ក្រុងប៉ោយប៉ែត ៖ គ្រោះថ្នាក់ចរាចរណ៍ដ៏សាហាវមួយបានបង្កឱ្យរថយន្ត៣គ្រឿង ក្នុងចំណោម៥គ្រឿង ទាំងធំទាំងតូចត្រូវខូចខាតយ៉ាងដំណំ ក្នុងហេតុការណ៍បុកគ្នាជាបន្តបន្ទាប់លើដងផ្លូវជាតិលេខ៥ ខ្លះខ្ទេចមុខ ខ្លះក្រឡាប់កណ្តាលទ្រូងផ្លូវ ក្នុងភូមិកណ្តាល សង្កាត់ផ្សារកណ្តាល ក្រុងប៉ោយប៉ែត កាលពីវេលាម៉ោងជិត៦ល្ងាច ថ្ងៃទី១០ មិថុនា ។
ក្រុងប៉ោយប៉ែត ៖ គ្រោះថ្នាក់ចរាចរណ៍ដ៏សាហាវមួយបានបង្កឱ្យរថយន្ត៣គ្រឿង ក្នុងចំណោម៥គ្រឿង ទាំងធំទាំងតូចត្រូវខូចខាតយ៉ាងដំណំ ក្នុងហេតុការណ៍បុកគ្នាជាបន្តបន្ទាប់លើដងផ្លូវជាតិលេខ៥ ខ្លះខ្ទេចមុខ ខ្លះក្រឡាប់កណ្តាលទ្រូងផ្លូវ ក្នុងភូមិកណ្តាល សង្កាត់ផ្សារកណ្តាល ក្រុងប៉ោយប៉ែត កាលពីវេលាម៉ោងជិត៦ល្ងាច ថ្ងៃទី១០ មិថុនា ។
រថយន្តដែលពាក់ព័ន្ធនិងហេតុការណ៍នៅកន្លែងកើតហេតុ គេឃើញមាន៤គ្រឿង រួមមាន ១-ម៉ាកកាមរី ស៊េរីឆ្នាំ១៩៩៥ ពណ៌សម្បកឪឡឹក ចង្កូតឆ្វេង ពាក់ស្លាកលេខ ភ្នំពេញ 2D-9381 បើកដោយជនមិនស្គាល់អត្តសញ្ញាណជាអ្នករត់តាក់ស៊ី មានទីលំនៅក្រុងសិរីសោភណ្ឌ ។ តាមប្រភពព័ត៌មានឱ្យដឹងថា អ្នករងរបួសត្រូវបញ្ជូនទៅព្យាបាលអស់២នាក់ហើយ ។
២-ម៉ាកឡង់គ្រីស្ស័រ ពណ៌ស ចង្កូតស្តាំ ពាក់ស្លាកលេខ ភ្នំពេញ 2G-2286 បើកដោយឈ្មោះ កែវ សារិន ជាមន្ត្រីយោធាអភិវឌ្ឍន៍ភូមិភាគទី៥ ប្រចាំនៅបន្ទាត់ព្រំដែន ឃុំគោករមៀត ស្រុកថ្មពួក ។ រីឯអ្នកបើកបរមិនមានគ្រោះថ្នាក់ទេ ។ ៣-ម៉ាកតាកូម៉ា ពណ៌ទឹកប្រាក់ ចង្កូតឆ្វេង ពាក់ស្លាកលេខ ភ្នំពេញ 2V-4073 បើកដោយឈ្មោះ ញៀប បូរ ភេទប្រុស អាយុ២៨ឆ្នាំ មានទីលំនៅភូមិប្រជាធម្មខាងលិច សង្កាត់ផ្សារកណ្តាល មិនមានរបួសទេ ប៉ុន្តែរថយន្តផ្ទុះពោងទាំងពីរ ។ ៤-ម៉ាក FUSO ចង្កូតស្តាំ ពណ៌ក្រហម ពាក់ស្លាកលេខ ស្វាយរៀង 3A-0466 អ្នកបើកបរបានរត់គេចខ្លួនបាត់ យកទាំងសោរថយន្តទៅជាមួយ ពុំស្គាល់អត្តសញ្ញាណឡើយ ហើយរថយន្តខាងលើជារថយន្តដឹកស៊ីម៉ង់ត៍ ។
