រាជធានីភ្នំពេញ ៖ កម្មវិធីជំនួបរវាងវិនិយោគិនជប៉ុនចំនួនជាង៣០ក្រុមហ៊ុន ជាមួយនឹងក្រុមហ៊ុនក្នុងស្រុកមួយចំនួនដើម្បីពង្រីកលើមុខរបរជំនួញ ឱ្យកាន់តែទូលំទូលាយឡើងថែមទៀត និងប្រកបដោយភាពកក់ក្តី ត្រូវបានធ្វើឡើងនៅសណ្ឋាគារសូហ្វីតែលភ្នំពេញភូគីត្រាកាលពីថ្ងៃទី២ មិថុនា ក្រោមអធិបតីភាពលោកស៊ាង ប៊ុនលាង ទីប្រឹក្សាផ្ទាល់សម្តេចអគ្គមហាសេនាបតីតេជោ ហ៊ុន សែន
រាជធានីភ្នំពេញ ៖ កម្មវិធីជំនួបរវាងវិនិយោគិនជប៉ុនចំនួនជាង៣០ក្រុមហ៊ុន ជាមួយនឹងក្រុមហ៊ុនក្នុងស្រុកមួយចំនួនដើម្បីពង្រីកលើមុខរបរជំនួញ ឱ្យកាន់តែទូលំទូលាយឡើងថែមទៀត និងប្រកបដោយភាពកក់ក្តី ត្រូវបានធ្វើឡើងនៅសណ្ឋាគារសូហ្វីតែលភ្នំពេញភូគីត្រាកាលពីថ្ងៃទី២ មិថុនា ក្រោមអធិបតីភាពលោកស៊ាង ប៊ុនលាង ទីប្រឹក្សាផ្ទាល់សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា និងជាទីប្រឹក្សាក្រសួងមហាផ្ទៃ ។
វត្តមាននាឱកាសនោះ គេសង្កេតឃើញមានលោកអីុ វ៉ាម៉ូតូ ប្រធានក្រុមហ៊ុន ARIX GROUP អមដោយសហការីជាច្រើនរូប លោកហ៊ន់ ស៊ាងហុង និងលោកស្រី ហេង ច័ន្ទបុប្ផា អគ្គនាយកក្រុមហ៊ុន KHJ GROUP ទទួលបន្ទុកទំនាក់ទំនងភ្ញៀវវិនិយោគក្រៅប្រទេស និងជួយទ្រទ្រង់វិស័យមនុស្សធម៌ វិស័យអប់រំ ។
លោកស៊ាង ប៊ុនលាង ទីប្រឹក្សាក្រសួងមហាផ្ទៃ បានគូសបញ្ជាក់ថា រូបលោកពិតជាមានកិត្តិយសយ៉ាងក្រៃលែង ដែលបានមកចូលរួមជាអធិបតីក្នុងកម្មវិធីនេះ ដោយបានធ្វើបទបង្ហាញស្តី ពីសក្តានុពលវិនិយោគនៅកម្ពុជា ហើយក៏ជាឱកាសដែលត្រូវចែករំលែកនូវចំណេះដឹងទាក់ទងនឹងវិស័យវិនិយោគលើធនធានធម្មជាតិ និងហេដ្ឋារចនាសម្ព័ន្ធប្រកបដោយសក្កានុពល នៅក្នុងព្រះរាជាណាចក្រកម្ពុជាយើង ។
លោកស៊ាង ប៊ុនលាង បានបន្តថា ការធ្វើអាជីវកម្មលើធនធានធម្មជាតិនៅក្នុងព្រះរាជាណាចក្រកម្ពុជានាពេលបច្ចុប្បន្ននេះ មានក្រុមហ៊ុនជាតិ និងអន្តរជាតិចំនួន៧៧បាននិងកំពុងបណ្តាក់ទុនរុករករ៉ែ ហើយត្រូវបានក្រសួងឧស្សាហកម្មរ៉ែនិងថាមពល ផ្តល់អាជ្ញាប័ណ្ណរហូតដល់ទៅ៨៧ ក្រុមហ៊ុនដើម្បីធ្វើការស្រាវជ្រាវ រុករកនិងធ្វើអាជីវកម្មរ៉ែ នៅតាមបណ្តាខេត្តនានាទូទាំងប្រទេសកម្ពុជា ។ ជាក់ស្តែងនៅព្រះរាជាណាចក្រកម្ពុជា មានធនធានធម្មជាតិជាច្រើនប្រភេទ ក្នុងនោះមានដូចជារ៉ែមាស ដែក ទង់ដែង អាលុយមីញ៉ូម ស័ង្កសី ទីតាញូ៉ម ម៉ង់ហ្គាណែស ត្បូង ធ្យូងថ្ម ស៊ីម៉ងត៍ផូស្វាត សំណប៉ាហាំង ថ្មម៉ាប ប្រេងកាតនិងឧស្ម័នដែលមានសក្តានុពលខ្ពស់និងជាទីចំណាប់អារម្មណ៍ខ្លាំងបំផុត ចំពោះវិនិយោគិនជាតិនិងអន្តរជាតិ ដែលបាននិងកំពុងដាក់ទុនរកស៊ីនៅប្រទេសកម្ពុជា នាពេលបច្ចុប្បន្ននិងសម្រាប់ទៅថ្ងៃអនាគត ។
លោកស៊ាង ប៊ុនលាង បានគូសបញ្ជាក់ថា នៅក្នុងបណ្តាក្រុមហ៊ុនទាំង៧៧ រួមមានក្រុមហ៊ុនជប៉ុន អូស្ត្រាលី ចិន កូរ៉េ ថៃ និងវៀតណាម ។ ក្នុងនោះ៦០ក្រុមហ៊ុនកំពុងតែធ្វើវិនិយោគលើការរុករករ៉ែលោហៈ ៥ក្រុមហ៊ុនវិនិយោគលើការរុករករ៉ែមិនមែនលោហៈ ៥ក្រុមហ៊ុនវិនិយោគលើការរុករកត្បូង ៥ក្រុមហ៊ុនវិនិយោគលើការរុករករ៉ែធ្យូងថ្ម និងប្រេងឥន្ធនៈ ២ក្រុមហ៊ុនទៀតវិនិយោគលើការរុករករ៉ែបុកស៊ីតនិងសំណបាំហាំង។
សូមបញ្ជាក់ថា តាមរយៈការធ្វើបទបង្ហាញនេះបានធ្វើឱ្យវិនិយោគិនជប៉ុន មានការចាប់អារម្មណ៍គ្រប់គ្នាអំពីសក្តានុពលនៅប្រទេសកម្ពុជា ប្រកបដោយការរីកចម្រើនគ្រប់វិស័យ ។ នៅពេលត្រឡប់ទៅវិញវិនិយោគិនជប៉ុននឹងធ្វើការពិចារណា ហើយនឹងមកបណ្តាក់ទុនឆាប់ៗនាពេលខាងមុខ លើវិស័យរោងចក្រនិងនាំទំនិញទៅវិញទៅមក ដើម្បីអភិវឌ្ឍប្រទេស ៕
ចែករំលែកព័តមាននេះ