ខេត្តកំពង់ចាម ៖ សាកសពបុរសពុំស្គាល់អត្តសញ្ញាណម្នាក់អាយុប្រហែលជាង៤០ឆ្នាំ បានហើមអណ្តែតរសាត់តាមខ្សែទឹកហូរនៃទន្លេមេគង្គ មកទើរនៅមាត់ច្រាំង ស្ថិតនៅក្នុងភូមិរលា ឃុំកោះសូទិន ស្រុកកោះសូទិន កាលពីវេលាម៉ោង៧និង៤៥នាទីព្រឹកថ្ងៃទី១១ មិថុនា ហើយត្រូវសមត្ថកិច្ច អាជ្ញាធរមូលដ្ឋាន ព្រមទាំងប្រជាពលរដ្ឋនំាំគ្នាអូសឡើងមកកប់នៅមាត់ច្រាំង ដើម្បីស្វែងរក
ខេត្តកំពង់ចាម ៖ សាកសពបុរសពុំស្គាល់អត្តសញ្ញាណម្នាក់អាយុប្រហែលជាង៤០ឆ្នាំ បានហើមអណ្តែតរសាត់តាមខ្សែទឹកហូរនៃទន្លេមេគង្គ មកទើរនៅមាត់ច្រាំង ស្ថិតនៅក្នុងភូមិរលា ឃុំកោះសូទិន ស្រុកកោះសូទិន កាលពីវេលាម៉ោង៧និង៤៥នាទីព្រឹកថ្ងៃទី១១ មិថុនា ហើយត្រូវសមត្ថកិច្ច អាជ្ញាធរមូលដ្ឋាន ព្រមទាំងប្រជាពលរដ្ឋនំាំគ្នាអូសឡើងមកកប់នៅមាត់ច្រាំង ដើម្បីស្វែងរកបងប្អូនដែលបានបាត់សមាជិកគ្រួសារ ។
លោកវរសេនីយ៍ត្រី ម៉ា ចិន្តា អធិការនគរបាលស្រុកកោះសូទិនបានឱ្យដឹងថា សពបុរសពុំស្គាល់អត្តសញ្ញាណនោះពាក់អាវដៃវែងផ្ទៃសលាយក្រឡាពណ៌ក្រហម ស្លៀកខោជើងវែងពណ៌ស ។ សពបានជ្រុះគ្រាប់ភ្នែកពីរមើលមិនស្គាល់ពីភិនភាគមុខមាត់ ត្រូវបានអណ្តែតមកទើរនៅមាត់ច្រាំងត្រង់ចំណុចខាងលើ។
លោក ម៉ា ចិន្តា បន្តថា ក្នុងពេលដែលអណ្តែតមកទើរនៅមាត់ច្រាំងទន្លេនោះ អ្នកភូមិបាននាំគ្នារុញសពឱ្យអណ្តែតចុះទៅក្រោមតាមខ្សែទឹកហូរទៀត ។ ប៉ុន្តែដំណឹងនេះបានឮដល់សមត្ថកិច្ច ក៏ត្រូវបានលោកបញ្ជាឱ្យទៅតាមរកសពនោះជាបន្ទាន់ ក្រែងមានពាក់ព័ន្ធនឹងអំពើឃាតកម្មណាមួយដែលឃាតករយកសាកសពមកទម្លាក់ចូលក្នុងទឹកទន្លេមេគង្គយ៉ាងដូច្នេះ ។ សពអណ្តែតទឹកនោះត្រូវបានសមត្ថកិច្ចតាមរកឃើញពេលអណ្តែតដល់ភូមិទី៨ ឃុំកោះសូទិន រួចចងអូសសណ្តោងយកមកដាក់មាត់ច្រាំងទន្លេ និងបានបង្កើតគណៈកម្មការចម្រុះដើម្បីត្រួតពិនិត្យ ។ ក្នុងនោះមាននគរបាលប៉ុស្តិ៍ឃុំកោះសូទិន អាជ្ញាធរភូមិ-ឃុំ ប៉ុន្តែទោះជាយ៉ាងណា ការពិនិត្យសាកសពនោះគឺមិនឃើញមានស្លាកស្នាមណាមួយនៅលើដងខ្លួនរបស់សពឡើយ ។ តាមការសន្និដ្ឋាន បុរសនេះអាចលោតទឹកទន្លេមេគង្គធ្វើអត្តឃាតមកពីស្រុកលើណាមួយ ឬលង់ទឹកស្លាប់ព្រោះតែមិនចេះហែលទឹក ។
លោកអធិការនគរបាលស្រុកកោះសូទិនបានបញ្ជាក់ថា សពនេះអាចស្លាប់ប្រហែលជា៥ទៅ៧ថ្ងៃមកហើយ ព្រោះហើមស្អុយ ហើយនៅក្នុងហោប៉ៅខោមានកាបូបតូចមួយ ដែលក្នុងនោះមានលុយអាមេរិកចំនួន៤០ដុល្លារ និងលុយខ្មែរ២.៩០០រៀល ត្រូវបានសមត្ថកិច្ចដកយកមករក្សាទុក ។ ប្រសិនបើប្រជាពលរដ្ឋណាបានបាត់បង់សមាជិកដូចមានភិនភាគខាងលើ សូមមេត្តាមកទំនាក់ទំនងជាមួយនឹងអធិការដ្ឋាននគរបាលស្រុកកោះសូទិន នឹងបានដឹងព័ត៌មានពិស្តារបន្ថែមទៀត ។ រហូតមកដល់វេលាម៉ោងជិត៥ល្ងាចទៅហើយ សពនៅតែមិនទាន់មានសាច់ញាតិណាមកតាមសួររកនៅឡើយទេ ៕
ចែករំលែកព័តមាននេះ