រាជធានីភ្នំពេញ ៖ ក្នុងជំនួបសម្តែងការគួរសមនិងពិភាក្សាការងារជាមួយសម្តេចអគ្គមហាសេនាបតីតេជោ ហ៊ុន សែន នារសៀលថ្ងៃទី១១ មិថុនា នៅវិមានសន្តិភាព លោក ស៊ូរ៉ាពង្ស តូរីឆាត់ឆៃគល់ ឧបនាយករដ្ឋមន្ត្រី រដ្ឋមន្ត្រីក្រសួងការបរទេសថៃ មានប្រសាសន៍ថា រដ្ឋាភិបាលថៃមានឆន្ទៈក្នុងការរក្សានូវទំនាក់ទំនងល្អជាមួយប្រជាពលរដ្ឋកម្ពុជា ។
រាជធានីភ្នំពេញ ៖ ក្នុងជំនួបសម្តែងការគួរសមនិងពិភាក្សាការងារជាមួយសម្តេចអគ្គមហាសេនាបតីតេជោ ហ៊ុន សែន នារសៀលថ្ងៃទី១១ មិថុនា នៅវិមានសន្តិភាព លោក ស៊ូរ៉ាពង្ស តូរីឆាត់ឆៃគល់ ឧបនាយករដ្ឋមន្ត្រី រដ្ឋមន្ត្រីក្រសួងការបរទេសថៃ មានប្រសាសន៍ថា រដ្ឋាភិបាលថៃមានឆន្ទៈក្នុងការរក្សានូវទំនាក់ទំនងល្អជាមួយប្រជាពលរដ្ឋកម្ពុជា ។
ប្រជាជនថៃយល់ថា ទំនាក់ទំនងរវាងប្រទេសទាំងពីរធ្វើឱ្យមានជំនឿទុកចិត្ត តាមរយៈនេះទំនាក់ទំនងរវាងថ្នាក់ដឹកនាំនៃប្រទេសទាំងពីរពិតជាមានសារសំខាន់ខ្លាំងណាស់ ពោលគឺការផ្លាស់ប្តូរទស្សនកិច្ចនៃថ្នាក់ដឹកនាំប្រទេសទាំងពីរពិតជាបានឆ្លុះបញ្ចាំងពីទំនាក់ទំនងល្អរវាងប្រទេសទាំងពីរដែលជាកត្តាជំរុញឱ្យមានជំនឿទុកចិត្តខ្លាំងឡើងសម្រាប់ប្រជាពលរដ្ឋនៃប្រទេសទាំងពីរ ។
ក្នុងន័យនេះ លោកជំទាវយីងឡាក់ ស៊ីណាវ៉ាត្រា សូមគោរពអញ្ជើញសម្តេចតេជោនាយករដ្ឋមន្ត្រីទៅបំពេញទស្សនកិច្ចជាផ្លូវការនៅប្រទេសថៃ ។ លោកឧបនាយករដ្ឋមន្ត្រីថៃបន្តថា ក្នុងដំណើរទស្សនកិច្ចរបស់លោកមកកាន់ព្រះរាជាណាចក្រកម្ពុជានាពេលនេះ លោកបានពិភាក្សាការងារជាមួយសមភាគីកម្ពុជា លោកឧបនាយករដ្ឋមន្ត្រី ហោ ណាំហុង ដោយបានពិភាក្សាគ្នាលើការអភិវឌ្ឍនៅតាមតំបន់ព្រំដែននៃប្រទេសទាំងពីរកម្ពុជា-ថៃ ។
