ការរញ្ជួយដីកម្លាំង៦,៧រីស្ទ័រមួយកើតមានកាលពីថ្ងៃទី១៣ មិថុនា ក្នុងដែនទឹកកោះជ្វារបស់ឥណ្ឌូណេស៊ី ក៏ប៉ុន្តែពុំមានការប្រកាសអាសន្នស៊ូណាមីឡើយ ។វិទ្យាស្ថានភូមិរូបវិទ្យាអាមេរិក USGS បញ្ជាក់ថា ការរញ្ជួយដីនេះកើតមាននាវេលាម៉ោង២៣និង៤៧នាទី ម៉ោងក្នុងស្រុក នៅជម្រៅ១១គីឡូម៉ែត្រ ក្នុងដែនទឹកឥណ្ឌូណេស៊ី ត្រង់កន្លែងមួយចម្ងាយ៤២៣គីឡូម៉ែត្រខាងត្បូងក្រុងហ្សាការតា រដ្ឋធានីឥណ្ឌូណេស៊ី ដែលនៅទីនោះក៏មានការញ័ររង្គើរដែរ និងចម្ងាយ១៧០គីឡូម៉ែត្រខាងកើតកោះគ្រីស្មាស់របស់អូស្ត្រាលី ។
យោងតាមទីភ្នាក់ងារឯកទេសខាងការរញ្ជួយដីរបស់ឥណ្ឌូណេស៊ីថា ការរញ្ជួយដីនេះពុំបង្កឱ្យមានស៊ូណាមីមួយទេ ។ អ្នកនាំពាក្យរបស់ទីភ្នាក់ងារនោះនិយាយថា រហូតមកទល់ពេលនេះពុំទាន់មានរបាយការណ៍ពីការខូចខាត ឬជនរងគ្រោះនៅឡើយ ក៏ប៉ុន្តែយើងដឹងថា ការរញ្ជួយដីនោះធ្វើឱ្យមានការញ័ររង្គើរនៅកន្លែងជាច្រើននៃកោះជ្វា ។
ប្រទេសឥណ្ឌូណេស៊ីតែងជួបប្រទះនឹងការរញ្ជួយដីញឹកញាប់បំផុត ដោយការរញ្ជួយដីខ្លាំងមួយកាលពីឆ្នាំ២០០៤ ក្នុងប្រទេសនេះ ដែលញ៉ាំងឱ្យមានស៊ូណាមី បណ្តាលឱ្យមនុស្សស្លាប់ដល់ទៅប្រមាណជា១៧០.០០០នាក់ នៅខេត្តអាសេ កោះស៊ូម៉ាត្រា ហើយបណ្តាលឱ្យមានជនរងគ្រោះជាច្រើនសិបពាន់នាក់ក្នុងបណ្តាប្រទេសស្ថិតនៅជាប់មហាសមុទ្រឥណ្ឌា ៕
ចែករំលែកព័តមាននេះ