ទីក្រុងហ្សាកាតា៖ ក្រោយហេតុការណ៍ផ្ទុះភ្នំភ្លើងដ៏កក្រើកព្រះធរណីនៅប្រទេសឥណ្ឌូណេស៊ី មនុស្សម្ភៃនាក់ស្រាប់តែបាត់ខ្លួនមួយរំពេច ក្នុងនោះក៏មានជនជាតិសិង្ហបុរី៩នាក់ផងដែរ។ ហេតុនេះ អាជ្ញាធរកំពុងតែដុតដៃដុតជើងតាមរកពួកគេ។ ភ្នំភ្លើងឈ្មោះឌូកូណូ (Dukono) នៅលើកោះហាល់ម៉ាហេរ៉ា (Halmahera)…
ទីក្រុងហ្សាកាតា៖ ក្រោយហេតុការណ៍ផ្ទុះភ្នំភ្លើងដ៏កក្រើកព្រះធរណីនៅប្រទេសឥណ្ឌូណេស៊ី មនុស្សម្ភៃនាក់ស្រាប់តែបាត់ខ្លួនមួយរំពេច ក្នុងនោះក៏មានជនជាតិសិង្ហបុរី៩នាក់ផងដែរ។ ហេតុនេះ អាជ្ញាធរកំពុងតែដុតដៃដុតជើងតាមរកពួកគេ។ ភ្នំភ្លើងឈ្មោះឌូកូណូ (Dukono) នៅលើកោះហាល់ម៉ាហេរ៉ា (Halmahera) នៅសុខៗស្រាប់តែផ្ទុះឡើងយ៉ាងគំហុក និងព្រួសផ្សែងហុយទ្រលោមកម្ពស់ដប់គីឡូម៉ែត្រទៅលើមេឃ។ មុនពេលនោះបន្តិចមានអ្នកទេសចរមួយក្រុមធ្វើដំណើរកម្សាន្តនៅលើភ្នំនោះ។
មន្ត្រីម្នាក់ឈ្មោះអ៊ីវ៉ាន់ រ៉ាម់ដានី (Iwan Ramdani) ដែលទទួលបន្ទុកខាងស្វែងរក និងជួយសង្គ្រោះថ្លែងប្រាប់តាមទូរស័ព្ទថាក្រុមការងាររបស់លោកកំពុងចុះទៅកន្លែងកើតហេតុ។ រហូតមកដល់ពេលនេះ មិនទាន់មានសេចក្ដីរាយការណ៍ថាមានមនុស្សរងរបួសដោយសារហេតុការណ៍នេះនៅឡើយទេ។ យោងតាមរបាយការណ៍ដែលក្រុមការងាររបស់លោកទទួលបានគឺថាមនុស្សម្ភៃនាក់ដែលត្រូវស្វែងរក។ ភ្នំភ្លើងឌូកូណូស្ថិតនៅខាងជើងខេត្តម៉ាលូគូ (Maluku) បានផ្ទុះឡើងនៅថ្ងៃសុក្រនេះនៅវេលាម៉ោង៧:៤១ព្រឹកម៉ោងនៅក្នុងស្រុក។
ទីភ្នាក់ងារស្វែងរក និងជួយសង្គ្រោះនៃប្រទេសឥណ្ឌូណេស៊ីនៅតែបន្តអំពាវនាវឱ្យប្រជាជនប្រុងប្រយ័ត្នកម្រិតអាសន្នទីបី។ លោកអ៊ីវ៉ាន់ រ៉ាម់ដានីដែលជាប្រធានក្រុមអ្នកស្វែងរក និងជួយសង្គ្រោះនោះប្រាប់ទីភ្នាក់ងារព័ត៌មានរ៉យទ័រថាក្រុមរបស់លោកបានបញ្ជូនកម្លាំងរាប់សិបនាក់មានតាំងពីនគរបាលមួយចំនួនផងដែរដើម្បីស្វែងរកអ្នកឡើងភ្នំម្ភៃនាក់ដែលជាប់ផុងនៅលើភ្នំនោះ។
លោកសូមបញ្ជាក់ឡើងវិញថាអ្នកឡើងភ្នំនោះ៩នាក់ជាជនជាតិសិង្ហបុរី និងក្រៅពីនេះសុទ្ធតែជាជនជាតិឥណ្ឌូណេស៊ីទាំងអស់។ អាជ្ញាធរបានចេញសេចក្ដីអំពាវនាវឱ្យប្រជាជនកុំធ្វើសកម្មភាពនៅក្បែរភ្នំនោះឱ្យសោះ ហើយត្រូវរក្សាគំលាតយ៉ាងតិចក៏៤គីឡូម៉ែត្រដែរពីរណ្ដៅភ្នំភ្លើង។ ទីភ្នាក់ងារភ្នំភ្លើងវិទ្យាក៏បានចេញសេចក្ដីប្រកាសថាអាចនឹងមានហានិភ័យនៃការហូរចាកពីលើកំពូលភ្នំមកជើងភ្នំនូវកម្អែភ្នំភ្លើងនៅពេលដែលមានភ្លៀងធ្លាក់។ ទោះជាយ៉ាងណាក្ដី មិនទាន់មានសេចក្ដីរាយការណ៍ថាការផ្ទុះភ្នំភ្លើងលើកនេះបន្ទច់បង្អាក់ការធ្វើដំណើរតាមយន្តហោះនោះទេ៕ ប្រភព៖ ឆេនណល ញូស៍ អេស៊ា និងប្រភពដទៃទៀត
ចែករំលែកព័តមាននេះ