រាជធានីភ្នំពេញ ៖ កម្ពុជានឹងនាំយកទឹកស្ពែមគោពូជធំពីបរទេស មកបង្កាត់គោកម្ពុជា ឲ្យមានពូជធំៗដែរ ក្នុងគោលបំណងសម្រាប់ផ្គត់ផ្គង់សាច់សម្រាប់ក្នុងស្រុក និងនាំចេញទៅក្រៅប្រទេស ។ នេះបើយោងតាមការប្រកាសរបស់រដ្ឋមន្ត្រីក្រសួងកសិកម្ម រុក្ខាប្រមាញ់…
រាជធានីភ្នំពេញ ៖ កម្ពុជានឹងនាំយកទឹកស្ពែមគោពូជធំពីបរទេស មកបង្កាត់គោកម្ពុជា ឲ្យមានពូជធំៗដែរ ក្នុងគោលបំណងសម្រាប់ផ្គត់ផ្គង់សាច់សម្រាប់ក្នុងស្រុក និងនាំចេញទៅក្រៅប្រទេស ។ នេះបើយោងតាមការប្រកាសរបស់រដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ ថ្លែងនៅមុខអ្នកសារព័ត៌មានកាលពីចុង
សប្ដាហ៍មុន ។
បើតាមលោក វេង សាខុន រដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ បានមានឲ្យដឹងថា ក្រសួងបាននិងកំពុងផ្សព្វផ្សាយដល់ប្រជាកសិករកម្ពុជា ឲ្យយល់ដឹងពីការបង្កាត់ពូជគោធំៗដើម្បីទទួលប្រាក់ចំណូលច្រើន ជាជាងការចិញ្ចឹមគោពូជកណ្ដុរកន្លាតបន្តទៀត ។ លោករដ្ឋមន្ត្រីបន្ដថា ៖« ដើម្បីពង្រីកពូជគោនេះឲ្យបានទូទាំងប្រទេស និងចំណាយ ថវិកាតិច មានតែវិធីសាស្ត្រ យកទឹកស្ពែមចែកចាយដល់កសិករតាមបណ្ដាខេត្ត យកទៅចាក់បញ្ចូលក្នុងគោមេ ដោយមិនចាំបាច់ចំណាយគោបាដែលមានពូជធំៗនោះទេ »។
លោកបន្តថា ការបង្កាត់ពូជគោនេះឡើង គឺផ្ដល់ប្រយោជន៍ច្រើនណាស់ដល់កសិករ ។ ជាក់ស្ដែង បើសិនជាកសិករនៅតែបន្តចិញ្ចឹមគោកណ្ដុរកន្លាតទៅទៀតនោះ ពួកគាត់នឹងមិនទទួលបានផល់ចំណេញប៉ុន្មាននោះទេ ពីព្រោះគោកណ្ដុរកន្លាតមានមាឌតូច លក់បានតម្លៃទាប ហើយត្រូវការពេលវេលាចិញ្ចឹមប្រហាក់ប្រហែលគ្នាផងដែរ ប៉ុន្តែបើសិនជាកសិករងាកមកចិញ្ចឹមគោពូជធំ ដែលក្រសួងបានប្រកាសផ្សព្វផ្សាយ នោះ ពួកគាត់នឹងរកចំណូលបានច្រើន ។
