តាមរយៈគណៈកម្មាធិការដើម្បីការបង្រួបបង្រួមមាតុប្រទេសដោយសន្តិវិធី ជាអង្គការកូរ៉េខាងជើងមួយទទួលបន្ទុកកិច្ចការកូរ៉េខាងត្បូង ប្រតិកម្មដំបូងរបស់កូរ៉េខាងជើង ចាប់តាំងពីការលុបចោលកាលពីយប់ថ្ងៃទី១១ មិថុនា នូវកិច្ចប្រជុំកម្រិតរដ្ឋាភិបាលអន្តរកូរ៉េក្រុងព្យុងយ៉ាងបានទម្លាក់ការទទួលខុសត្រូវទាំងស្រុងចំពោះបរាជ័យនេះលើក្រុងសេអ៊ូល ។
ក្នុងសេចក្តីប្រកាសមួយចេញផ្សាយនាព្រឹកថ្ងៃទី១៣ មិថុនា គណៈកម្មាធិការនោះនិយាយថា កិច្ចប្រជុំរបស់អាជ្ញាធរកូរ៉េទាំង២ត្រូវធ្វើឱ្យបរាជ័យមុនពេលបើកទៅទៀត ដោយសារការបំផ្លាញយ៉ាងក្រអឺតក្រទមរបស់កងកម្លាំងពួកអាយ៉ង ហើយកូរ៉េខាងត្បូងត្រូវទទួលខុសត្រូវទាំងស្រុងចំពោះបណ្តាផលវិបាកលើទំនាក់ទំនងអន្តរកូរ៉េ ។
ក្រោយការប្រកាសនោះរបស់កូរ៉េខាងជើងទំនាក់ទំនងអន្តរកូរ៉េនឹងធ្លាក់ទៅកាន់ចំណុចជាប់គាំងជាថ្មី មិនដល់១សប្តាហ៍ផងក្រោយការប្រកាសពីភាពធូរស្រាល ដោយសារសេចក្តីជូនដំណឹងពីការបើកធ្វើការចរចាអន្តរកូរ៉េកម្រិតខ្ពស់លើកដំបូងចាប់តាំងពី៦ឆ្នាំមកហើយ ។អ្នកនាំពាក្យរបស់គណៈកម្មាធិការបង្រួបបង្រួមកូរ៉េខាងជើងបានបន្តការរិះគន់កូរ៉េខាងត្បូងដោយនិយាយថា កូរ៉េខាងត្បូងបានទទូចមុនចំពោះការបើកធ្វើកិច្ចប្រជុំថ្នាក់រដ្ឋមន្ត្រីមួយដោយអះអាងជាច្រើនលើកថា ខ្លួននឹងបញ្ជូនរដ្ឋមន្ត្រីបង្រួបបង្រួម ក៏ប៉ុន្តែបានបន្ថយកម្រិតនៃប្រមុខគណៈប្រតិភូរបស់ខ្លួនមុនពេលបើកការចរចា ដែលនោះជាអំពើខ្វះសតិសម្បជញ្ញៈមួយ ហើយគិតទុកជាមុន ពុំធ្លាប់ជួបក្នុងប្រវត្តិនៃការចរចាអន្តរកូរ៉េ ហើយពោរពេញដោយភាពក្រអឺតក្រទម ។
សេចក្តីប្រកាសធ្វើការកត់សម្គាល់ថា រដ្ឋាភិបាលកូរ៉េខាងត្បូងស្នើបញ្ជូនអគ្គនាយកនៃរណសិរ្សបង្រួបង្រួមរបស់បក្សពលករកូរ៉េខាងជើង លោក KIM YANG GON ជាដៃគូចរចាជាមួយរដ្ឋមន្ត្រីបង្រួបបង្រួមរបស់ខ្លួន ។ នេះជាការបង្ហាញពីការធ្វើមិនដឹងខ្យល់អ្វីទាំងស្រុងលើប្រព័ន្ធនៃរបបរបស់យើង ដែលតាំងពីអតីតកាលមក លេខាគណៈកម្មាធិការកណ្តាលបក្សពលករកូរ៉េពុំដែលមានវត្តមានក្នុងការចរចាផ្លូវការណាមួយរវាងអាជ្ញាធរអន្តរកូរ៉េឡើយ ៕
ចែករំលែកព័តមាននេះ