រាជធានីភ្នំពេញ ៖ ស្ត្រីម្នាក់បានសុំប្តីនាំប្រុសសហាយមករស់នៅក្នុងផ្ទះជាមួយទៀតដោយគំរាមប្តីថា បើមិនព្រមឲ្យប្រុសសហាយមករស់នៅជាមួយទេ ខ្លួននឹងរត់តាមប្រុសសហាយនោះ រហូតប្តីដាច់ចិត្តឲ្យនាំប្រុសសហាយមករស់នៅលើផ្ទះជាមួយហើយ បែរជាយប់ឡើងលួចទៅដេកអោបសហាយធ្វើឲ្យប្តីក្តៅចិត្តប្តឹងសមត្ថកិច្ចឱ្យចាប់ទាំងយប់ បង្កអោយមានការភ្ញាក់ផ្អើលកាលពីវេលាម៉ោង២និង៣០នាទីរំលងអាធ្រាត្រឈានចូលថ្ងៃទី ២០ខែវិច្ឆិកាឆ្នាំ២០១៨ ស្ថិតនៅផ្ទះជួល ភូមិដំណាក់ត្រយឹង សង្កាត់ចោមចៅទី២ ខណ្ឌពោធិ៍សែនជ័យ ។
បុរសជាប្តីឈ្មោះ នី សាវឿន ភេទប្រុស អាយុ៣៩ឆ្នាំ មុខរបរកម្មកររោងចក្រ ស្នាក់នៅភូមិដំណាក់ត្រយឹង សង្កាត់ចោមចៅ២ ខណ្ឌពោធិ៍សែនជ័យ មានស្រុកកំណើតនៅភូមពីងពុង ឃុំក្រាំងយ៉ូវ ស្រុកស្អាង ខេត្តកណ្ដាល។
ចំណែកស្ត្រីជាប្រពន្ធឈ្មោះ ទឹម សុណារ៉ា អាយុ៣៧ឆ្នាំ មុខរបរកម្មការិនីរោងចក្រ រស់នៅភូមិជាមួយគ្នា មានស្រុកកំណើតនៅសង្កាត់បឹងកក់២ ខណ្ឌទួលគោក មានកូនចំនួន៣នាក់ (ស្រី២នាក់ និងប្រុស១នាក់) កូនស្រីច្បងអាយុ១៥ឆ្នាំ និងកូនស្រីពៅអាយុ១១ឆ្នាំ ។
រីឯប្រុសសហាយជាបុរសពោះម៉ាយឈ្មោះ ហ៊ាប គូក អាយុ៣៤ឆ្នាំ មុខរបរកម្មកររោងចក្រ ស្នាក់នៅភូមិកើតហេតុខាងលើ មានស្រុកកំណើតនៅភូមិអំពិល ឃុំព្រះស្តេច ស្រុកព្រះស្តេច ខេត្តព្រៃវែង ។
បុរសជាប្តីបាននិយាយប្រាប់ថាគាត់មានប្រពន្ធ២លើកមកហើយ លើកទីមួយគាត់បានរៀបការត្រឹមត្រូវ តែមិនទាន់បានផ្សំដំណេកផង នារីជាប្រពន្ធនោះបានរត់ទៅនៅជាមួយប្រុសផ្សេងបាត់ ។ លុះបានប្រពន្ធក្រោយមិនបានរៀបការត្រឹមត្រូវទេ ប៉ុន្តែបានទំនាក់ទំនងស្រឡាញ់គ្នាអស់រយៈពេល១៦ឆ្នាំមកហើយ និងបង្កើតបានកូន៣នាក់ផងដែរ ព្រមទាំងបានចុះអេតាស៊ីវិលជាមួយគ្នាប្តីប្រពន្ធស្របច្បាប់ តែប្រពន្ធគាត់ហែកអេតាស៊ីវិលចោលបាត់ទៅហើយ។
ប្រភពដដែលបានបន្តទៀតថា នៅមុនពេលកើតហេតុ ប្រមាណជាង២ខែមុន ប្រពន្ធបាននិយាយរឿងប្រាប់ប្តីថា គាត់មានទំនាក់ទំនងជាមួយបុរសជាសហាយតាមរយៈហ្វេសប៊ុក និងបានសុំឲ្យប្រុសសហាយមករស់នៅជាមួយ តែប្តីមិនព្រម លុះក្រោយមកប្រពន្ធគាត់នៅតែអង្វរកច្រើនដងពេក ហើយថែមទាំងប្រាប់ថាបានទំនាក់ទំនងគ្នាស៊ីជម្រៅជាមួយគ្នាបានពីរបីដងរួចមកហើយផងដែរ ។
ស្ត្រីជាប្រពន្ធបានអង្វរប្តីសុំឲ្យសហាយមករស់នៅជាមួយក្នុងទំនាក់ទំនងជាបងប្អូនទេ ដោយសុំឲ្យសហាយរស់នៅខាងមុខផ្ទះ ព្រោះបុរសជាសហាយបាក់ចិត្តស្រលាញ់ពេក បើមិនឲ្យប្រុសសហាយនោះមករស់នៅជាមួយទេ ខ្លួននឹងរត់ទៅរស់នៅជាមួយគេហើយ ទើបគាត់ជាប្តីបានអោយមករស់នៅជាមួយបាន២ថ្ងៃ២យប់ ហើយគាត់តែងតែលួចឃ្លាំមើលរហូតយប់កើតហេតុប្រពន្ធរបស់គាត់មិនទៅដេកជាមួយគាត់ទេ បែរជាទៅដេកអោបប្រុសសហាយស្មន់ទៅវិញ រហូតធ្វើឲ្យគាត់ផ្ទុះភ្លើងប្រច័ណ្ឌបានចាក់សោផ្ទះរួចហើយបានទូរស័ព្ទប្តឹងសមត្ថកិច្ចអោយជួយអន្តរាគមន៍ឃាត់ប្រពន្ធ និងប្រុសសហាយនោះយកទៅសាកសួរភ្លាមៗផងដែរ។
បន្ទាប់ពីកើតហេតុភ្លាមៗ បុរសជាប្តីខឹងខ្លាំងពេកបានដាក់ពាក្យបណ្តឹងទាមទារសំណងជំងឺចិត្តពីប្រពន្ធ និងប្រុសជាសហាយចំនួន៣ម៉ឺនដុល្លារ តែដោយសារបុរសជាប្តីនៅតែស្រឡាញ់ប្រពន្ធ ទោះបីជាដឹងថាប្រពន្ធលួចមានសហាយក៏ដោយ ក៏នៅតែចិត្តមិនដាច់អាណិតកូននៅសិក្សា បានសម្រេចចិត្តដកពាក្យបណ្ដឹងវិញ គ្រាន់តែអោយបុរសជាសាហាយបែកចេញពីគ្រួសាររបស់គាត់ ព្រមទាំងអោយប្រពន្ធរបស់គាត់ធ្វើកិច្ចសន្យាចំពោះមុខសមត្ថកិច្ចជួយដឹងឮនៅអធិការដ្ឋានខណ្ឌពោធិ៍សែនជ័យ ៕
ចែករំលែកព័តមាននេះ