រាជធានីភ្នំពេញ ៖ នៅសល់មិនដល់១ខែទៀតទេ ពិធីបុណ្យសមុទ្រលើកទី៧ ជុំទី២ នឹងឈានចូលមកដល់ ដែលប្រារព្ធធ្វើនៅខេត្តកោះកុង ជាខេត្តមួយមានសក្តានុពលទាំងទេសចរណ៍ និងវិនិយោគ ។…
រាជធានីភ្នំពេញ ៖ នៅសល់មិនដល់១ខែទៀតទេ ពិធីបុណ្យសមុទ្រលើកទី៧ ជុំទី២ នឹងឈានចូលមកដល់ ដែលប្រារព្ធធ្វើនៅខេត្តកោះកុង ជាខេត្តមួយមានសក្តានុពលទាំងទេសចរណ៍ និងវិនិយោគ ។
យោងតាមការសម្រេចរបស់រាជរដ្ឋាភិបាលកម្ពុជា បុណ្យសមុទ្រលើកទី៧នេះ នឹងត្រូវធ្វើចាប់ពីថ្ងៃទី១៤ ដល់ថ្ងៃទី១៦ ខែធ្នូ ឆ្នាំ២០១៨ ដោយត្រូវរៀបចំឲ្យកាន់តែធំជាងមុន និងរំពឹងទទួលបានភ្ញៀវជាតិ និងអន្តរជាតិចូលរួមទស្សនាប្រមាណ៣០ម៉ឺននាក់ ។ ទោះយ៉ាងនេះក្ដី ដើម្បីទទួលបានភ្ញៀវទេសចរដូចការរំពឹងទុក អ្នកជំនាញក្នុងវិស័យទេសចរណ៍កម្ពុជា បានផ្ដល់យោបល់ថា ក្រសួង ក៏ដូចជាអាជ្ញាធរពាក់ព័ន្ធ ត្រូវជំរុញការផ្សព្វ ផ្សាយពីសេវាកម្មនានាឱ្យកាន់តែទូលំទូលាយបន្ថែមទៀត ព្រោះកោះកុង ជាខេត្តនៅដាច់ស្រយាលមួយដែលសេវាកម្មបម្រើឲ្យវិស័យទេសចរណ៍នៅមានកម្រិតនៅឡើយ ។
លោកជំទាវ ឆាយ ស៊ីវលីន ប្រធានសមាគមទីភ្នាក់ងារទេសចរណ៍កម្ពុជា មានប្រសាសន៍ថា ខេត្តកោះកុង ជាខេត្តមួយដែលមានការទាក់ទាញច្រើន ក៏ប៉ុន្តែពលរដ្ឋទាំងអស់បានដឹងនិងលឺហើយថា សេវាកម្មស្នាក់នៅ និងម្ហូបអាហារក្នុងខេត្តមួយនេះនៅមានកម្រិតនៅឡើយ ដូចនេះពលរដ្ឋកំពុងគិតថា បើទៅលេង គួរត្រូវធ្វើយ៉ាងម៉េច ? លោកជំទាវបន្ដថា ៖« ដូចនេះ គួរតែមានការរៀបចំផ្សព្វផ្សាយបន្ថែមអំពីសេវាកម្មនានា ដូចជា ការស្នាក់នៅ និងម្ហូបអាហារ ពិសេសហេដ្ឋារចនាសម្ព័ន្ធផ្លូវថ្នល់នានាឱ្យបានទូលំទូលាយ ទើបអាចទទួលបានភ្ញៀវដូចក្រសួងទេសចរណ៍ធ្លាប់បានរំពឹងទុក »។
លោកជំទាវលើកឡើងថា ជាទូទៅនៅពេលមានពិធីបុណ្យសមុទ្រឬទន្លេម្តងៗ ឃើញថា ពលរដ្ឋក្នុងស្រុកមានការចាប់អារម្មណ៍ច្រើនជាងបរទេស ដោយសារពួកគាត់ដឹងថា ពិធីបុណ្យទាំងនេះមានកម្មវិធីទាក់ទាញច្រើន ហើយអាចដើរសម្ភារ ទំនិញ និងដើរកន្សាន្តយ៉ាងសប្បាយ។ អីចឹង យើងសុំឱ្យមានការផ្សព្វផ្សាយទូលំទូលាយបន្តិច ដើម្បីឱ្យពលរដ្ឋកម្ពុជាទាំងអស់គ្នា »។
ប្រធានមន្ទីរទេសខេត្តកោះកុងបានឲ្យដឹងដែរថា អាជ្ញាធរខេត្តបានត្រៀមខ្លួនរួចជាស្រេចក្នុងការផ្តល់សេវាស្នាក់នៅសម្រាប់ភ្ញៀវជាតិ និងអន្តរជាតិ ដោយបានសហការជាមួយដៃគូឯកជន និងប្រជាពលរដ្ឋ ។
