រាជធានីភ្នំពេញ ៖ មានការភ្ញាក់ផ្អើលមួយបានកើតឡើងនៅមុខវិទ្យាស្ថាន អាយអាយស៊ី ស្ថិតនៅតាមបណ្ដោយផ្លូវជាតិលេខ២ ភូមិទួលរកា សង្កាត់ចាក់អង្រែក្រោម ខណ្ឌមានជ័យ កាលពីវេលាម៉ោង១២និង២០នាទីថ្ងៃទី១៦ មិថុនា ដោយសារគ្រួសារមួយមានទំនាស់ផ្ទៃក្នុងដោះស្រាយគ្នាមិនទាន់ដាច់ស្រេចបានបើករថយន្ដដេញរករឿងគ្នាតាមដងផ្លូវ រហូតដល់មានការផ្ទុះអាវុធឡើងលើចំនួន២គ្រាប់ បង្កឱ្យមានការភ្ញាក់ផ្អើលពេញដងផ្លូវតែម្ដង ។
តាមប្រភពព័ត៌មានពីកន្លែងកើតហេតុបានឱ្យដឹងថា នៅមុនពេលកើតហេតុ គ្រួសារមួយនេះបាននាំគ្នាជិះរថយន្ដស៊េរីទំនើបម៉ាកអូឌី ពណ៌ខ្មៅ ពាក់ស្លាកលេខ ភ្នំពេញ2V-7797 ដេញឃាត់បុរសម្នាក់ដែលជិះរថយន្ដម៉ាកវីស្ដូ ពណ៌លឿង ពាក់ស្លាកលេខ ភ្នំពេញ2W-0360 ដែលជាសាច់ញាតិក្នុងគ្រួសារបំណងសួរនាំជម្រះបញ្ហា ដែលកើតមានកាលពីថ្ងៃទី១៤ មិថុនា ។
ប៉ុន្ដែពេលនោះភាគីម្ចាស់រថយន្ដវីស្ដូ មិនព្រមឈប់ដោះស្រាយគ្នាជាមួយភាគីម្ចាស់រថយន្ដម៉ាកអូឌីឡើយ ។ ខណៈពេលនោះ អ្នកបើករថយន្ដម៉ាកអូឌី ក៏បង្ខំចិត្ដបើកកៀររថយន្ដវីស្គូ បំណងឱ្យម្ចាស់រថយន្ដចុះមកនិយាយគ្នា ។ ប៉ុន្ដែពេលនោះ អ្នកបើករថយន្ដវីស្ដូនៅតែព្យាយាមបើកគេច ជាហេតុធ្វើឱ្យរថយន្ដវីស្ដូគាបជាប់នឹងទ្រូងផ្លូវ រួចក៏កើតមានការជ្រួលច្របល់ភ្លាមៗលើដងផ្លូវ រហូតមានការផ្ទុះអាវុធ២គ្រាប់បានបន្លឺឡើងផងដែរ ។
ប្រភពព័ត៌មានដដែលបានបន្ដថា មុនពេលកើតហេតុ ក្រុមអ្នកជិះរថយន្ដម៉ាកអូឌីដែលមានលោកស្រី ហែម សុជាតា អាយុ៤៥ឆ្នាំ ស្នាក់នៅបុរីពិភពថ្មី ក្នុងសង្កាត់ទឹកថ្លា ខណ្ឌសែនសុខ រួមដំណើរជាមួយកូនស្រី និងឈ្នួលបម្រើម្នាក់ ព្រមទាំងអ្នកបើកបររថយន្ដម្នាក់ទៀត បានធ្វើដំណើរត្រឡប់មកពីក្រុងតាខ្មៅ ក្នុងគោលបំណងតាមរកឈ្មោះសៀន សិលា ភេទប្រុស អាយុ៣៣ឆ្នាំ ជាអង្គរក្ស ដែលជាអ្នកបើកបររថយន្តម៉ាកវីស្ដូ ក៏ត្រូវបានជួបគ្នាដោយចៃដន្យនៅលើកំណាត់ផ្លូវជាតិលេខ២ ។
ពេលនោះក្រុមគ្រួសារលោកស្រី ហែម សុជាតា ក៏បានបើករថយន្តតាមហៅឈ្មោះ សៀន សិលា ដែលរួមដំណើរជាមួយយុវជនម្នាក់ផងដែរនោះ ឱ្យឈប់រថយន្តដើម្បីនិយាយគ្នាអំពីបញ្ហាផ្ទៃក្នុងគ្រួសារដែលបានកើតឡើង ។ ប៉ុន្ដែឈ្មោះ សៀន សិលា មិនព្រមឈប់ ក៏ចេះតែបើករថយន្តរបស់ខ្លួនរត់រហូតដល់កន្លែងកើតហេតុខាងលើ ទើបឈប់ ដោយសាររថយន្តរបស់ខ្លួនបើកគេចផ្លោះរបាំងថ្មចែកទ្រូងផ្លូវពីខាងកើតទៅខាងលិច ហើយបើកទៅមុខលែងរួច ។
