អ្នកស្រុកក្លុង ឃុំហាងដុង ខេត្ដឈៀងមៃ ខណៈជិះរថយន្ដមួយបាំងកន្លះទៅដកផ្សិតនៅពេលភ្លៀងបណ្ដាលឱ្យរថយន្ដបាត់ជំហធ្លាក់ចូលជ្រោះជម្រៅជាង២៥ម៉ែត្រ ធ្វើឱ្យស្រ្ដីដែលជិះនៅផ្នែកខាងក្រោយរថយន្ដ ធ្លាក់ទៅទង្គិចនឹងថ្មស្លាប់២នាក់ និង៧នាក់ទៀតរបួស ចំណែកអ្នកបើកបររបួសស្រាល ត្រូវប៉ូលិសចាប់ឃាត់ខ្លួនដើម្បីសួរនាំ ។
អ្នកស្រុកក្លុង ឃុំហាងដុង ខេត្ដឈៀងមៃ ខណៈជិះរថយន្ដមួយបាំងកន្លះទៅដកផ្សិតនៅពេលភ្លៀងបណ្ដាលឱ្យរថយន្ដបាត់ជំហធ្លាក់ចូលជ្រោះជម្រៅជាង២៥ម៉ែត្រ ធ្វើឱ្យស្រ្ដីដែលជិះនៅផ្នែកខាងក្រោយរថយន្ដ ធ្លាក់ទៅទង្គិចនឹងថ្មស្លាប់២នាក់ និង៧នាក់ទៀតរបួស ចំណែកអ្នកបើកបររបួសស្រាល ត្រូវប៉ូលិសចាប់ឃាត់ខ្លួនដើម្បីសួរនាំ ។
កាសែតថៃផ្សាយថា កាលពីព្រឹកថ្ងៃទី៤ មិថុនា ប៉ូលិសប៉ុស្ដិ៍ក្លុង ឃុំហាងដុង ទទួលព័ត៌មានថា មានរថយន្ដមួយបាំងកន្លះមួយគ្រឿងធ្លាក់ចូលទៅក្នុងជ្រោះ ត្រង់ចន្លោះគីឡូម៉ែទ្រលេខ១១-១២ ស្ថិតក្នុងឃុំហាងដុង ដោយមានអ្នកស្លាប់ និងរបួសជាច្រើននាក់ ។ ក្រោយមក ប៉ូលិសនាំកម្លាំងចម្រុះទៅកន្លែងកើតហេតុប្រទះឃើញរថយន្ដមួយបាំងកន្លះម៉ាកតូយ៉ាតា ពណ៌ស មួយគ្រឿង ធ្លាក់ដល់បាតជ្រោះជម្រៅជាង២៥ម៉ែត្រ និងមានអ្នកស្លាប់២នាក់ របួស៧នាក់ត្រូវបញ្ជូនទៅព្យាបាលនៅមន្ទីរពេទ្យ ។
តាមការសាកសួរឱ្យដឹងថា មុនពេលកើតហេតុ រថយន្ដបើកបរដោយលោក ថេន ព្រំផាត អាយុ៤៣ឆ្នាំ ជាអ្នកស្រុកនៅក្នុងឃុំហាងដុង ដឹកស្រ្ដី៩នាក់រស់នៅក្នុងភូមិទៅដកផ្សិត ស្របពេលតាមផ្លូវមានភ្លៀងធ្លាក់ស្រិចៗ ធ្វើឱ្យផ្លូវរអិល បណ្ដាលឱ្យរថយន្ដបាត់ជំហធ្លាក់ទៅក្នុងជ្រោះក្បែរផ្លូវតែម្ដង ។ អ្នកបើកបររថយន្ដ ត្រូវប៉ូលិសឃុំខ្លួនក្នុងដំណាក់កាលដំបូង និងចោទប្រកាន់ពីបទបើកបររថយន្ដក្នុងការប្រមាថ ទើបបណ្ដាលឱ្យមានអ្នកស្លាប់និងរបួស ៕
ចែករំលែកព័តមាននេះ