លោក ប៊ុន បៀវ ប្រធានមន្ទីរទេសចរណ៍ខេត្តកោះកុង មានប្រសាសន៍ថា ៖« ខេត្តបានត្រៀមកន្លែងស្នាក់នៅជូនភ្ញៀវចូលរួមពិធីបុណ្យសមុទ្រចំនួន១.៨០០បន្ទប់ ហើយយើងបានទំនាក់ទំនងជាមួយភាគីថៃដើម្បីឱ្យភ្ញៀវរបស់យើងឆ្លងទៅស្នាក់នៅបានជាង១.០០០បន្ទប់បន្ថែមទៀត »។ លោកបន្ថែមថា ៖« ទន្ទឹមនឹងនេះ យើងបានសហការជាមួយអាជ្ញាធរ អង្គភាពពាក់ព័ន្ធ និងវត្តអារាម រួមនឹងប្រជាពលរដ្ឋ ធ្វើយ៉ាងម៉េចរៀបចំឱ្យមានកន្លែងស្នាក់នៅជូនភ្ញៀវ ។ ក្រៅពីនេះ យើងបានរៀបចំកន្លែងនៅសាលាខេត្តចាស់ និងទីលានមួយចំនួនផ្សេងទៀតដែលមានបន្ទប់ទឹកគ្រប់គ្រាន់ ហើយយើងក៏បានសហការជាមួយក្រុមហ៊ុនមកបោះស្តង់ប្រហែល៥០០ស្តង់បន្ថែមទៀត ដើម្បីសម្រួលដល់ការស្នាក់នៅរបស់ភ្ញៀវ។ ដូច្នេះ យើងមានជំនឿថា អាចនឹងគ្រប់គ្រាន់ »។
រដ្ឋមន្ត្រីក្រសួងទេសចរណ៍ លោក ថោង ខុន បានថ្លែងក្នុងកិច្ចប្រជុំនៅឯសាលាខេត្តកោះកុង កន្លងមកថា ពិធីបុណ្យសមុទ្រឆ្នាំនេះ ក្រសួងនឹងធ្វើឲ្យធំ និងមានភាពអធិកអធមជាងមុនសម្រាប់ខេត្តកោះកុង ដែលនឹងត្រូវធ្វើជាម្ចាស់ផ្ទះក្នុងការរៀបចំពិធីសមុទ្រលើកទី៧ ជុំទី២ ក្នុងឆ្នាំ២០១៨នេះ ខណៈលើកទី១ បានប្រារព្ធធ្វើកាលពីឆ្នាំ២០១៤ ដោយមានភ្ញៀវចូលរួមជាង១០ម៉ឺននាក់ ប៉ុន្តែសម្រាប់ឆ្នាំនេះ លោករំពឹងទុកថា នឹងមានភ្ញៀវចូលរួមប្រមាណជិត៣០ម៉ឺននាក់ ។
បើតាមលោករដ្ឋមន្ត្រី បុណ្យសមុទ្រដែលមានរយៈពេល៣ថ្ងៃនេះ មានកម្មវិធីច្រើនជាងមុន ធំជាងមុន ជាមួយនឹងការអញ្ជើញក្រុមសិល្បៈ និងក្រុមកីឡាមកពីប្រទេសជិតខាង ដូចជា ថៃ ឡាវ និងវៀតណាមចូលរួម ដើម្បីញ៉ាំងឲ្យពិធីបុណ្យកាន់តែមានភាពទាក់ទាញ ។ លោកថា ៖« ពិធីបុណ្យសមុទ្រឆ្នាំនេះ យើងរៀបចំឲ្យប្លែក និងធំជាងឆ្នាំមុន នៅត្រង់ថា យើងនឹងរៀបចំតំបន់ទេសចរណ៍ដ៏មានសក្ដានុពលដែលបានលើកឡើងខាងលើ ដើម្បីស្រូបទាញទេសចរទៅកាន់តំបន់នោះ » ។ ទីប្រឹក្សាសមាគមទីភ្នាក់ងារទេសចរណ៍កម្ពុជា លោក ហូ វណ្ឌី មានប្រសាន៍ថា ការប្រារព្ធពិធីបុណ្យសមុទ្រ ពិតជាមានសារសំខាន់ណាស់ ដើម្បីឲ្យប្រជាពលរដ្ឋបានយល់ដឹងពីសមុទ្រ និងចូលរួមថែរក្សាបរិស្ថានសមុទ្រឲ្យបានស្អាត និងនិរន្តរភាព ពិសេសជាការលើកកម្ពស់ការផ្សព្វផ្សាយពីសក្តានុពលទេសចរណ៍នៅតំបន់ឆ្នេរទៅកាន់ពិភពលោក ឲ្យបានស្គាល់ច្រើនថែមទៀត ។ លោកបន្តថា ៖« ពិធីនេះក៏ជាការផ្តល់ផលប្រយោជន៍ច្រើនដល់សហគមន៍ជុំវិញតំបន់នោះ ដោយពួកគេអាចលក់ផលិតផលរបស់ពួកគេដល់ភ្ញៀវជាតិ និងអន្តរជាតិផងដែរ » ។
លោកបន្ថែមថា ៖« វិស័យទេសចរណ៍ជាវិស័យស្នូលមួយក្នុងការបង្កើតសកម្មភាពសេដ្ឋកិច្ច ដោយភ្ញៀវទេសចរទៅដល់ទីណា សកម្មភាពសេដ្ឋកិច្ចបានបង្កើតឡើងនៅទីនោះ » ៕
ចែករំលែកព័តមាននេះ