ពាក្យថា ស្វាមី មានខ្លឹមសារដូចម្តេច? ហើយតើមានបុរសប៉ុន្មាននាក់ដែលបានក្លាយទៅជាស្វាមីដែលមានគុណធម៌ចំពោះភរិយា? នៅក្នុងវចនានុក្រមភាសាខ្មែររបស់សម្តេចព្រះសង្ឃរាជ ជួន ណាត បានពន្យល់ពាក្យថា ស្វាមីនេះថា ម្ចាស់,…
ពាក្យថា ស្វាមី មានខ្លឹមសារដូចម្តេច? ហើយតើមានបុរសប៉ុន្មាននាក់ដែលបានក្លាយទៅជាស្វាមីដែលមានគុណធម៌ចំពោះភរិយា?
នៅក្នុងវចនានុក្រមភាសាខ្មែររបស់សម្តេចព្រះសង្ឃរាជ ជួន ណាត បានពន្យល់ពាក្យថា ស្វាមីនេះថា ម្ចាស់, ប្តី។ បុរសដែលមានចិត្តស្មោះចំពោះ… បុរសដែលមានសេចក្តីស្រឡាញ់ស្មោះចំពោះ…។ សេចក្តីនេះក៏សូមបង្ហាញថា បុរសដែលបាននាមថាស្វាមី លុះណាតែបុរសនោះមានគុណធម៌៥យ៉ាងចំពោះភរិយារបស់ខ្លួនគឺៈ
១-រាប់អាន លើកមុខភរិយា ថាជាភរិយារបស់ខ្លួនមែនៗ ។ ត្រង់ចំណុចនេះ យើងធ្លាប់ឮហើយថា មានអស់លោកបុរសៗខ្លះ ពេលគេសួរថាដើរជាមួយនរណា ក៏ប្រាប់គេថាជាប្អូនស្រី ជាបងស្រី ឬជាអ្នកបម្រើ ឬក៏ជាមិត្តភក្តិទៅវិញ ដែលជាហេតុធ្វើឲ្យនាងជាភរិយាពេញសិទ្ធិអាក់អន់ស្រពន់ចិត្ត និងខ្មាសគេបំផុត រហូតឈានទៅរកការប្រេះឆាគ្នាក៏មាន ។
២-មិនមើលងាយភរិយារបស់ខ្លួនដោយកាយ និងវាចា។ ស្វាមីមិនគួរវាយធ្វើបាបភរិយា ឬជេរស្ដី ប្រមាថកាតទាន តិះដៀលដោយប្រការផ្សេងៗឡើយ គួរអ្នកនិយាយស្ដីដោយគោរព និងប្រើពាក្យផ្អែមល្ហែមជំនួសវិញ ។
៣-មិនប្រព្រឹត្តកន្លងចិត្តភរិយារបស់ខ្លួនទៅមានស្រីថ្មី ឬប្រពន្ធថ្មីឡើយ។ តាមធម្មតាចិត្តស្រី្ត មិនដែលមាននរណាសប្បាយចិត្តទេ ពេលដែលស្វាមីរបស់ខ្លួនទៅមានស្រីថ្មី។ យើងជាប្រុសគួរគិតថា ចុះបើភរិយាយើងមានប្រុសថ្មី តើយើងសប្បាយចិត្តទេ? គឺសុទ្ធតែជារឿងឈឺចាប់ដូចគ្នា ។
៤-ប្រគល់ភារកិច្ចជាធំក្នុងផ្ទះឲ្យទៅភរិយាផ្តាច់មុខដូចជា ការមើលទុកដាក់ទ្រព្យសម្បត្តិ រៀបចំតុបតែង មើលការខុសត្រូវក្នុងផ្ទះ ពិសេសផ្តល់ប្រាក់ដែលខ្លួនរកបានមកនោះទៅឱ្យនាងទុកដាក់ជារឿងល្អបំផុត។
៥-ផ្ដល់គ្រឿងអលង្ការឲ្យដល់ភរិយារបស់ខ្លួនតាមកាល និងតាមតម្រូវការដ៏សមគួរដល់ភរិយា។
បុរសណាមានគុណធម៌ទាំង៥ប្រការនេះដល់ភរិយា បុគ្គលនោះចាត់ថាជាស្វាមីល្អ ស្វាមីសង្គ្រោះដល់ភរិយា និងដើម្បីរក្សាវប្បធម៌ប្រពៃណីខ្មែរផង ដើម្បីលើកតម្កើងតម្លៃស្ត្រីក្នុងសង្គមផង ។
ចែករំលែកព័តមាននេះ