AFP ផ្សាយថា រដ្ឋាភិបាលសិង្ហបុរីកំពុងត្រៀមចែកថ្នាំសម្លាប់សត្វល្អិត ពិសេសសម្លាប់មូសដល់ប្រជាជនគ្រប់ក្រុមគ្រួសារ រួមទាំងទទួលក្រុមជំនាញក្នុងការកម្ចាត់មេរោគបន្ថែមជាច្រើននាក់ទៀត ដើម្បីទប់ទល់នឹងវីរុសជំងឺគ្រុនឈាមដែលកំពុងរាតត្បាត ។
នាយកដ្ឋានបរិស្ថានរបស់សិង្ហបុរី (NEA) គូសបញ្ជាក់កាលពីថ្ងៃទី១១ មិថុនាកន្លងមកថា ក្នុងឆ្នាំនេះមានជនជាតិសិង្ហបុរីស្លាប់ដោយជំងឺគ្រុនឈាមចំនួន២នាក់ ខណៈពេលចំនួនអ្នកជំងឺថ្មីក្នុងសប្តាហ៍គិតត្រឹមថ្ងៃទី៨ មិថុនា បានកើនឡើងជាប្រវតិ្តសាស្ត្រដល់ទៅ៨២០នាក់ ។
តាមទិន្នន័យចុងក្រោយកាលពីថ្ងៃទី១១ មិថុនាបង្ហាញថា អ្នកជំងឺគ្រុនឈាមនៅសិង្ហបុរីក្នុងឆ្នាំនេះមានជាង៩.៣០០នាក់ និងកំពុងកើនឡើងយ៉ាងឆាប់រហ័សអាចមានចំនួនដល់ទៅ១៣.៩៨៤នាក់ដូចកាលពីឆ្នាំ២០០៥ ។ រវាងពីខែកក្កដា-សីហា ខាងមុខ អាជ្ញាធរផ្នែកកម្ចាត់មេរោគ និងក្រុមស្ម័គ្រចិត្តនឹងចែកថ្នាំសម្លាប់សត្វល្អិតនៅតាមលំនៅឋានក្នុងសិង្ហបុរី ដែលមានប្រជាជនប្រហែល៥លាននាក់ដោយសង្ឃឹមថា នឹងជួយដល់ប្រជាជនអាចការពារមូសខ្លា និងទប់ស្កាត់ការរីករាលដាលរបស់វីរុសបាន ។
នាយកដ្ឋានខាងលើថែមទាំងបានប្រមូលសកម្មជនជំនាញថ្មីចំនួន៣០០រូបបន្ថែមទៀត ដើម្បីចូលរួមជាមួយអាជ្ញាធរកម្ចាត់មេរោគក្នុងពេលបច្ចុប្បន្នដែលមានសរុប៨៥០រូប ។ជំងឺគ្រុនឈាមកើតចេញពីវីរុស Dengue ដោយមានមូសខ្លាជាអ្នកចម្លង និងមានការរាតត្បាតជាប្រចាំនៅសិង្ហបុរី ស្ថិតក្នុងភូមិសាស្ត្រក្តៅ-សើម ដូចគ្នានឹងបណ្តាប្រទេសជិតខាងក្នុងអាស៊ាន ។អ្នកដែលឆ្លងវីរុស នឹងមានអាការៈគ្រុនក្តៅ ឈឺក្បាល និងឈឺចាប់នៅតាមសន្លាក់ ហើយប្រសិនបើមានអាការៈធ្ងន់ធ្ងរ នឹងមានការហូរឈាមអាចស្លាប់ ។
សិង្ហបុរីជាប្រទេសមួយមានឈ្មោះថា ជាដែនដីដ៏ស្រស់ស្អាត និងមានអនាម័យល្អ សម្រាប់ម្ចាស់ផ្ទះ ដែលបណ្តែតបណ្តោយឱ្យផ្ទះរបស់ខ្លួនក្លាយជាជម្រកមូស អាចទទួលការផាកពិន័យជាទឹកប្រាក់ដល់ទៅ២០០ដុល្លារសិង្ហបុរី និងប្រសិនបើប្រព្រឹត្តខុសជាលើកទី២ នឹងពិន័យខ្ពស់ដល់ទៅ៥.០០០ដុល្លារសិង្ហបុរីរួមទាំងត្រូវជាប់ពន្ធនាគារផងដែរ ៕
ចែករំលែកព័តមាននេះ