រាជធានីភ្នំពេញ ៖ នៅចំពោះមុខលោកជំទាវអគ្គនាយិកាអង្គការយូណេស្កូ លោកឧបនាយករដ្ឋមន្ត្រី ហោ ណាំហុង រដ្ឋមន្ត្រីក្រសួងការបរទេស និងសហប្រតិបត្តិការអន្តរជាតិ បានអះអាងជាថ្មីថា កម្ពុជាសន្យាស្វែងរកការដោះស្រាយដោយសន្តិវិធី និងមិត្តភាពជាមួយប្រទេសថៃទាក់ទងនឹងរឿងប្រាសាទព្រះវិហារ បើទោះជាសំណុំរឿងកំពុងស្ថិតនៅតុលាការយុតិ្តធម៌អន្តរជាតិ (ICJ) ក៏ដោយ ។
លោកឧបនាយករដ្ឋមន្ត្រី ហោ ណាំហុង បានមានប្រសាសន៍បែបនេះក្នុងឱកាសទទួលជួបពិភាក្សាការងារមួយចំនួនជាមួយលោកជំទាវ អុីរីណាបូកូវ៉ា អគ្គនាយិកាអង្គការយូណេស្កូ កាលពីថ្ងៃថ្ងៃទី១៧ មិថុនា នៅទីស្តីការក្រសួងការបរទេស។ ឆ្លើយនឹងសំណួររបស់លោកជំទាវ អុីរីណាបូកូវ៉ា ដែលសួរថា តើកម្ពុជាដោះស្រាយយ៉ាងដូចម្តេចជាមួយប្រទេសថៃទាក់ទងនឹងទំនាស់នៅប្រាសាទព្រះវិហារនោះ ? លោកឧបនាយករដ្ឋមន្ត្រី ហោ ណាំហុង បានបញ្ជាក់ជាថ្មីថា កម្ពុជាសន្យាស្វែងរកដំណោះស្រាយដោយសន្តិវិធី និងមិត្តភាពជាមួយប្រទេសថៃ ដើម្បីដោះស្រាយរាល់ទំនាស់ដែលទាក់ទងនឹងប្រាសាទព្រះវិហារ បើទោះជាសំណុំរឿងនេះស្ថិតក្នុងដៃ ICJ ក៏ដោយ។
ថ្នាក់ដឹកនាំកម្ពុជាគឺសម្តេចតេជោ ហ៊ុន សែន និងថ្នាក់ដឹកនាំថៃគឺលោកជំទាវ យីងឡាក់ ស៊ីណាវ៉ាត្រា បានសម្រេចជាមួយគ្នា ហើយថា នឹងបន្តដោះស្រាយបញ្ហានោះដោយសន្តិវិធី និងមិត្តភាព ទោះបីជាតុលាការយុត្តិធម៌អន្តរជាតិទីក្រុងឡាអេធ្វើការសម្រេចយ៉ាងណាក៏ដោយចុះ។ ទន្ទឹមនោះ ភាគីទាំងពីរក៏បានឯកភាពថានឹងអនុវត្តតាមការសម្រេចរបស់តុលាការក្រុងឡាអេផងដែរ ។ ជាក់ស្តែង រហូតមកដល់ពេលនេះ កម្ពុជានិងថៃបានបន្តភាពស្ងប់ស្ងាត់តាមខ្សែបន្ទាត់ព្រំដែននៃប្រទេសទាំងពីរ ព្រមទាំងបង្កឱកាសឱ្យប្រជាពលរដ្ឋទាំងសងខាងប្រកបមុខរបរដោះស្រាយជីវភាពដោយភាពសុខដុមរមនាថែមទៀត ។
នាឱកាសនោះ លោកជំទាវ អុីរីណា បូកូវ៉ា អគ្គនាយិកាអង្គការយូណេស្កូ ក៏បានស្នើសុំប្រទេសកម្ពុជាជួយលើកសំណើទៅមហាសន្និបាតអង្គការសហប្រជាជាតិ បើកការពិភាក្សា និងសម្រេចរបៀបវារៈស្តីពីវប្បធម៌ចីរភាព និងការអភិវឌ្ឍដែលជាគំនិតផ្តួចផ្តើមរបស់លោកជំទាវ។ ការស្នើសុំនោះត្រូវបានគាំទ្រដោយលោកឧបនាយករដ្ឋមន្ត្រី ហោ ណាំហុង ផងដែរ ព្រោះការលើកឡើងរបស់លោកជំទាវដូចគ្នានឹងទស្សនវិស័យរបស់សម្តេចតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា ដែលបានលើកឡើងក្នុងកិច្ចប្រជុំលើកទី៣៧ នៃគណៈកម្មាធិការបេតិកភណ្ឌពិភពលោកដែលបានសង្កត់ធ្ងន់លើការអភិវឌ្ឍប្រកបដោយចីរភាពនូវវប្បធម៌ និងបេតិកភណ្ឌ ខណៈដែលភ្ញៀវទេសចរមកទស្សនាកម្ពុជាកាន់តែមានចំនួនកើនឡើងគួរឱ្យកត់សម្គាល់ ។
លោកជំទាវអគ្គនាយិកាអង្គការយូណេស្កូ ក៏បានថ្លែងនូវការអបអរសាទរយ៉ាងកក់ក្តៅចំពោះការសម្រេចរបស់រាជរដ្ឋាភិបាលកម្ពុជា ដែលស្វះស្វែងរកដំណោះស្រាយដោយសន្តិវិធី និងមិត្តភាពជាមួយថៃលើទំនាស់នៅប្រាសាទព្រះវិហារ ហើយនោះក៏ជាទិសដៅរបស់អង្គការយូណេស្កូផងដែរក្នុងការរក្សា និងអភិវឌ្ឍន៍បេតិកភណ្ឌពិភពលោកនៅគ្រប់វិស័យ និងគ្រប់ទីកន្លែងទាំងអស់ក្នុងសកលលោក ៕
ចែករំលែកព័តមាននេះ