រាជធានីភ្នំពេញ ៖ កម្មកររោងចក្រកាត់ដេរម៉ូរៀលដែលមានទីតាំងស្ថិតនៅតាមផ្លូវជាតិលេខ៥ ក្នុងភូមិលូ សង្កាត់ស្វាយប៉ាក ខណ្ឌឫស្សីកែវ បានដួលសន្លប់ជាបន្តបន្ទាប់ចំនួន២១នាក់ កាលពីវេលាម៉ោង១១ និង៣០នាទីព្រឹក ថ្ងៃទី១២ មិថុនា បន្ទាប់ពីមានការទុស្សេចរន្តអគ្គិសនីនៅក្នុងរោងចក្រ ។ ក្រុមកម្មការិនីរងគ្រោះ ត្រូវបានរថយន្តសង្គ្រោះបញ្ជូនទៅមន្ទីរពេទ្យកាល់ម៉ែត ។
រាជធានីភ្នំពេញ ៖ កម្មកររោងចក្រកាត់ដេរម៉ូរៀលដែលមានទីតាំងស្ថិតនៅតាមផ្លូវជាតិលេខ៥ ក្នុងភូមិលូ សង្កាត់ស្វាយប៉ាក ខណ្ឌឫស្សីកែវ បានដួលសន្លប់ជាបន្តបន្ទាប់ចំនួន២១នាក់ កាលពីវេលាម៉ោង១១ និង៣០នាទីព្រឹក ថ្ងៃទី១២ មិថុនា បន្ទាប់ពីមានការទុស្សេចរន្តអគ្គិសនីនៅក្នុងរោងចក្រ ។ ក្រុមកម្មការិនីរងគ្រោះ ត្រូវបានរថយន្តសង្គ្រោះបញ្ជូនទៅមន្ទីរពេទ្យកាល់ម៉ែត ។
ទាក់ទិននឹងការដួលសន្លប់នេះ ត្រូវកម្មករនិយាយថា បណ្តាលមកពីធំក្លិនផ្សែង បន្ទាប់ពីការបាញ់ពន្លត់អគ្គិភ័យ ។ ក្នុងហេតុការណ៍នោះ កម្មករប្រមាណជាង១ពាន់នាក់ បានរត់ប្រសាចយ៉ាងពពាក់ពពូនដោយសារការភ័យខ្លាច ។ តាមព័ត៌មានឱ្យដឹងថា នៅវេលាម៉ោង៩ និង៣០នាទីព្រឹក ថ្ងៃទី១២ មិថុនា ខណៈពេលកម្មករកំពុងធ្វើការ ស្រាប់តែមានទុស្សេចរន្តអគ្គិសនីនៅក្នុងរោងចក្រ ធ្វើឱ្យកម្មករផ្អើលឆោឡោរត់ចេញមកក្រៅ ។ ភ្លាមៗនោះសន្តិសុខ រួមទាំងបុគ្គលិកក្រុមហ៊ុនបាននាំគ្នាយកបំពង់បាញ់ពន្លត់អស់ជាច្រើនបំពង់ ទើបគ្រប់គ្រងស្ថានការណ៍មិនឱ្យមានបញ្ហាធ្ងន់ធ្ងរបាន ។
ក្រោយមកកម្មករក៏បានចូលធ្វើការវិញ ប៉ុន្តែនៅវេលាម៉ោងប្រមាណ១១ និង៣០នាទីព្រឹក ខណៈកំពុងធ្វើការ ស្រាប់តែមានកម្មការិនីម្នាក់ដែលខ្សោយកម្លាំងផង និងធំក្លិនជាតិផ្សែងបំពង់បាញ់ពន្លត់អគ្គិភ័យដែលបាញ់ពន្លត់នោះផង បានដួលសន្លប់ បណ្តាលឱ្យមានការភ្ញាក់ផ្អើលឈុលឡើង ។ ចំណែកកម្មការិនីផ្សេងទៀតក៏ស្លុតចិត្ត បានដួលសន្លប់ជាបន្តបន្ទាប់ទៀត រហូតដល់ចំនួន២១នាក់ ហើយត្រូវបានបញ្ជូនទៅកាន់មន្ទីរពេទ្យកាល់ម៉ែត ។ រីឯកម្មករ-កម្មការិនីផ្សេងទៀតក្នុងរោងចក្រក៏មានការភ្ញាក់ផ្អើលជាខ្លាំង ហើយបាននាំគ្នារត់ចេញប្រសាចទៅផ្ទះវិញ ទាំងភ័យស្លន់ស្លោ ។
នៅក្នុងមន្ទីរពេទ្យ តាមសម្តីកម្មករនិយាយថា មូលហេតុដែលកម្មការិនីដួលសន្លប់ ដោយសារតែពុលក្លិនផ្សែងដែលបាញ់ចេញពីបំពង់ពន្លត់អគ្គិភ័យ ខណៈមានការទុស្សេចរន្តអគ្គិសនី ។ ទោះបីជាយ៉ាងណា កោះសន្តិភាពពុំអាចសុំការបំភ្លឺណាមួយពីខាងរោងចក្រនៅឡើយ ។ គួរបញ្ជាក់ថា រោងចក្រកាត់ដេរម៉ូរៀលនេះ ធ្លាប់មានកម្មករដួលសន្លប់ម្តងរួចមកហើយ កាលពីប្រមាណជាង១ឆ្នាំមុន ដោយសារតែមានការហ្វឹកហាត់កម្មករក្នុងការបាញ់ពន្លត់អគ្គិភ័យ ហើយលើកនេះក៏បានដួលសន្លប់ទៀត ដោយសារតែក្លិនថ្នាំបាញ់ពន្លត់អគ្គិភ័យនេះ ៕
ចែករំលែកព័តមាននេះ