ខេត្តសៀមរាប ៖ ក្រុមមន្ត្រីមូលដ្ឋានបានឱ្យដឹងថា ក្រុមហ៊ុនចិនដែលមានសិទ្ធិរុករករ៉ែក្រោមដីនៅក្នុងភូមិសាស្ត្រឃុំខ្វាវ នៃស្រុកជីក្រែង បានបន្តសកម្មភាពដោយដឹកដីរ៉ែចេញទៀតហើយ បន្ទាប់ពីក្រសួងជំនាញបានផ្អាកសកម្មភាពអស់មួយរយៈដោយសារតែការល្មើសដឹកដីរ៉ែរាប់រយតោនចេញពីតំបន់នេះ ។ ថ្វីបើយ៉ាងនេះក្តី ក្រុមមន្ត្រីមិនអាចបញ្ជាក់ពីឈ្មោះក្រុមហ៊ុនចិននោះបានទេ
ខេត្តសៀមរាប ៖ ក្រុមមន្ត្រីមូលដ្ឋានបានឱ្យដឹងថា ក្រុមហ៊ុនចិនដែលមានសិទ្ធិរុករករ៉ែក្រោមដីនៅក្នុងភូមិសាស្ត្រឃុំខ្វាវ នៃស្រុកជីក្រែង បានបន្តសកម្មភាពដោយដឹកដីរ៉ែចេញទៀតហើយ បន្ទាប់ពីក្រសួងជំនាញបានផ្អាកសកម្មភាពអស់មួយរយៈដោយសារតែការល្មើសដឹកដីរ៉ែរាប់រយតោនចេញពីតំបន់នេះ ។ ថ្វីបើយ៉ាងនេះក្តី ក្រុមមន្ត្រីមិនអាចបញ្ជាក់ពីឈ្មោះក្រុមហ៊ុនចិននោះបានទេ គ្រាន់តែអះអាងថាក្រុមហ៊ុននោះមានច្បាប់ត្រឹមត្រូវពីក្រសួងឧស្សាហកម្ម រ៉ែ និងថាមពល ក្នុងដំណាក់កាលសិក្សាស្រាវជ្រាវ តែមិនមែនធ្វើអាជីវកម្មទេ ។
ទាក់ទិនទៅនឹងសកម្មភាពរុករករ៉ែក្រោមដីនេះ លោក គុយ ហ៊ត មេឃុំខ្វាវកាលពីថ្ងៃទី២៩ ឧសភា ឆ្នាំ២១៣ កន្លងទៅ បានមានប្រសាសន៍ប្រាប់តាមទូរស័ព្ទថា ក្រុមហ៊ុនចិននេះបានបន្តដំណើរការរុករករ៉ែអស់រយៈពេលជិតកន្លះឆ្នាំមកហើយ ដោយប្តូរពីការដ្ឋានភ្នំខ្ទុំទៅតំបន់ប៉ែកខាងឦសាន ឃុំខ្វាវ តំបន់ព្រំប្រទល់រវាងស្រុកជីក្រែងរបស់ខេត្តសៀមរាប ជាមួយស្រុកគូលែនរបស់ខេត្តព្រះវិហារ ។
លោកមេឃុំបានបញ្ជាក់យ៉ាងដូច្នេះថា «រៀងរាល់ព្រឹក ក្រុមហ៊ុនចិននេះគេបានប្រើប្រាស់រថយន្តតូចធំជាច្រើនគ្រឿងដឹកកម្មករទាំងចិនទាំងខ្មែរ ដោយមានទាំងម៉ាស៊ីនស្ទង់រករ៉ែ ទាំងឧបករណ៍ខួងដីផង ចូលទៅក្នុងព្រៃភូមិសាស្ត្រខាងលើ ប្រើបំពង់ដែកវែងៗមានមុខកាត់ប្រមាណ១តឹកកន្លះខួងចូលទៅក្នុងជម្រៅដី រួចហើយគេយកដីរ៉ែទាំងនោះដាក់នៅក្នុងហិបឈើគ្របយ៉ាងស្អាតដឹកចេញ» ។ លោកបានបន្ថែមថា សកម្មភាពក្រុមហ៊ុននេះថ្វីបើបច្ចុប្បន្នពុំមានអ្វីប៉ះពាល់ជាដុំកំភួនដល់បរិស្ថាននិងសុខភាពប្រជាពលរដ្ឋ ប៉ុន្តែគេបានយកគ្រឿងចក្រឈូសឆាយដីធ្វើផ្លូវចូលព្រៃបណ្តាលឱ្យដាច់ទំនប់ និងភ្លឺស្រែប្រជាពលរដ្ឋអស់ជាច្រើនកន្លែងដោយពុំមានការទទួលខុសត្រូវឡើយ ។
