យោងតាមសេចក្តីប្រកាសព័ត៌មានរបស់ស្ថានទូតអាមេរិកចេញផ្សាយកាលពីថ្ងៃទី១២ មិថុនា ២០១៣បានឲ្យដឹងថា តំណាងផ្នែកស៊ីវិល និង យោធាប្រមាណ១០០នាក់ មកពីសហរដ្ឋអាមេរិក ប្រទេសកម្ពុជា ឡាវ ភូមា ថៃ និង វៀតណាម បានចូលរួមនៅក្នុងលំហាត់សិក្សាលើតុរយៈពេល៣ថ្ងៃ ដោយក្នុងនោះអ្នកចូលរួមបានសហការគ្នា លើការឆ្លើយតបទៅនឹងឆាកនៃព្រឹត្តិការណ៏មានទឹកជំនន់ធំមួយពីទន្លេមេគង្គ និង ដៃទន្លេមេគង្គ ។
លំហាត់ផ្លាស់ប្តូរជំនាញឯកទេសក្នុងការឆ្លើយតបនឹងគ្រោះមហន្តរាយសំរាប់ភាពរឹងមំានៃតំបន់អាស៊ីប៉ាស៊ីហ្វិក បង្ហាញពីការខិតខំដើម្បីត្រៀមរៀបចំសំរាប់គ្រាមានគ្រោះមហន្តរាយនៅពេលខាងមុខ ។
សេចក្តីប្រកាសព័ត៌មានរបស់ស្ថានទូតអាមេរិកដដែលក៏បានបញ្ជាក់ទៀតថា លំហាត់សិក្សាខាងលើនេះ កើតឡើងក្រោមគំនិតផ្តួចផ្តើមរបស់លោកស្រី ហៀលឡារី គ្លីនតុន អតីតរដ្ឋមន្រ្តីក្រសួងការបរទេសអាមេរិកកាលពីខែកក្កដា ២០០៩កន្លងទៅ ក្នុងកិច្ចប្រជុំថ្នាក់រដ្ឋមន្រ្តីនៅភូកេតប្រទេសថៃ ។
ពិធីបិទវគ្គស្តីពីការផ្លាស់ប្តូរជំនាញឯកទេសក្នុងការឆ្លើយតបនឹងគ្រោះមហន្តរាយសម្រាប់ភាពរឹងមំានៃតំបន់អាស៊ីប៉ាស៊ីហ្វិកនេះ នឹងប្រព្រឹត្តទៅនៅម៉ោង៣ រសៀលថ្ងៃទី១៣ មិថុនា ២០១៣ នៅសណ្ឋាគារ រ៉ាហ្វែល ឡឺរ៉ូយ៉ាល់ ក្នុងរាជធានីភ្នំពេញ ៕
ចែករំលែកព័តមាននេះ