នៅកន្លែងកើតហេតុ ឈ្មោះសៀន សិលា បានព្យាយាមរត់ឡើងផ្ទះអ្នកស្រុក រួចគំរាមលោតសម្លាប់ខ្លួនពីលើជាន់ទី១ ប៉ុន្តែត្រូវបានសមត្ថកិច្ចកងរាជអាវុធហត្ថឡើងទៅចាប់យកចុុះមកក្រោមវិញ រួចនាំទៅកាន់ទីបញ្ជាការកងរាជអាវុធហត្ថរាជធានីភ្នំពេញភ្លាមៗ ដើម្បីធ្វើការសាកសួរ ។ សូមបញ្ជាក់ថា មូលេហតុដែលសមត្ថកិច្ចកងរាជអាវុធហត្ថខណ្ឌមានជ័យចុះទៅជួយអន្តរាគមន៍ដល់កន្លែងកើតហេតុភ្លាមៗ ដោយសារមានកិច្ចសហការពីកងរាជអាវុធហត្ថរាជធានីភ្នំពេញ ដែលបានទទួលពាក្យបណ្តឹងពីនារីម្នាក់ឈ្មោះ យ៉ន លីននី អាយុ១៧ឆ្នាំ ជាអ្នកបម្រើនៅផ្ទះបងថ្លៃឈ្មោះ សៀន សិលា បានប្ដឹងចោទប្រកាន់ឈ្មោះ សៀន សិលា ថាបានប្រើអំពើហិង្សាលើរូបនាង បណ្តាលឱ្យមានរបួសស្នាម ។
ករណីនេះ សមត្ថកិច្ចកងរាជអាវុធហត្ថរាជធានីភ្នំពេញបានកសាងសំណុំរឿងបញ្ជូនខ្លួនឈ្មោះ សៀន សិលា ទៅតុលាការដើម្បីចាត់ការតាមច្បាប់ ។
តាមប្រភពព័ត៌មានជុំវិញរឿងរា៉ាវក្នុងគ្រួសារខាងលើនេះ លោកស្រី ហែម សុជាតា បានរៀបរាប់ប្រាប់កោះសន្តិភាពថា ឈ្មោះ សៀន សិលា ជាកូនប្រសារបស់គាត់ ប៉ុន្តែជនរូបនេះបានបង្កទំនាស់ក្នុងគ្រួសារជាញឹកញាប់រហូតក្រុមគ្រួសារមិនអាចអត់ឱនឱ្យបាន ដោយសារតែរូបគេបានវាយទៅលើឈ្មោះ យ៉ន លីននី ជាអ្នកបម្រើ ព្រោះតែការងារក្នុងផ្ទះកូនស្រីរបស់គាត់ ។
ប្រភពដដែលនេះបានបន្តថា ឈ្មោះ សៀន សិលា ក្រោយពីបានប្រើអំពើហិង្សាលើឈ្នួលក្នុងផ្ទះបងថ្លៃខ្លួនរួចហើយ ក្រុមគ្រួសារបានដាក់ពាក្យបណ្តឹងនៅអធិការដ្ឋាននគរបាលខណ្ឌសែនសុខ ហើយក៏ត្រូវនគរបាលមានបំណងចុះទៅឃាត់ខ្លួនដល់លំនៅឋានម្តងរួចមកហើយ ។ ប៉ុន្ដែពេលនោះរូបគេបានពកូនតូចអាយុជាង២ខួបគំរាមសមត្ថកិច្ចថា បើហា៊នចូលចាប់ ខ្លួនគេនឹងលោតសម្លាប់ខ្លួនពីលើផ្ទះជាន់ទី៣ ទាំងឪពុកនិងកូន ។ តែការពិតគ្រាន់តែជាស្ទីលបញ្ឆោតសមត្ថកិច្ចប៉ុណ្ណោះ ។ រឿងពិតគឺបុគ្គលរូបនេះមានគំនិតក្រឡុកក្រុមគ្រួសារស្រេចតែអំពើចិត្ត ដូចជាទូរស័ព្ទគំរាមទារប្រាក់បងថ្លៃចំនួន៥ម៉ឺនដុល្លារជាដើម ។ នេះជាការអះអាងរបស់លោកស្រី ហែម សុជាតា ។