ដោយឡែក រថយន្តមួយគ្រឿងទៀត ម៉ាកហ៊ីណូ ពាក់ស្លាកលេខថៃ ពណ៌ស ចង្កូតស្តាំ ដឹកឧបករណ៍រោងចក្រផលិតហាតឌីស ឱ្យក្រុមហ៊ុន ផលិតហាតឌីស នៅក្រុងប៉ោយប៉ែត ។ រថយន្តមួយគ្រឿងនេះ ក្រោយមានជាប់ពាក់ព័ន្ធ បានបើករត់ចូលទៅក្នុងរោងចក្រ ប៉ុន្តែត្រូវសមត្ថកិច្ចតាមពីក្រោយដល់រោងចក្រ ដើម្បីយករថយន្តទៅរក្សាទុកនៅអធិការដ្ឋាននគរបាលក្រុង តែត្រូវខាងក្រុមហ៊ុន សុំទម្លាក់អីវ៉ាន់លើរថយន្តចុះសិន ។ កន្លែងកើតហេតុ និងរោងចក្រខាងលើមានចម្ងាយពីគ្នាជិត១គីឡូម៉ែត្រ ។
តាមប្រភពព័ត៌មានពីកន្លែងកើតហេតុឱ្យដឹងថា មុនពេលកើតហេតុ មានរថយន្តជាច្រើនគ្រឿងបានបើកបន្តកន្ទុយគ្នា ពីលិច និងខ្លះមកពីកើត លុះដល់ចំណុចកើតហេតុ ក៏បុកគ្នាលាន់ស្នូរដូចរន្ទះផ្ទួនៗគ្នាតែម្តង ។ តាមអ្នកបើករថយន្តឡង់គ្រីស្ស័រនិយាយថា ខណៈរថយន្តរបស់គាត់មកជិតដល់ចំណុចកើតហេតុ រថយន្តពាក់ស្លាកលេខថៃ ស្ថិតនៅពីមុខរថយន្តរបស់គាត់ ទំនងជាចង់បត់ តែទំនងជារារែកចិត្តផង និងមិនមានស៊ីញ៉ូអ្វីនោះទេ បន្ទាប់មកក៏បុកជាមួយរថយន្តកាមរីតែម្តង ។
គាត់បន្តថា ពេលហេតុការណ៍នេះកើតឡើង ស្រាប់តែមានរថយន្តធំមួយគ្រឿងទៀត មកបុកពីក្រោយរថយន្តគាត់រុញបុកផ្ទប់គ្នាជាបន្តបន្ទាប់ ។ ចំណែកអ្នកបើកបររថយន្តតាកូម៉ា និយាយថា រថយន្តគាត់នៅក្រោយគេ ហើយខូចខាតស្ទើរតែដាច់ជា២ ដោយសាររថយន្តម៉ាកហ្វុយហ្សូ ជាអ្នកបុក ។
បើទោះជារូបភាពកន្លែងកើតហេតុមើលទៅគួរឱ្យញាក់សាច់ក៏ដោយ ប៉ុន្តែធាតុពិតនៅកន្លែងកើតហេតុ គ្មានអ្នកណារងគ្រោះដល់ជីវិតទេ ។
ក្រោយពេលកើតហេតុ សមត្ថកិច្ចជំនាញចុះទៅវាស់វែង និងយករថយន្តស្ទូចយករថយន្ត៣គ្រឿង និងរថយន្តពាក់ព័ន្ធទៅរក្សាទុកនៅអធិការដ្ឋាននគរបាលក្រុង រង់ចាំដោះស្រាយ ។ សមត្ថកិច្ចមិនទាន់ឱ្យដឹងពីមូលហេតុដែលគេបុកបន្តកន្ទុយគ្នាគួរឱ្យញាក់សាច់នេះ ជាក់លាក់នៅឡើយទេ ៕
ចែករំលែកព័តមាននេះ