រាជធានីភ្នំពេញ ៖ រថយន្តកូរ៉េស៊េរីចាស់មួយគ្រឿង ខណៈបើកជែងម៉ូតូហើយគេចជង្ហុកផងនោះក៏ធ្លាក់ផ្លូវក្រឡាប់ផ្អៀង ចាក់កម្មករទាំងអស់ដេកដួលរដូករណែលពេញដីរបួសធ្ងន់១៧នាក់ និងស្រាលជាង១០នាក់ ក្នុងនោះស្ត្រីម្នាក់មានផ្ទៃពោះផងដែរ ។ ក្រោយពេលកើតហេតុ ជនរងគ្រោះភាគច្រើនជាកម្មការិនីត្រូវរថយន្តសង្គ្រោះ៧១១របស់មន្ទីរពេទ្យកងពលតូចលេខ៧០ យកទៅ
រាជធានីភ្នំពេញ ៖ រថយន្តកូរ៉េស៊េរីចាស់មួយគ្រឿង ខណៈបើកជែងម៉ូតូហើយគេចជង្ហុកផងនោះក៏ធ្លាក់ផ្លូវក្រឡាប់ផ្អៀង ចាក់កម្មករទាំងអស់ដេកដួលរដូករណែលពេញដីរបួសធ្ងន់១៧នាក់ និងស្រាលជាង១០នាក់ ក្នុងនោះស្ត្រីម្នាក់មានផ្ទៃពោះផងដែរ ។ ក្រោយពេលកើតហេតុ ជនរងគ្រោះភាគច្រើនជាកម្មការិនីត្រូវរថយន្តសង្គ្រោះ៧១១របស់មន្ទីរពេទ្យកងពលតូចលេខ៧០ យកទៅសង្គ្រោះបន្ទាន់នៅក្នុងមន្ទីរពេទ្យបង្អែកពោធិ៍ចិនតុង និងមន្ទីរពេទ្យកាល់ម៉ែត ឯស្ត្រីមានផ្ទៃពោះម្នាក់បានទៅមន្ទីរពេទ្យផ្សេងដោយខ្លួនឯង ។
គ្រោះថ្នាក់ក្រឡាប់រថយន្តនេះបានកើតឡើង កាលពីវេលាម៉ោង៦និង៣០នាទីព្រឹកថ្ងៃទី១១ មិថុនា នៅលើកំណាត់ផ្លូវបែកចានភ្នំប្រសិទ្ធត្រង់ចំណុចភូមិថ្ម សង្កាត់ឪឡោក ខណ្ឌពោធិ៍សែនជ័យ ។ រថយន្តដែលក្រឡាប់មា៉កទីតាន់ ពណ៌ខៀវ ពាក់ស្លាកលេខភ្នំពេញ 2K-2541 បើកបរដោយបុរសម្នាក់ឈ្មោះ ម៉ៅ ហាក់ អាយុ២៨ឆ្នាំ មានលំនៅភូមិតាពែក ឃុំជ្រៃលាស់ ស្រុកពញាឮ ខេត្តកណ្តាល ។
ប្រភពព័ត៌មានពីកម្មការិនីរងគ្រោះម្នាក់និយាយថា រថយន្តខាងលើបានដឹកពួកគេចេញពីភូមិតាពែក ឃុំជ្រៃលាស់ ស្រុកពញាឮ ខេត្តកណ្តាលមួយចំនួន និងមួយចំនួនទៀតនៅសង្កាត់ពន្សាំង ខណ្ឌពោធិ៍សែនជ័យ ក្នុងបំណងទៅធ្វើការរោងចក្រនៅម្តុំផ្សារបែកចានស្រុកអង្គស្នួល ។ ប្រភពដដែលបន្តថា ខណៈរថយន្តបើកពីជើងទៅត្បូងក្នុងល្បឿនលឿន ដល់ពាក់កណ្តាលផ្លូវ បានជ្រុលចង្កូតប្រុងបុកគូទរថយន្តមួយគ្រឿងម្តងរួចមកហើយ ប៉ុន្តែពេលនោះអ្នកបើកបរគេចផុតបន្តិចប៉ុណ្ណោះ ។ នៅពេលនោះកម្មករ-កម្មការិនី ស្រែកទាំងភ័យតក់ស្លុត និងបានប្រាប់ទៅអ្នកបើកបរកុំឱ្យបើកលឿនពេក ។
ពេលទៅដល់ចំណុចកើតេហតុ មានម៉ូតូមា៉កគុបជ្រុងមួយគ្រឿងបើកស្របទិសគ្នា ។ ខណៈនោះអ្នកបើកបររថយន្តមិនបន្ថយល្បឿនទេ បែរជាបន្ថែមលឿនជែងម៉ូតូ ដល់ទន្ទឹមគ្នាបានគេចជង្ហុក ក៏រេចង្កូតធ្លាក់ផ្លូវក្រឡាប់ទាំងកំរោលតែម្តង ។ ប្រភពបន្តទៀតថា បុរសបើកបររថយន្តឈ្មោះម៉ៅ ហាក់ នេះជាសាច់ញាតិម្ចាស់រថយន្តដែលជាប់រវល់ពឹងឱ្យជួយបើកជំនួសមានគ្រោះថ្នាក់តែម្តង ។ រថយន្តត្រូវសមត្ថកិច្ចយកទៅរក្សាទុកព្រមទាំងឃាត់ខ្លួនអ្នកបើកបរដើម្បីចាត់ការតាមផ្លូវច្បាប់ ៕
ចែករំលែកព័តមាននេះ