ខេត្តកណ្តាល ៖ រថយន្តកាមរីឆ្លាមមួយគ្រឿងដឹកមនុស្សពេញ បានគេចជង្ហុកជ្រុលទៅបុកជាមួយរ៉ឺម៉កដឹកសត្វជ្រូក បណ្តាលឱ្យរថយន្ត និងរ៉ឺម៉ករេចេញពីផ្លូវធ្លាក់ចូលក្នុងប្រឡាយទឹកទាំងព្រឹក ធ្វើឱ្យមនុស្សដែលជិះលើរ៉ឺម៉ក២នាក់រងរបួស និងជ្រូកចំនួន៣ក្បាលបានងាប់ លើផ្លូវជាតិលេខ២ ចន្លោះគីឡូម៉ែត្រ៣០-៣១ ស្ថិតក្នុងភូមិព្រៃតាតូច ឃុំបឹងខ្យាង ស្រុកកណ្តាលស្ទឹង នៅថ្ងៃទី១០
ខេត្តកណ្តាល ៖ រថយន្តកាមរីឆ្លាមមួយគ្រឿងដឹកមនុស្សពេញ បានគេចជង្ហុកជ្រុលទៅបុកជាមួយរ៉ឺម៉កដឹកសត្វជ្រូក បណ្តាលឱ្យរថយន្ត និងរ៉ឺម៉ករេចេញពីផ្លូវធ្លាក់ចូលក្នុងប្រឡាយទឹកទាំងព្រឹក ធ្វើឱ្យមនុស្សដែលជិះលើរ៉ឺម៉ក២នាក់រងរបួស និងជ្រូកចំនួន៣ក្បាលបានងាប់ លើផ្លូវជាតិលេខ២ ចន្លោះគីឡូម៉ែត្រ៣០-៣១ ស្ថិតក្នុងភូមិព្រៃតាតូច ឃុំបឹងខ្យាង ស្រុកកណ្តាលស្ទឹង នៅថ្ងៃទី១០ មិថុនា ។
ប្រភពពីសាក្សីនិយាយថា នៅវេលាម៉ោង៨ និង៣០នាទីព្រឹក រថយន្តកាមរីឆ្លាម ពណ៌ត្រីឆ្លូញ ពាក់ស្លាកលេខ ភ្នំពេញ 2Q-7644 ផ្ទុកមនុស្សពេញធ្វើដំណើរតាមផ្លូវជាតិលេខ២ ពីជើងទៅត្បូងយ៉ាងលឿន លុះមកដល់ផ្សារដើមអំពិល ឃុំបឹងខ្យាង មានរ៉ឺម៉កដឹកសត្វជ្រូក ជិះដោយប្តីប្រពន្ធ២នាក់ ធ្វើដំណើរពីត្បូងមកជើងបញ្ច្រាសគ្នា ពេលនោះរថយន្តកាមរីឆ្លាមបានគេចជង្ហុក ចូលទៅចំណែកផ្លូវម្ខាងទៀត ក៏ជ្រុលទៅបុកជាមួយរ៉ឺម៉កពេញទំហឹង បណ្តាលឱ្យរថយន្ត និងរ៉ឺម៉កធ្លាក់ចូលទៅក្នុងប្រឡាយទឹកខ្ទាតមនុស្ស និងសត្វជ្រូកចូលទៅក្នុងព្រៃតែម្តង ហើយរថយន្តខូចខាតមួយកំណាត់ខាងមុខ ឯរ៉ឺម៉កបានដាច់ចេញពីម៉ូតូ ។
ប៉ូលិសចរាចរស្រុកកណ្តាលស្ទឹងឱ្យដឹងថា មនុស្សដែលជិះក្នុងរថយន្តគឺជាក្រុមគ្រួសារតែមួយ បើកបរដោយឈ្មោះ សេម ប្រុស អាយុ២៨ឆ្នាំ មានលំនៅភូមិព្រៃទទឹង ឃុំសំរោង ខេត្តតាកែវ តែមិនមាននរណាម្នាក់រងរបួសឡើយ ។ ដោយឡែក ប្តីប្រពន្ធជាម្ចាស់ជ្រូក រងរបួសតិចតួច ចំណែកសត្វជ្រូក៣ក្បាល ក្នុងចំណោមសត្វជ្រូក៧ក្បាលបានងាប់ ៕
ចែករំលែកព័តមាននេះ