លោករដ្ឋមន្ត្រីបន្តថា ៖« បើយើងចូលទៅក្នុងភោជនីយដ្ឋានធំៗនៅក្នុងរាជធានីភ្នំពេញ ហើយសួរថាសាច់គោដែលយកមកធ្វើជាសាច់ស្តេក ( Steak ) មានប្រភពមកពីណា នោះយើងនឹងបានចម្លើយជាសាច់នាំចូលជាពិសេសនោះចូលពីប្រទេសអូស្ត្រាលី ចំពោះសាច់គោខ្មែរយើងវិញ មិនមានហាងឆេងចូលទៅក្នុងហាងធំៗនោះទេ ដូចនេះយើងគួរតែងាកមកចិញ្ចឹមគោប្រភេទធំៗ ដើម្បីផ្គត់ផ្គង់តាមទីផ្សារក្នុងស្រុក និងនាំចេញទៅប្រទេសក្រៅវិញ ។ ការចិញ្ចឹមគោពូជធំៗ នឹងផ្ដល់សាច់ល្អៗដល់ម្ចាស់ហាងក្នុងស្រុក និងអាចនាំចេញ ទៅកាន់ប្រទេសជិតខាងដែលមានតម្រូវការ ហើយជំហានដំបូង យើងនឹងធ្វើបន្តិចម្ដងៗ និងព្យាយាមពង្រីកឲ្យបានទូទាំងប្រទេសកម្ពុជា តែម្ដង » ។ យ៉ាងណាក៏ដោយ មិនដឹងថា គម្រោងរបស់រាជរដ្ឋាភិបាលដែលមានក្រសួងកសិកម្ម ជាអ្នកអនុវត្តនេះ នឹងទទួលបានជោគជ័យឬយ៉ាងណានោះទេ ខណៈដែលកន្លងមក មានវិនិយោគិនមួយក្រុមបានសាកល្បងចិញ្ចឹមគោអូស្ត្រាលី នៅក្នុងខេត្តព្រះសីហនុ ក៏ប៉ុន្តែហាក់មិនទទួលបានជោគជ័យនោះទេ ហើយសព្វថ្ងៃក្រុមហ៊ុនក៏ផ្អាកដំណើរការដែរ ។
ជាមួយគ្នានេះដែរ កម្ពុជាក៏មានគម្រោងចិញ្ចឹមពូជគោដាណាម៉ាកសម្រាប់ផលិតទឹកដោះផងដែរ ដែលនឹងដំណើរការនៅអំឡុងខែធ្នូ ឆ្នាំ២០១៨នេះ មានទីតាំងនៅខេត្តព្រះវិហារ ជាការវិនិយោគដោយលោកបណ្ឌិត សុខ ទូច ប្រធានរាជបណ្ឌិត្យសភាកម្ពុជា សហការជាមួយវិនិយោគិនបរទេស ក្នុងទំហំទឹកប្រាក់ប្រមាណ២,៥លានដុល្លារអាមេរិក ។
បើតាមលោកបណ្ឌិត សុខ ទូច បានបញ្ជាក់កន្លងមកថា លោកគ្រោងសាកល្បងចិញ្ចឹមពូជគោដាណាម៉ាក (Danamark) ដែលនាំចូលពីប្រទេសថៃចំនួន២០០ក្បាល មកចិញ្ចឹមក្នុងកសិដ្ឋានមួយស្ថិតនៅស្រុកឆែប ខេត្តព្រះវិហារ ដើម្បីផលិតទឹកដោះសម្រាប់វេចខ្ចប់ផ្គត់ផ្គង់ទីផ្សារក្នុងស្រុក ។លោកអះអាងថា ប្រសិនបើការសាកល្បងលើមេគោចំនួន២០០ក្បាលនេះទទួលបានជោគជ័យ ជំហានបន្ដក្រុមហ៊ុនមានគម្រោងបង្កើតធនាគារគោ ដោយបង្កាត់ពូជនិងទិញមេគោជាច្រើនមកប្រវាស់ឱ្យប្រជាពលរដ្ឋនៅតំបន់ជុំវិញជាអ្នកចិញ្ចឹម រីឯក្រុមហ៊ុនជាអ្នកដើរប្រមូលទិញទឹកដោះគោស្រស់ពីកសិករ ហើយវេចខ្ចប់សម្រាប់នាំយកទៅលក់នៅទីផ្សារបន្ត ៕
ចែករំលែកព័តមាននេះ