រាជធានីភ្នំពេញ ៖ យុវជនមួយក្រុមមានគ្នា៥ទៅ៦នាក់បាននាំគ្នាទៅផឹកស៊ីនៅក្នុងភោជនីយដ្ឋានមួយកន្លែងស្ថិតនៅតាមផ្លូវលេខ២០០២ អស់ស្រាបៀរជាង១០ថូស្រវឹងរៀងៗខ្លួនក៏នាំគ្នាត្រឡប់ទៅផ្ទះវិញ ។ លុះដើរចេញមកដល់មុខហាង ស្រាប់តែយុវជនម្នាក់ដែលអះអាងថា ខ្លួនមានជំងឺបេះដូងបានគាំងបេះដូងដួលសន្លប់ធ្វើឱ្យមានការភ្ញាក់ផ្អើលកាលពីវេលាម៉ោង១០យប់ថ្ងៃទី១៣ មិថុនា នៅតាមផ្លូវលេខ២០០២ ក្នុងសង្កាត់ទឹកថ្លា ខណ្ឌសែនសុខ ។
ប្រភពព័ត៌មានពីមិត្តភក្តិជនរងគ្រោះឱ្យដឹងថា យុវជនដែលមានបញ្ហាបេះដូងនេះឈ្មោះ ចាន់ គែនពិទូ អាយុ២៤ឆ្នាំ ជានិស្សិតឆ្នាំទី៣ នៅសាកលវិទ្យាល័យចេនឡា ស្នាក់នៅផ្ទះជួលក្នុងសង្កាត់បឹងសាឡាង ខណ្ឌទួលគោក មានស្រុកកំណើតនៅឃុំអន្លង់ត្នោត ស្រុកក្រគរ ខេត្តពោធិ៍សាត់ ។
ក្រោយពេលកើតហេតុ មិត្តភក្តិបានដឹកជនរងគ្រោះយកទៅសង្គ្រោះនៅមន្ទីរពេទ្យព្រះកុសុមៈ ហើយគ្រូពេទ្យព្យួរសេរ៉ូមបានធូរស្រាលឡើងវិញ ។ ជាការល្អ អ្នកមានជំងឺបេះដូងមិនគួរផឹកគ្រឿងស្រវឹងរហូតដល់ជ្រុលបែបនេះទេ ព្រោះថាអ្នកគាំងបេះដូងច្រើនតែស្លាប់ផុយណាស់ បើជួយមិនទាន់ទេនោះ ៕
ចែករំលែកព័តមាននេះ