ប្រភពដដែលបានបន្តទៀតថា កាលពីពេលថ្មីៗនេះ ក្រុមគ្រួសារទើបនឹងផ្ទេរផ្ទះល្វែងនៅបុរីពិភពថ្មី ខណ្ឌសែនសុខឱ្យទៅឈ្មោះ សៀន សិលា និងប្រពន្ធ ដើម្បីរស់នៅ ហើយថែមទាំងទិញរថយន្តម៉ាកវីស្ដូ ដែលរូបគេជិះជាប់នឹងខ្លួននោះឱ្យមួយគ្រឿងទៀតផង ។ លោកស្រីនិយាយថា ដោយសារតែភាពលោភលន់ឈ្មោះ សៀន សិលា បានទូរស័ព្ទគំរាមទារប្រាក់ពីក្រុមគ្រួសារចំនួន៥ម៉ឺនដុល្លារ ដើម្បីយកទៅធ្វើដើមទុនរកស៊ីផ្ទាល់ខ្លួន ។ ចំពោះទឹកប្រាក់៥ម៉ឺនដុល្លារ ដែលឈ្មោះ សៀន សិលា ខ្ចីពីក្រុមគ្រួសារគឺក្រុមគ្រួសារអាចនឹងឱ្យ តែរកពេលវេលាណាមួយសមរម្យដើម្បីពិចារណាគ្នាសិន ។
ដោយសារក្រុមគ្រួសារយឺតយូរក្នុងការឱ្យប្រាក់ទៅរូបគេខ្ចី ទើបឈ្មោះ សៀន សិលា ទូរស័ព្ទប្រមាថមាក់ងាយលើក្រុមគ្រួសាររបស់លោកស្រី និងគំរាមសម្លាប់តាមរូបភាពផ្សេងៗដែលគេនឹកឃើញនិយាយ ។ ព្រោះតែបញ្ហានេះហើយ ទើបក្រុមគ្រួសារតាមហៅឈ្មោះ សៀន សិលា ឱ្យធ្វើកិច្ចសន្យា៣ចំណុចនៅកន្លែងសមត្ថកិច្ចណាមួយដើម្បីការពារសុវត្ថិភាពក្រុមគ្រួសារ ។ ក្នុងនោះទី១-គឺសុំឱ្យឈ្មោះ សៀន សិលា ឈប់ទូរស័ព្ទទាក់ទងមកក្រុមគ្រួសារ ។ ទី២-សុំឱ្យឈ្មោះ សៀន សិលា សុំទោសក្រុមគ្រួសារ និងទី៣-សំណូមពរឱ្យឈ្មោះ សៀន សិលា ឈប់គំរាមលើក្រុមគ្រួសារតាមទូរស័ព្ទទៀត ។
បុ៉ន្តែឈ្មោះ សៀន សិលា មិនព្រមធ្វើតាមសំណូមពររបស់ក្រុមគ្រួសាររបស់ខ្លួនឡើយ ហើយថែមទាំងបន្តទូរស័ព្ទគំរាមដដែលៗលើក្រុមគ្រួសារ ទើបក្រុមគ្រួសារសម្រេចចិត្តប្តឹងទៅសមត្ថកិច្ចកងរាជអាវុធហត្ថរាជធានីភ្នំពេញ ចាត់ការលើឈ្មោះ សៀន សិលា ហើយក៏កើតមានរឿងប្រទូស្តរ៉ាយគ្នាតាមផ្លូវដូចខាងលើនេះតែម្តង ។ ចំពោះការលើកឡើងទាំងប៉ុន្មានខាងលើនេះ លោក សៀន សិលា ដែលត្រូវបានឃាត់ខ្លួនបានបដិសេធថា មិនមែនជាការពិតឡើយ ហើយបុគ្គលដដែលនេះបានប្រើពាក្យអសីលធម៌ចោទប្រកាន់លើក្រុមគ្រួសាររបស់ខ្លួន និងនៅបញ្ហាផ្សេងៗជាច្រើនទៀត ។
ទោះជាយ៉ាងនេះក្តី សមត្ថកិច្ចបានកសាងសំណុំរឿងបញ្ជូនឈ្មោះ សៀន សិលា ទៅតុលាការដើម្បីផ្តន្ទាទោសតាមច្បាប់ដែលពាក់ព័ន្ធនឹងបទល្មើស៣ គឺ១-ហិង្សាដោយចេតនា ។ ២-គំរាមសម្លាប់ និង៣-ធ្វើឱ្យខូចខាតរថយន្តដោយចេតនា ដោយយោងទៅតាមពាក្យបណ្តឹងរបស់ក្រុមគ្រួសារខាង
ប្រពន្ធ ។ ទាក់ទិននឹងការផ្ទុះអាវុធនេះ មន្ត្រីកងរាជអាវុធហត្ថបាននិយាយថា ក្នុងហេតុការណ៍នោះមិនទាន់បានដឹងជាផ្លូវការថា នរណាជាអ្នកបាញ់នៅឡើយទេ ៕
ចែករំលែកព័តមាននេះ