ADផ្ទាំងផ្សព្វផ្សាយពាណិជ្ជកម្ម

ក្រុមបាតុករ 39 នាក់រងរបួសក្នុងអំឡុងពេលធ្វើបាតុកម្មនៃការប្រកួត Confederations Cup នៅប្រេស៊ីល

12 ឆ្នាំ មុន

១៧ ខែ មិថុនា ឆ្នាំ ២០១៣ ម៉ោង ០៣:៣៥

យ៉ាងហោចណាស់បាតុករចំនួន៣៩នាក់រងរបួសធ្ងន់-ស្រាល និង៣០នាក់ផ្សេងទៀតត្រូវប៉ូលិសចាប់ខ្លួនក្នុងអំឡុងពេលធ្វើបាតុកម្មនៅខាងក្រៅបរិវេណពហុកីឡដ្ឋាន Maracana ក្នុងទីក្រុង Rio de Janeiro ប្រទេសប្រេស៊ីល កាលពីថ្ងៃអាទិត្យ ទី១៦ មិថុនា ឆ្នាំ២០១៣ ខណៈពេលដែលប្រទេសនេះកំពុងបើកការប្រកួតពានរង្វាន់ Confederations Cup ។

បាតុករប្រមាណ ៣០០០នាក់ បានប្រមូលផ្ដុំគ្នានៅខាងក្រៅពហុកីឡដ្ឋានជាតិដោយស្រែកតវ៉ាបញ្ចេញកំហឹងរបស់ពួកគេចំពោះការចំណាយលុយដ៏ច្រើនលើសលុបរបស់រដ្ឋាភិបាលទៅលើការជួសជុលកែលម្អ-កសាងពហុកីឡដ្ឋាននិងហេដ្ឋារចនាសម្ព័ន្ធសម្រាប់ត្រៀមរៀបចំការប្រកួតបាល់ទាត់ពិភពលោកឆ្នាំ២០១៤ ។ អ្នកចូលរួមធ្វើបាតុកម្មបាននិយាយថា ពួកយើងមិនត្រូវការប្រកួតបាល់ទាត់ពិភពលោកនោះទេ យើងត្រូវការថវិកាសម្រាប់ចំណាយទៅលើវិស័យសុខាភិបាល និងអប់រំជំនួសវិញ ។

ដើម្បីរក្សាសណ្ដាប់ធ្នាប់ និងសន្ដិសុខសម្រាប់ការប្រកួត Confederations Cup ក្នុងនាមជាម្ចាស់ផ្ទះ ក្រុមប៉ូលិសរដ្ឋាភិបាលរបស់ប្រទេសប្រេស៊ីលបានសម្រេចចិត្តប្រើប្រាស់ឧស្ម័នបង្ហូរទឹកភ្នែក និងកាំភ្លើងគ្រាប់ជ័របាញ់ទៅលើបាតុករបណ្ដាលឱ្យពួកគេរងរបួសធ្ងន់-ស្រាលចំនួន៣៩នាក់ និងមួយចំនួនទៀតត្រូវចាប់ខ្លួន ។
គួររំលឹកដែរថា ម្ចាស់ផ្ទះប្រេស៊ីលបាននឹងកំពុងចំណាយលុយយ៉ាងច្រើនសន្ធឹកសន្ធាប់សម្រាប់ត្រៀមរៀបចំការប្រកួតបាល់ទាត់ ពានរង្វាន់សំខាន់ៗចំនួន២គឺពានរង្វាន់Confederations Cup និងបាល់ទាត់ពិភពលោកឆ្នាំ២០១៤ ។ រហូតមកដល់ពេលនេះប្រទេសប្រេស៊ីលបានចំណាយលុយជាង១៥ពាន់លានដុល្លារ ហើយគ្រោងនឹងចំណាយបន្ថែមទៀតដែលជាហេតុធ្វើឱ្យប្រជាជនទូទាំងប្រទេសមានការខឹងសម្បារយ៉ាងខ្លាំង ៕

ADផ្ទាំងផ្សព្វផ្សាយពាណិជ្ជកម្ម

អត្តបទផ្សេងៗទៀត