ខេត្តបន្ទាយមានជ័យ ៖ គ្រោះថ្នាក់ចរាចរណ៍ដ៏សាហាវមួយបានបង្កឲ្យរថយន្ត ៣គ្រឿង ក្នុងចំណោម ៥គ្រឿង ធំតូចត្រូវខូចខាតយ៉ាងដំណំ ខណៈពេលបុកគ្នាជាបន្តបន្ទាប់លើកំណាត់ផ្លូវជាតិលេខ៥ ខ្លះខ្ទេចខ្លះក្រឡាប់ផ្ងារជើងកណ្តាលទ្រូងផ្លូវក្នុងភូមិផ្សារកណ្តាល សង្កាត់ផ្សារកណ្តាល ក្រុងប៉ោយប៉ែត ខេត្តបន្ទាយមានជ័យ បង្កឲ្យមានការភ្ញាក់ផ្អើល កាលពីវេលាម៉ោងជិត ៦ល្ងាច ថ្ងៃទី១០ មិថុនា ២០១៣ ។
រថយន្តដែលពាក់ព័ន្ឋនៅកន្លែងកើតហេតុ គេឃើញមាន ៤គ្រឿង រួមមាន ១.ម៉ាកកាមរី ស៊េរីឆ្នាំ១៩៩៥ ពណ៌សំបកឪឡឹក ចង្កូតឆ្វេង ពាក់ស្លាកលេខ ភ្នំពេញ ២D-៩៣៨១ បើកបរដោយជនមិនស្គាល់ឈ្មោះ ជាអ្នករត់តាក់ស៊ី មានទីលំនៅក្រុងសិរីសោភ័ណ ខេត្តបន្ទាយមានជ័យ រងរបួសធ្ងន់ត្រូវគេបញ្ជូនទៅសង្រ្គោះបាត់ ។ ២.រថយន្តម៉ាកឡង់គ្រឺស័រ ពណ៌ស ចង្កូតស្តាំពាក់ស្លាកលេខ ភ្នំពេញ ២G-២២៨៦ បើកបរដោយឈ្មោះ កែវ សារិន ជាមន្ត្រីយោធាអភិវឌ្ឍន៍ភូមិភាគ៥ ប្រចាំនៅបន្ទាត់ព្រំដែន ឃុំគោករមៀត ស្រុកថ្មពួក (មិនមានគ្រោះថ្នាក់អ្វីទេ) ។
៣.រថយន្តម៉ាកតាកូម៉ា ពណ៌ទឹកប្រាក់ ចង្កូតឆ្វេង ពាក់ស្លាកលេខ ភ្នំពេញ ២V-៤០៧៣ បើកបរដោយឈ្មោះ ញៀប បូរះ ភេទប្រុស អាយុ ២៨ឆ្នាំ មានទីលំនៅភូមិប្រជាធម្មលិច សង្កាត់កើតហេតុខាងលើ (មិនមានរបួសទេ) ប៉ុន្តែ រថយន្តផ្ទុះពោងទាំងពីរ ៤.រថយន្តម៉ាក FUSO ចង្កូតស្តាំ ពណ៌ក្រហម ពាក់ស្លាកលេខ ស្វាយរៀង ៣A–០៤៦៦ អ្នកបើកបររត់បាត់យកទាំងសោររថយន្តទៅទៀត ពុំស្គាល់អត្តសញ្ញាណឡើយ ហើយរថយន្តខាងលើជារថយន្តដឹកស៊ីម៉ង់ដ៍ ។
ដោយឡែករថយន្ត ១គ្រឿងទៀតម៉ាកអ៊ីណូ ពាក់ស្លាកលេខថៃ ពណ៌ស ចង្កូតស្តាំ ដឹកឧបករណ៍រោងចក្រផលិតហាតឌីសឲ្យក្រុមហ៊ុនផលិតហាតឌីស្ក នៅក្នុងភូមិកើតហេតុ ។ រថយន្តមួយគ្រឿងនេះ ក្រោយមានជាប់ពាក់ព័ន្ធបានបើករត់ចូលទៅក្នុងរោងចក្រ ប៉ុន្តែ ត្រូវសមត្ថកិច្ចតាមពីក្រោយដល់រោងចក្រ ដើម្បីយករថយន្តទៅទុកនៅអធិការដ្ឋាននគរបាលក្រុង តែត្រូវខាងក្រុមហ៊ុនសុំទម្លាក់ឥវ៉ាន់លើរថយន្តសិន ដែលកន្លែងកើតហេតុ និងរោងចក្រខាងលើមានចម្ងាយពីគ្នាជិតមួយគីឡូម៉ែត្រ។
តាមប្រភពពីកន្លែងកើតហេតុបានប្រាប់ថា ដំបូងមានរថយន្តជាច្រើនបើកបរបន្តកន្ទុយគ្នាមកពីទិសខាងលិច និងខ្លះមកពីទិសខាងកើត លុះដល់ចំណុចកើតហេតុ ក៏លាន់ឮស្នូរបុកគ្នាដូចរន្ទះតែម្តង ។ តាមអ្នកបើកបររថយន្តឡង់គ្រូស័រ បង្ហើបថា ខណៈរថយន្តរបស់គាត់មកជិតដល់ចំណុចកើតហេតុ រថយន្តពាក់ស្លាកលេខថៃ បានស្ថិតនៅពីមុខរថយន្តរបស់គាត់ទំនងជាចង់បត់ផងរារែកចិត្តផង ដោយមិនមានស៊ីញ៉ូអ្វីនោះទេ បន្ទាប់មកក៍បុកប្រាវជាមួយរថយន្តកាមរី ។ គាត់បន្តទៀតថា លុះហេតុការណ៍កើតឡើងស្រាប់តែមានរថយន្តធំមកបុកពីក្រោយរុញគ្នាជាបន្តបន្ទាប់តែម្តង ។
បើទោះជារូបភាពនៅកន្លែងកើតហេតុមើលទៅគួរឲ្យញាក់សាច់ ប៉ុន្តែ ធាតុពិតនៅកន្លែងកើតហេតុគ្មានអ្នករងគ្រោះច្រើន និងដល់អាយុជីវិតទេ គឺរបួសត្រឹមតែអ្នកបើកបររថយន្តកាមរីតែម្នាក់ប៉ុណ្ណោះ ។ ក្រោយហេតុការណ៍សមត្ថកិច្ចជំនាញ បានចុះដល់កន្លែងកើតហេតុធ្វើការវាស់វែង និងរករថយន្តស្ទូចមកស្ទូចរថយន្តរងគ្រោះទាំង៣ និងនាំយករថយន្តពាក់ព័ន្ឋទៅកាន់អធិការនគរបាលក្រុង ដើម្បីរង់ចាំធ្វើការដោះស្រាយ ។ សមត្ថកិច្ចមិនទាន់ប្រាប់ពីមូលហេតុឲ្យបានជាក់លាក់នៅឡើយទេ ដោយប្រាប់ថា ទៅមិនទាន់ហេតុការណ៍ដូចគ្នា ៕
ចែករំលែកព័តមាននេះ