ខេត្តកំពង់ស្ពឺ ៖ រោងកែច្នៃស្រកីដូង(ធ្វើជាជី និង សម្រាប់បណ្តុះកូនឈើ)មួយកន្លែងត្រូវបានអគ្គីភ័យឆាបឆេះអស់គ្មានសល់ ខណៈដែលឆ្លងចរន្តអគ្គិសនីក្លាយជាអណ្តាតភ្លើងឆេះទាំងកណ្តាលថ្ងៃបង្កឱ្យមានការភ្ញាក់ផ្អើលដល់ប្រជាពលរដ្ឋ និងសមត្ថកិច្ចជួយអន្តរាគមន៍ពន្លត់។ ការភ្ញាក់ផ្អើលឆេះរោងកែច្នៃស្រកីដូង កាលពីវេលាម៉ោង១និង៧នាទីរសៀលថ្ងៃទី១៧ ខែធ្នូ…
ខេត្តកំពង់ស្ពឺ ៖ រោងកែច្នៃស្រកីដូង(ធ្វើជាជី និង សម្រាប់បណ្តុះកូនឈើ)មួយកន្លែងត្រូវបានអគ្គីភ័យឆាបឆេះអស់គ្មានសល់ ខណៈដែលឆ្លងចរន្តអគ្គិសនីក្លាយជាអណ្តាតភ្លើងឆេះទាំងកណ្តាលថ្ងៃបង្កឱ្យមានការភ្ញាក់ផ្អើលដល់ប្រជាពលរដ្ឋ និងសមត្ថកិច្ចជួយអន្តរាគមន៍ពន្លត់។
ការភ្ញាក់ផ្អើលឆេះរោងកែច្នៃស្រកីដូង កាលពីវេលាម៉ោង១និង៧នាទីរសៀលថ្ងៃទី១៧ ខែធ្នូ ឆ្នាំ២០២៥ ស្ថិតនៅក្នុងភូមិពង្រ ឃុំតាំងក្រូច ស្រុកសំរោងទង ខេត្តកំពង់ស្ពឺ ។
លោកឃុត សុផល អធិការនគរបាលស្រុកសំរោងទងបាននិយាយឱ្យដឹងថា ឆេះរោងកែច្នៃស្រកីដូងដែលអគ្គីភ័យឆាបឆេះនោះ ១ខ្នង មានទំហំ ១០ម៉ែត្រគុណនឹង៤ម៉ែត្រ ធ្វើអំពីឈើ ដំបូលប្រក់ស័ង្កសី ម្ចាស់ទីតាំងមាន ឈ្មោះ អ៊ុម សុភា ភេទប្រុស អាយុ ៤១ឆ្នាំ រស់នៅក្នុងភូមិពង្រ ឃុំតាំងក្រូច ស្រុកសំរោងទង ខេត្តកំពង់ស្ពឺ។
លោកអធិការនគរបាលស្រុកសំរោងទងបានបន្តឱ្យដឹងថា នៅមុនពេលកើតហេតុ ម្ចាស់រោងកែច្នៃស្រកីដូងខាងលើ បានហូបបាយហើយសម្រាក ក៏ស្រាប់តែធុំក្លិនឈ្ងៀម និងមានផ្សែងហុយចេញពីរោងកែច្នៃស្រកីដូង(ធ្វើជាជី និងសម្រាប់បណ្តុះកូនឈើ) ខាងលើ បង្កឱ្យមានការភ្ញាក់ផ្អើលដល់ប្រជាពលរដ្ឋ រស់នៅក្បែរកន្លែងកើតហេតុ និងសមត្ថកិច្ចជួយអន្តរាគមន៍រថយន្តពន្លត់អគ្គីភ័យជួយបាញ់ពន្លត់។
លោកអធិការនគរបាលស្រុកសំរោងទងបានបញ្ជាក់ថា ទំហំនៃការខូចខាតមិនទាន់អាចវាយតម្លៃជាទឹកប្រាក់បាននៅឡើយនោះទេ។ គ្រាន់តែដឹងថារងការខូចខាតឆេះរោងកែច្នៃស្រកីដូងទាំងស្រុង មាន ៖
-ម៉ាស៊ីនជ្រួយដីចំនួន ០១គ្រឿង
-ម៉ាស៊ីនកិនស្រកីដូងចំនួន ០១គ្រឿង
-ស្រកីដូងចំនួន ០២តោន នៅក្នុងកិច្ចប្រតិបត្តិការណ៍ នគរបាលបានប្រើប្រាស់រថយន្តពន្លត់
អគ្គិភ័យអធិការដ្ឋាននគរបាលស្រុកសំរោងទង ០១គ្រឿង មិនមានគ្រោះថ្នាក់ដល់មនុស្ស សត្វអ្វីនោះទេ។ មូលហេតុដែលធ្វើឱ្យឆេះរោងកែច្នៃស្រកីដូងខាងលើនេះ គឺបណ្តាលមកពី ឆ្លងចរន្តអគ្គីសនី៕
ចែករំលែកព័តមាននេះ