ខេត្ដកំពង់ឆ្នាំង ៖ សោកនាដកម្មដ៏រន្ធត់មួយបានធ្វើឱ្យមនុស្ស៣នាក់ស្លា.ប់យ៉ាងអាណោចអាធ័មក្នុងហេតុការណ៍គ្រោះថ្នាក់ចរាចរណ៍កើតឡើងកាលពីវេលាម៉ោង១០និង៣០នាទីយប់ ថ្ងៃទី៥ មិថុនា នៅតាមបណ្ដោយផ្លូវជាតិលេខ៥ ក្នុងចន្លោះគីឡូម៉ែត្រលេខ៧៥និង៧៦ នៅចំណុចភូមិចារថ្មី ឃុំអណ្ដូងស្នាយ ស្រុករលាប្អៀរ ខណៈរថយន្ដកុងតឺន័ររបស់ថៃបានទៅបុកគូទរថយន្ដហ៊ីយ៉ាន់
ខេត្ដកំពង់ឆ្នាំង ៖ សោកនាដកម្មដ៏រន្ធត់មួយបានធ្វើឱ្យមនុស្ស៣នាក់ស្លាប់យ៉ាងអាណោចអាធ័មក្នុងហេតុការណ៍គ្រោះថ្នាក់ចរាចរណ៍កើតឡើងកាលពីវេលាម៉ោង១០និង៣០នាទីយប់ ថ្ងៃទី៥ មិថុនា នៅតាមបណ្ដោយផ្លូវជាតិលេខ៥ ក្នុងចន្លោះគីឡូម៉ែត្រលេខ៧៥និង៧៦ នៅចំណុចភូមិចារថ្មី ឃុំអណ្ដូងស្នាយ ស្រុករលាប្អៀរ ខណៈរថយន្ដកុងតឺន័ររបស់ថៃបានទៅបុកគូទរថយន្ដហ៊ីយ៉ាន់ដាយខ្មែរដែលឈប់ស្ងៀម ដើម្បីចុះពិនិត្យមើលកង់រថយន្ដ ។
មន្ដ្រីប៉ូលិសចរាចរ ស្រុករលាប្អៀរ ឱ្យដឹងថា មុនពេលកើតហេតុរថយន្ដម៉ាកហ៊ីយ៉ាន់ដាយ ពណ៌ត្រេអីុ ពាក់ស្លាកលេខ កំពង់ធំ3A-0874 បើកបរដោយឈ្មោះ យ៉ាំ សេងហៃ អាយុ២៨ឆ្នាំ មានលំនៅឃុំដើមមាន ស្រុកព្រៃឈរ ខេត្ដកំពង់ចាម បានផ្ទុះកង់ក្រោយខាងស្ដាំ ភ្លាមនោះអ្នកបើករថយន្ដបានឈប់អែបស្ដាំ ។ បន្ទាប់មកឈ្មោះ យ៉ាំ សេងហៃ ដែលជាអ្នកបើកបរបានចុះទៅពិនិត្យមើលកង់រថយន្ដ ខណៈដែលកំពុងមើលកង់ក្រោយនោះ ស្រាប់តែមានរថយន្ដកុងតឺន័រមួយគ្រឿងទៀត បើកមកបុកពីក្រោយរថយន្ដដែលឈប់ស្ងៀមពេញទំហឹង រុញទៅមុខជាង១០ម៉ែត្រ ធ្វើឱ្យអ្នកបើករថយន្ដហ៊ីយ៉ាន់ដាយឈ្មោះ យ៉ាំ សេងហៃ បានកៀបស្លាប់នៅក្រោមរថយន្ដ ។ ចំណែកអ្នកបើករថយន្ដកុងតឺន័រ ពណ៌ស ពាក់ស្លាកលេខ THAILAND60.3484 និងអ្នកជិះជាមួយម្នាក់ទៀតបានកៀបជាប់ក្នុងកាប៊ីនរថយន្ដស្លាប់យ៉ាងវេទនាបំផុត ។
ប្រភពដដែលបន្ដថា រថយន្ដដែលបុកគេពីក្រោយនោះជារថយន្ដរបស់ប្រទេសថៃ ដឹកសម្ភារអគ្គិសនីមកលក់នៅប្រទេសកម្ពុជា ។ បើតាមអ្នកបើករថយន្ដប្រទេសថៃ ដែលមានមុខរបរដូចគ្នានេះដែរនិយាយថា រថយន្ដនេះជាចំណែករបស់ថៅកែជនជាតិថៃម្នាក់ និងខ្មែរម្នាក់។ ជាទម្លាប់រថយន្ដនេះពេលឆ្លងព្រំដែនចូលមកប្រទេសកម្ពុជា គឺជនជាតិខ្មែរជាអ្នកបើក លុះដល់ទឹកដីថៃជនជាតិថៃជាអ្នកបើក គឺគេផ្លាស់ប្ដូរគ្នាដើម្បីធ្វើអាជីវកម្ម ហើយរថយន្ដនេះជារថយន្ដថ្មីដែលទើបនឹងទិញជាង២ខែប៉ុណ្ណោះ ។
សពអ្នកបើករថយន្ដហ៊ីយ៉ាន់ដាយ ត្រូវបានក្រុមគ្រួសារដឹកទៅធ្វើបុណ្យតាមប្រពៃណី ចំណែកសពជនជាតិថៃម្នាក់ និងខ្មែរម្នាក់ដែលពុំទាន់ស្គាល់អត្ដសញ្ញាណត្រូវប៉ូលិសគាស់ចេញពីកាប៊ីនរថយន្ដយកទៅតម្កល់ទុកក្នុងវត្ដដែលនៅជិតនោះ ដើម្បីរង់ចាំក្រុមគ្រួសារមកទទួលយកទៅធ្វើបុណ្យតាមប្រពៃណី ។ ដោយឡែករថយន្ដទាំងពីរគ្រឿងបញ្ជូនទៅរក្សាទុកនៅការិយាល័យប៉ូលិសចរាចរផ្លូវគោកនៃស្នងការដ្ឋាននគរបាលខេត្ដ រង់ចាំការដោះស្រាយតាមនីតិវិធីច្បាប់ ៕
ចែករំលែកព័តមាននេះ