គោលបំណងគឺដើម្បីធ្វើយ៉ាងណាឱ្យប្រជាពលរដ្ឋនៃប្រទេសទាំងពីរមានជីវភាពកាន់តែល្អប្រសើរឡើង តាមរយៈការពិភាក្សាគ្នាក្នុងការបង្កើតតំបន់សេដ្ឋកិច្ចពិសេស ការកសាងហេដ្ឋារចនាសម្ព័ន្ធតភ្ជាប់ ការបើកច្រកព្រំដែនដើម្បីសម្រួលចរាចរណ៍ទំនិញឆ្លងកាត់ ការអភិវឌ្ឍធនធានមនុស្ស សំដៅធ្វើយ៉ាងណាបង្កើតការងារ និងចំណូល ក៏ដូចជាពង្រឹងពាណិជ្ជកម្មនៅតាមព្រំដែន ។
ក្នុងជំនួបពិភាក្សានេះដែរ លោកឧបនាយករដ្ឋមន្ត្រីស៊ូរ៉ាពង្សតូរីឆាត់ឆៃគល់ ក្នុងនាមរដ្ឋាភិបាលនិងប្រជាជនថៃ បានចូលរួមអបអរសាទរជូនចំពោះលោកជំទាវប៊ុន រ៉ានី ហ៊ុន សែន ដែលត្រូវបានព្រះមហាក្សត្រនៃព្រះរាជាណាចក្រកម្ពុជាប្រោសព្រះរាជទាននូវគោរម្យ៍ងារជាសម្តេចកិត្តិព្រឹទ្ធបណ្ឌិត ។
សម្តេចតេជោ នាយករដ្ឋមន្ត្រី មានប្រសាសន៍សម្តែងនូវការវាយតម្លៃខ្ពស់ចំពោះលទ្ធផលនៃកិច្ចពិភាក្សារវាងមន្ត្រីការបរទេសនៃប្រទេសទាំងពីរ ពិសេសការពិភាក្សាលើការតភ្ជាប់កំណាត់ផ្លូវដែក ផ្លូវគោក ការតភ្ជាប់បណ្តាញអគ្គិសនី ការបើកច្រកព្រំដែនដទៃទៀតដែលជាប្រធានបទដ៏សំខាន់នៃកិច្ចពិភាក្សារបស់ថ្នាក់ដឹកនាំប្រទេសទាំងពីរ ។ សម្តេចតេជោ បន្តថា យើងត្រូវតែមានការប្តេជ្ញាចិត្តរួមគ្នាថា ប្រជាពលរដ្ឋរស់នៅតាមព្រំដែននៃប្រទេសទាំងពីរ ត្រូវតែឈប់មានការភ័យខ្លាច និងមានជីវភាពរស់នៅកាន់តែប្រសើរឡើង ។
ក្នុងឱកាសនោះ សម្តេចតេជោនាយករដ្ឋមន្ត្រី ក៏បានផ្តល់នូវអនុសាសន៍ដល់ក្រុមការងារនៃប្រទេសទាំងពីរ ត្រូវតែជំរុញបន្ថែមទៀតលើការងារដោះមីន និងយុទ្ធភណ្ឌមិនទាន់ផ្ទុះនៅតាមព្រំដែនគឺគប្បីត្រូវតែសហការគ្នា បំផ្លាញឃាតករកំបាំងមុខ ដែលលាក់កប់ក្នុងដីឱ្យអស់ ព្រោះនោះជាសោកនាដកម្មដ៏ធ្ងន់ធ្ងរសម្រាប់កងកម្លាំងប្រដាប់អាវុធ និងប្រជាពលរដ្ឋនៃប្រទេសទាំងពីរ ។ ជាមួយគ្នានេះ សម្តេចតេជោនាយករដ្ឋមន្ត្រី បានស្នើដល់ភាគីទាំងពីរឱ្យបង្កើនកិច្ចសហប្រតិបត្តិការលើវិស័យពាណិជ្ជកម្ម ទេសចរណ៍និងកសិកម្ម ដើម្បីឱ្យទំហំពាណិជ្ជកម្មនៃប្រទេសទាំងពីរកាន់តែធំទ្វេឡើងថែមទៀត ៕
ចែករំលែកព័តមាននេះ