ផ្លូវលេខ៣១០ប្រវែងជិត២០គីឡូម៉ែត្រ រងការខូចខាតដោយសារទឹកជំនន់

ថ្ងៃទី ០៨ ខែ វិច្ឆិកា ឆ្នាំ ២០១៨

ម៉ោង ២២:០៥

ខេត្តព្រៃវែង ៖ ទឹកជំនន់ ដែលបានជន់លិចកាលពីជាង១ខែមុននេះ មិនត្រឹមតែបានធ្វើឲ្យប៉ះពាល់ដល់ផលដំណាំ ដីស្រែចម្ការ និងផ្ទះសម្បែងរបស់បងប្អូនប្រជាពលរដ្ឋ ស្ទើរទូទាំងខេត្តព្រៃវែងនោះទេ ក្នុងនោះផ្លូវលំ ផ្លូវបេតុង និងផ្លូវកៅស៊ូជាច្រើនកន្លែង ក៏រងនូវការខូចខាតដោយសារតែកម្លាំងទឹកបោកផ្ទប់ និងហូរច្រោះផងដែរ។ ជាក់ស្តែង ផ្លូវជាតិលេខ៣១០ ដែលតភ្ជាប់ពីផ្លូវជាតិលេខ១ ត្រង់ចំណុចផ្សារកំពង់សឹង្ហ ឆ្ពោះទៅដល់ផ្សារដីក្រហម ក្នុងឃុំរាធរ ស្រុកព្រះស្តេច ប្រវែងប្រមាណជា២០គីឡូម៉ែត្រ ក៏រងការខូចខាតយ៉ាងខ្លាំងផងដែរ ដោយកន្លែងខ្លះត្រូវទឹកច្រោះបាក់ចិញ្ចើមថ្នល់ កន្លែងខ្លះច្រោះបាក់នៅតាមគល់ស្ពាន និងកន្លែងខ្លះទៀតទឹកហូរច្រោះកាត់ខូចកណ្តាលផ្លូវតែម្តង។

ប្រជាពលរដ្ឋនៅក្នុងស្រុកព្រះស្តេចនេះ បានលើកឡើងថា បច្ចុប្បន្ននេះពួកគាត់មានការព្រួយបារម្ភណាស់ ពេលមានភ្លៀងធ្លាក់មកម្តងៗ គឺខ្លាចទឹកហូរច្រោះធ្វើឲ្យផ្លូវលេខ៣១០នេះ កាត់តែខូចខ្លាំងថែមទៀត ព្រោះរហូតមកដល់ពេលនេះ នៅពុំទាន់ឃើញមានអាជ្ញាធរ ឬមន្ត្រីជំនាញណា ចុះមកធ្វើការជួសជុលនោះទេ។ ចំពោះបញ្ហានេះត្រូវបានលោក ភុន សម្ភស្ស អភិបាលស្រុកព្រះស្តេចបញ្ជាក់ឲ្យដឹងថា ផ្លូវលេខ៣១០នេះ ពិតជាបានរងការខូចខាតដោយសារទឹកជំនន់នាពេលកន្លងមកមែន ហើយរូបលោក និងអាជ្ញាធរមូលដ្ឋាន បានជួយចាក់ដីជួសជុលកន្លែងដែលខូចខាតខ្លាំង ដើម្បីសម្រួលដល់ការធ្វើដំណើររបស់បងប្អូន ប្រជាពលរដ្ឋ ជាបណ្តោះអាសន្នហើយ ចំណែកខាងកងវិស្វកម្ម និងធ្វើការជួសជុលទាំងស្រុងឡើងវិញ នៅអំឡុងខែមេសា ឆ្នាំ២០១៩ខាងមុខ។

គួរបញ្ជាក់ផងដែរថា ផ្លូវលេខ៣១០នេះ ត្រូវបានស្ថាបនាឡើងដោយកងវិស្វកម្ម របស់ឯកឧត្តម ឈន សារ៉ាណេ ដោយបានចាប់ផ្តើមធ្វើកាលពីឆ្នាំ២០១៥ និងបានធ្វើរួចរាល់កាលពីពាក់កណ្តាលឆ្នាំ២០១៨នេះ ដោយប្រើប្រាស់ថវិកាជាតិ តាមរយៈក្រសួងសាធារណការ និងដឹកជញ្ជួន ហើយបើតាមគម្រោងអំឡុង ពេលនេះ គឺស្ថិតនៅក្នុងរយៈពេលនៃការថែទាំរបស់កងវិស្វកម្មនៅឡើយ គឺមិនទាន់ប្រគល់ឲ្យអាជ្ញាធរទេ៕