ប្រទេសកូរ៉េខាងត្បូង និងកូរ៉េខាងជើង បានបញ្ចប់កិច្ចប្រជុំរៀបចំមួយកាលពីថ្ងៃទី១០មិថុនា នៅភូមិប៉ានមុនហ្សូមជាប់ព្រំដែន ដែលនោះជាកិច្ចពិភាក្សាគ្នាអន្តររដ្ឋាភិបាលលើកដំបូង ចាប់តាំងពីជាង២ឆ្នាំកន្លងមកនេះ ។ក្រសួងបង្រួបបង្រួមកូរ៉េខាងត្បូងបានរៀបចំធ្វើសន្និសីទសារព័ត៌មានមួយក្រោយបញ្ចប់កិច្ចប្រជុំ នាព្រឹកថ្ងៃទី១០ មិថុនានោះ ។
ក្នុងឱកាសនៃកិច្ចប្រជុំនេះ បណ្តាតំណាងរបស់ភាគីទាំង២បានពិភាក្សាគ្នាដោយលម្អិតពីកិច្ចប្រជុំថ្នាក់រដ្ឋមន្ត្រីនាពេលខាងមុខនេះ ដែលត្រូវធ្វើនៅក្រុងសេអ៊ូលនាថ្ងៃទី១២និងទី១៣ មិថុនា ។ ក្នុងឱកាសនៃកិច្ចប្រជុំរៀបចំនេះ កូរ៉េទាំង២សម្រេចបានកិច្ចព្រមព្រៀងគ្នាមួយដែលទាក់ទិនដល់កិច្ចប្រជុំថ្នាក់រដ្ឋមន្ត្រីនោះ ។ ក៏ប៉ុន្តែភាគីទាំង២បានសម្រេចហៅកិច្ចប្រជុំនាពេលខាងមុខនេះថា កិច្ចប្រជុំរបស់អាជ្ញាធរអន្តរកូរ៉េ ហើយពុំមែនកិច្ចប្រជុំថ្នាក់រដ្ឋមន្ត្រីឡើយ រួចគណៈប្រតិភូកូរ៉េខាងជើងគ្រោងមកកាន់ក្រុងសេអ៊ូលតាមផ្លូវគោក ។ គណៈប្រតិភូនីមួយៗនឹងរួមមានមនុស្ស៥នាក់ ។
ក្នុងសេចក្តីប្រកាសមួយ កូរ៉េខាងត្បូងថ្លែងថា ក្រុងសេអ៊ូលបានសម្រេចចិត្តផ្តោតលើបញ្ហានានាដូចជា ការធ្វើឱ្យមានប្រក្រតីភាពឡើងវិញនៃប្លុកឧស្សាហកម្មកាអឺសុង ការបើកឡើងវិញនូវទេសចរណ៍អន្តរកូរ៉េនៅភ្នំ KUMGANG បញ្ហាមនុស្សធម៌ទាំងឡាយ ក្នុងនោះមានការជួបជុំគ្នារបស់បណ្តាសាច់ញាតិ គ្រួសារ ដែលព្រាត់ប្រាស់គ្នា ព្រមទាំងបញ្ហាឯទៀតៗដែលត្រូវដោះស្រាយជាបន្ទាន់ជាមួយកូរ៉េខាងជើង ។
ទោះបីជាយ៉ាងណា សេចក្តីប្រកាសចេញផ្សាយដោយកូរ៉េខាងជើងមានការខុសគ្នាបន្តិច ។ កូរ៉េខាងជើងនិយាយថា គេត្រូវពិភាក្សាគ្នាលើបញ្ហាទាំងឡាយដែលត្រូវដោះស្រាយជាបន្ទាន់ដូចជា ការធ្វើឱ្យមានប្រក្រតីភាពឡើងវិញនៅប្លុកឧស្សាហកម្មកាអឺសុង ការបើកទេសចរណ៍ឡើងវិញនៅភ្នំ KUMGANG ការជួបជុំគ្នារបស់បណ្តាគ្រួសារដែលព្រាត់ប្រាស់គ្នា ការរៀបចំធ្វើរួមគ្នានូវព្រឹត្តិការណ៍រំលឹកដល់ខួបចុះហត្ថលេខាលើសេចក្តីថ្លែងការណ៍រួមរវាងកូរ៉េទាំង២ ថ្ងៃទី១៥ មិថុនា ឆ្នាំ២០០០ និងសេចក្តីប្រកាសរួម ចុះថ្ងៃទី៤ កក្កដា ឆ្នាំ១៩៧២ ព្រមទាំងលេើការផ្លាស់ប្តូរជាឯកជនទាំងឡាយជាមួយកូរ៉េខាងត្បូង ។
ប្រភពរដ្ឋាភិបាលកូរ៉េខាងត្បូងមួយនិយាយថា កូរ៉េទាំង២ពុំទាន់អាចសម្រេចបានកិច្ចព្រមព្រៀងគ្នាមួយទាក់ទិនដល់គ្រប់បញ្ហាទាំងអស់ទើបភាគីទាំង២សម្រេចចេញផ្សាយដាច់ដោយឡែកពីគ្នានូវសេចក្តីប្រកាសរៀងៗខ្លួន។កិច្ចប្រជុំការងារនេះ ចាប់ផ្តើមពីម៉ាង១០និង១៥នាទីព្រឹកថ្ងៃទី៩ មិថុនា ហើយបញ្ចប់នាវេលាម៉ោង៣និង៤០នាទីទៀបភ្លឺថ្ងៃទី១០ មិថុនា ។ មន្ត្រីជាន់ខ្ពស់របស់ក្រសួងបង្រួបបង្រួមកូរ៉េខាងត្បូង លោក CHUN HAE-SUNG ដឹកនាំគណៈប្រតិភូមួយមានសមាជិក៣រូប ហើយ៦គណៈប្រតិភូកូរ៉េខាងជើងមានសមាជិក៣រូបដូចគ្នា ដឹកនាំដោយលោកស្រី KIM SONG-HYE មន្ត្រីជាន់ខ្ពស់របស់គណៈកម្មាធិការបង្រួបបង្រួមជាតិដោយសន្តិវិធីរបស់កូរ៉េខាងជើង ៕
ចែករំលែកព័តមាននេះ