ដោយលើកឡើងស្រដៀងគ្នានេះដែរ នាយប៉ុស្តិ៍នគរបាលរដ្ឋបាលឃុំខ្វាវ លោកអនុសេនីយ៍ទោ ហុក វ៉ាន់ បានថ្លែងប្រាប់តាមទូរស័ព្ទថា ពិតជាមានការបង្កឱ្យអន្តរាយដល់ទំនប់ និងភ្លឺស្រែប្រជាពលរដ្ឋមែន សូម្បីតែស្រែរបស់លោកក៏គេមិនទាន់ជួសជុលឱ្យវិញផង។ លោកបានបន្ថែមថា ក្រុមហ៊ុននេះពីដើមមានមូលដ្ឋាននៅភ្នំខ្ទុំ ដោយមានការការពារយ៉ាងតឹងតែងពីកម្លាំងទាហាន ប៉ុន្តែពេលនេះជំនួសដោយកម្លាំងប៉ូលិស និងកងរាជអាវុធហត្ថស្រុកជីក្រែងម្តង ។ តាមស្ថិតិដែលទទួលបាន ក្រុមហ៊ុនចិននេះមានបុគ្គលិកជំនាញជាជនជិចិនចំនួន៧នាក់ និងកម្មករខ្មែរមួយចំនួនទៀត ។
យោងតាមឯកសារដែលកោះសន្តិភាពទទួលបាន គឺក្រុមហ៊ុននេះមានអាជ្ញាប័ណ្ណចេញដោយក្រសួងឧស្សាហកម្ម រ៉ែ និងថាមពល នៅថ្ងៃទី១៦ មីនា ២០១០ នៅលើផ្ទៃដីទំហំ៨០គីឡូម៉ែត្រការ៉េក្នុងភូមិសាស្ត្រខាងលើដើម្បីសិក្សាស្រាវជ្រាវរ៉ែលោហៈ ។ នៅឆ្នាំ២០១១ ក្រុមហ៊ុននេះបានធ្វើសកម្មភាពជីកកកាយថ្មនៅចំណុចភ្នំខ្ទុំដឹកចេញពីតំបន់នោះរាប់រយតោន ដើម្បីនាំចេញបន្តទៅបរទេស ប៉ុន្តែជាអកុសលក៏លេចធ្លាយព័ត៌មានដល់រាជរដ្ឋាភិបាល ទើបមានការផ្អាកដំណើរការមួយរយៈ លុះពេលនេះស្រាប់តែឃើញដំណើរការនិងបន្តដឹកដីរ៉ែចេញទៀត ។
មន្ត្រីបរិស្ថានមួយរូបសុំមិនបញ្ចេញឈ្មោះនិយាយថា កាលពីខែមុនគេបានឃើញក្រុមហ៊ុនចិនខាងលើធ្វើសកម្មភាពដឹកដីរ៉ែចេញចំនួន៣រថយន្តទួរីសទាំងយប់ចេញពីតំបន់ឃុំខ្វាវនោះឆ្ពោះទៅកាន់ផ្លូវជាតិលេខ៦ ។អភិបាលស្រុកជីក្រែង លោក ប៉ោក សេរីរ័ត្នមុន្នី កាលពីព្រឹកថ្ងៃទី៥ មិថុនាកន្លងមកមានប្រសាសន៍ថា លោកមិនទាន់ដឹងពីព័ត៌មានក្រុមហ៊ុនដឹកដីរ៉ែចេញពីតំបន់ភូមិសាស្ត្រឃុំខ្វាវនោះនៅឡើយទេ ប៉ុន្តែលោកបញ្ជាក់ថា ក្រុមហ៊ុននោះពុំមានច្បាប់ធ្វើអាជីវកម្មទេ មានតែច្បាប់រុករក (សិក្សាស្រាវជ្រាវ) ដូច្នេះគេមិនអាចដឹកដីរ៉ែចេញដូចពេលមុនបានទេ ។
ពេញមួយរសៀលថ្ងៃចន្ទ ទី១០ មិថុនា កោះសន្តិភាពមិនអាចស្វែងរកជួបបុគ្គលិក ឬប្រធានក្រុមហ៊ុនចិនរុករករ៉ែខាងលើ ដើម្បីសុំការបំភ្លឺជុំវិញព័ត៌មានដែលចោទថាមានការលួចដឹកដីរ៉ែចេញពីតំបន់ដែលកំពុងសិក្សានោះបានទេ ដោយសារតែគ្មានអ្នកស្គាល់លេខទូរស័ព្ទ ៕
ចែករំលែកព័តមាននេះ