 នៅអង់គ្លេសនេះក៏ផ្តោតជាពិសេសលើការចរចាផ្លូវការដើម្បីឱ្យទទួលបានកិច្ចព្រមព្រៀងផ្លាស់ប្តូរសេរីមួយរវាងសហភាពអឺរ៉ុប និងសហរដ្ឋអាមេរិក ៕
ចែករំលែកព័តមាននេះ