រាជធានីភ្នំពេញ ៖ ដីកាកោះរបស់លោក គឺ ប៊ុណ្ណារ៉ា ព្រះរាជអាជ្ញារងអមសាលាដំបូងរាជធានីភ្នំពេញ កាលពីថ្ងៃទី១៧ មិថុនា បានឱ្យស្ត្រីឈ្មោះ ជា គឹមឡាយ និងបុរសម្នាក់ឈ្មោះ ង៉ោល ចូលបំភ្លឺតាមបណ្តឹងលោក ឃុន ដូរ៉េ កូនលោក ឃុន រ៉ាន់ ប្រធានសាខាគយ និងរដ្ឋាករខេត្តកំពង់ចាម ដែលបានចោទប្រកាន់អតីតសង្សារ និងបុរសម្នាក់ថាប្លន់យកគ្រឿងអលង្ការសរុបជាទឹកប្រាក់ជាង២
រាជធានីភ្នំពេញ ៖ ដីកាកោះរបស់លោក គឺ ប៊ុណ្ណារ៉ា ព្រះរាជអាជ្ញារងអមសាលាដំបូងរាជធានីភ្នំពេញ កាលពីថ្ងៃទី១៧ មិថុនា បានឱ្យស្ត្រីឈ្មោះ ជា គឹមឡាយ និងបុរសម្នាក់ឈ្មោះ ង៉ោល ចូលបំភ្លឺតាមបណ្តឹងលោក ឃុន ដូរ៉េ កូនលោក ឃុន រ៉ាន់ ប្រធានសាខាគយ និងរដ្ឋាករខេត្តកំពង់ចាម ដែលបានចោទប្រកាន់អតីតសង្សារ និងបុរសម្នាក់ថាប្លន់យកគ្រឿងអលង្ការសរុបជាទឹកប្រាក់ជាង២ម៉ឺនដុល្លារសហរដ្ឋអាមេរិក ខណៈលោក ឃុន ដូរ៉េ មិនទាន់ចូលខ្លួនទៅឆ្លើយបំភ្លឺលើពាក្យបណ្តឹងរបស់ឪពុកនាងអតីតសង្សារផងនោះ ។
ប្រភពព័ត៌មាននៅសាលាដំបូងរាជធានីភ្នំពេញឱ្យដឹងថា ដីកាកោះឱ្យចូលខ្លួនរបស់លោក គឺ ប៊ុណ្ណារ៉ា បានដល់ដៃសាមីខ្លួនកាលពីថ្ងៃអាទិត្យ ទី១៦ មិថុនា ឱ្យនាង ជា គឹមឡាយ និងឈ្មោះ ង៉ោល ចូលឆ្លើយបំភ្លឺនៅថ្ងៃចន្ទ ទី១៧ មិថុនា ដែលគេចាត់ទុកថាដីកាកោះនោះធ្វើឡើងតក់ក្រហល់ពេក បើទោះបីជាសំអាងលើពាក្យបណ្តឹងរបស់អ្នកណាក៏ដោយ យ៉ាងហោចណាស់សាមីខ្លួនត្រូវបានដឹងរយៈពេល១សប្តាហ៍មុន ។ ទោះជាយ៉ាងនេះក្តី នាង ជា គឹម ឡាយ នៅតែគោរពតាមអ្វីដែលតំណាងអយ្យការបានកោះហៅ ក៏ប៉ុន្តែនាងសុំពន្យារពេលមិនទាន់ចូលទេ ។
ប្រភពបន្តថា លោក ឃុន ដូរ៉េ បានប្តឹងនាង ជា គឹមឡាយ និងបុរសម្នាក់ឈ្មោះង៉ោល ថាបានប្លន់ដោះយកគ្រឿងអលង្ការពីខ្លួនដូចជា នាឡិកាដៃ១គ្រឿងមានតម្លៃ១០.០០០ដុល្លារ ចិញ្ចៀនដាំពេជ្រ១វង់តម្លៃ៥.០០០ដុល្លារ ខ្សែកមាស៥តម្លឹង និងប្រាក់៨.០០០ដុល្លារទៀត ។ ពាក្យបណ្តឹងដែលចោទប្រកាន់នាង ជា គឹមឡាយ នោះ គឺអង្គហេតុតែមួយដែលមានទំនាស់គ្នានៅមុខក្លិបកម្សាន្តស្ថិតនៅក្នុងសង្កាត់បឹងព្រលឹត ខណ្ឌ៧មករា ។ ចំពោះរឿងហេតុនេះលោក ជៀប អូឡែន ដែលត្រូវជាឪពុកនាង ជា គឹមឡាយ បានបឹ្តងលោក ឃុន ដូរ៉េ តាំងពីថ្ងៃកើតហេតុពីបទប្រើហិង្សាដោយចេតនា ធ្វើឱ្យខូចខាតទ្រព្យសម្បត្តិអ្នកដទៃ និងអំពើលួច ។
ប៉ុន្តែលោក ឃុន ដូរ៉េ បានគេចខ្លួនមិនទាន់ចូលបំភ្លឺដល់សមត្ថកិច្ចកងរាជអាវុធហត្ថ និងនៅស្ថាប័នអយ្យការអមសាលាដំបូងរាជធានីភ្នំពេញនៅឡើយ ហើយសូម្បីតែរថយន្តទំនើប១គ្រឿងម៉ាករ៉ង់រូ៉វែររបស់លោកដែលត្រូវសមត្ថកិច្ចដកហូតជាតឹកតាងនៅថ្ងៃកើតហេតុ ក៏លោក ឃុន ដូរ៉េ មិនទាន់ហ៊ានចូលទៅយកដែរ សុខចិត្តទុកឱ្យពុកចោល ដែលរថយន្តនោះមានតម្លៃរាប់ម៉ឺនដុល្លារ ។
ជាមួយនឹងការមិនចូលខ្លួនទៅសមត្ថកិច្ចនិងតុលាការអស់រយៈពេលជាច្រើនខែនោះ លោក ឃុន ដូរ៉េ បែរជារកមេធាវីប្តឹងនាង ជា គឹមឡាយ អតីតសង្សារវិញពីបទថាប្លន់យកគ្រឿងអលង្ការបញ្ច្រាសនឹងបណ្តឹងរបស់ឪពុកនាង ។
សំណុំរឿងឪពុកនាងស្ថិតនៅក្នុងដៃ លោកស្រី សឺុ វណ្ណនី ព្រះរាជអាជ្ញារងអមសាលាដំបូងរាជធានីភ្នំពេញកំពុងចាត់ការ ហើយនៅរង់ចាំលោក ឃុន ដូរ៉េ ចូលខ្លួនបែរជាលោក ឃុន ដូរ៉េ ដាក់ពាក្យបណ្តឹងតបវិញ ។ លោកស្រីព្រះរាជអាជ្ញារងកាន់សំណុំរឿងនោះបានបញ្ជាក់ថា លោកស្រីនឹងចេញដីកាកោះឱ្យចូលម្តងទៀតនៅពេលឆាប់ៗនេះ ហើយបើលោក ឃុន ដូរ៉េ នៅតែមិនចូលទេ លោកស្រីនឹងចាត់បញ្ជូនទៅចៅក្រមស៊ើបសួរតាមនីតិវិធីច្បាប់ ចៀសវាងធ្វើឱ្យខូចប្រយោជន៍ដល់ជនរងគ្រោះ ៕
ចែករំលែកព័តមាននេះ