គ្រោះថ្នាក់ផ្លូវដែកថ្មីមួយកើតមានកាលពីថ្ងៃទី១៣ មិថុនា នៅក្រុងប៊ុយណូស៊ែរ រដ្ឋធានីអាហ្សង់ទីន បណ្តាលឱ្យមនុស្សស្លាប់៣នាក់ ហើយមនុស្សយ៉ាងតិច១៥៥នាក់ត្រូវរបួស ពេលរថភ្លើងជាយក្រុងមួយបានបុកនឹងរថភ្លើងមួយទៀតនៅកន្លែងឈប់ ។ការបុកគ្នានេះកើតមាននៅ CASTELAR ចម្ងាយ៣០គីឡូម៉ែត្រ ខាងលិចក្រុងប៊ុយណូស៊ែរលើផ្លូវដែក ដែលកាលពីថ្ងៃទី២២ កុម្ភៈ ឆ្នាំ២០១២ មានគ្រោះថ្នាក់មួយបណ្តាលឱ្យមនុស្សស្លាប់ដល់ទៅ៥១នាក់ និងរបួស៧០០នាក់ក្នុងស្ថានីយ ONCE នៃរដ្ឋធានី ។
លោក CARLOS GRILLO អ្នកទទួលខុសត្រូវម្នាក់ខាងផ្នែកសន្តិសុខមូលដ្ឋាននិយាយថា សម្រាប់ពេលនេះយើងដឹងពីមនុស្សស្លាប់៣នាក់ ។ ចំណែករដ្ឋមន្ត្រីមហាផ្ទៃ និងដឹកជញ្ជូនអាហ្សង់ទីន លោក FLORENCIO RANDAZZO រៀបរាប់ពីមនុស្ស១៥៥នាក់ត្រូវរបួសបញ្ជូនទៅមន្ទីរពេទ្យ ដោយក្នុងចំណោមអ្នករបួសទាំងនោះ ប្រមាណជា១០នាក់ស្ថិតក្នុងសភាពធ្ងន់ធ្ងរ ។
រដ្ឋមន្ត្រីរូបនេះឱ្យដឹងទៀតថា អ្នកបើករថភ្លើង និងជំនួយការរបស់គេត្រូវឃាត់ខ្លួនដើម្បីសួរចម្លើយ ។ យើងចង់កំណត់ឱ្យច្បាស់ថា តើនោះជាគ្រោះថ្នាក់មួយដែលពុំអាចបញ្ចៀសបាន ឬយ៉ាងណា ។ គេសង្ស័យថា គ្រោះថ្នាក់នេះអាចមកពីការធ្វេសប្រហែសរបស់អ្នកបើក ៕
ចែករំលែកព័តមាននេះ