ខេត្តបាត់ដំបង ៖ បុរសម្នាក់រងរបួសធ្ងន់ ដោយសារត្រូវរថយន្តសណ្តោងស៊ីទែនដឹកកៅស៊ូជ្រុលបុក កាលពីវេលាម៉ោង១២និង៤០នាទីរសៀល ថ្ងៃទី១៧ មិថុនា នៅលើកំណាត់ផ្លូវជាតិលេខ៥៧ ត្រង់ចំណុចផ្លូវបែកជាបួនក្នុងភូមិវត្តគរ សង្កាត់វត្តគរ ។សមត្ថកិច្ចនិយាយថា ជនរងគ្រោះឈ្មោះ ប៉ែន សារិត ភេទប្រុស អាយុ៤៤ឆ្នាំ នៅភូមិជ្រៃធំ ឃុំកំពង់ល្ពៅ ស្រុកសំឡូត ជិះម៉ូតូមា៉កហុងដាឌ្រីមសេ១២៥ ពណ៌ខ្មៅ សេ៊រីឆ្នាំ២០០៥ ពាក់ស្លាកលេខបាត់ដំបង 1G-1886 ឯរថយន្តសណ្តោងស៊ីទែនដឹកកៅស៊ូ ពាក់ស្លាកលេខភ្នំពេញ 2A-6519 បើកបរដោយបុរសឈ្មោះ ឌិន ដា អាយុ៣៦ឆ្នាំ រស់នៅរាជធានីភ្នំពេញ ។
សមត្ថកិច្ចបញ្ជាក់ថា មុនពេលកើតហេតុរថយន្តធ្វើដំណើរពីកើតទៅលិច ហើយបានជ្រុលបុកម៉ូតូដែលកំពុងព្យាយាមជិះឆ្លងកាត់ទទឹងផ្លូវពីជើងទៅត្បូង បណ្តាលឱ្យអ្នកជិះម៉ូតូរងរបួសធ្ងន់ និងអូសម៉ូតូជាង២០ម៉ែត្រ ។សាក្សីនៅកន្លែងកើតហេតុនិយាយថា ឧប្បត្តិហេតុនេះកើតឡើងដោយសារភាគីទាំង២បើកបរក្នុងល្បឿនលឿនដូចគ្នា និងខ្វះការប្រុងប្រយ័ត្នទើបជ្រុលបុកគ្នាបែបនេះ ។ សាក្សីបញ្ចាក់ថា អ្នកជិះម៉ូតូទំនងជារងរបួសគ្រេចចង្កេះធ្ងន់ធ្ងរមិនអាចកំរើក ឬងើបរួចឡើយ ត្រូវរថយន្តសង្គ្រោះដឹកបញ្ជូនទៅកាន់មន្ទីរពេទ្យភ្លាមៗ ។ អ្នកបើករថយន្តលោក ឌិន ជា បានពន្យល់អំពីករណីនេះនៅកន្លែងកើតហេតុថា រថយន្តរបស់លោកគ្មានដឹកកៅស៊ូទេ បានធ្វើដំណើរពីភ្នំពេញដើម្បីទៅដឹកកៅស៊ូនៅក្រុងប៉ោយប៉ែត លុះមកដល់ចំណុចក៏ជួបគ្រោះថ្នាក់តែម្តង ។តាមការពិនិត្យនៅចំណុចគ្រោះថ្នាក់ ភាគីទាំង២មានកំហុសដូចគ្នា ព្រោះបើកបរខ្វះការប្រុងប្រយ័ត្ន ។ រថយន្តនិងម៉ូតូត្រូវនគរបាលយកទៅរក្សាទុកនៅការិយាល័យជំនាញ រង់ចាំភាគីទាំង២ចូលទៅដោះស្រាយតាមផ្លូវច្បាប់ ៕
ចែករំលែកព័តមាននេះ