រាជធានីភ្នំពេញ ៖ ធនាគារជាតិនៃកម្ពុជា (NBC) បានប្រកាសអនុញ្ញាតឲ្យមានការធ្វើចរាចរណ៍ប្រាក់យន់ចិនក្នុងការទូទាត់ពាណិជ្ជកម្មនៅកម្ពុជា ហើយស្ថាប័នតំណាងជាតិនេះបានធ្វើសន្និសីទសារព័ត៌មានមួយកាលពីព្រឹកថ្ងៃទី៣០ តុលា ម្សិលមិញ ដើម្បីបញ្ជាក់ពីជំហរនៃការប្រើប្រាស់រូបិយប័ណ្ណរបស់ចិន ។…
រាជធានីភ្នំពេញ ៖ ធនាគារជាតិនៃកម្ពុជា (NBC) បានប្រកាសអនុញ្ញាតឲ្យមានការធ្វើចរាចរណ៍ប្រាក់យន់ចិនក្នុងការទូទាត់ពាណិជ្ជកម្មនៅកម្ពុជា ហើយស្ថាប័នតំណាងជាតិនេះបានធ្វើសន្និសីទសារព័ត៌មានមួយកាលពីព្រឹកថ្ងៃទី៣០ តុលា ម្សិលមិញ ដើម្បីបញ្ជាក់ពីជំហរនៃការប្រើប្រាស់រូបិយប័ណ្ណរបស់ចិន ។
លោកជំទាវ ជា សិរី អគ្គនាយកបច្ចេកទេសធនាគារជាតិនៃកម្ពុជា មានប្រសាសន៍ប្រាប់ក្រុមអ្នកសារព័ត៌មានថា ៖« រាល់ការទូទាត់ពាណិជ្ជកម្មរវាងកម្ពុជា និងចិន យើងទទួល និងលើកទឹកចិត្តដល់ពាណិជ្ជករកម្ពុជាទូទាត់ឱ្យចិនជាលុយយន់ ហើយយើងក៏ចង់ឱ្យខាងចិនទូទាត់ឱ្យពាណិជ្ជករខ្មែរជាលុយរៀលដែរ » ។
លោកជំទាវបញ្ជាក់ថា ៖« នេះជាយុទ្ធសាស្ត្រមួយរបស់ធនគារជាតិនៃកម្ពុជាដែលបានដើរតាមគន្លងនិន្នាការអន្តរជាតិ ហើយយើងកំពុងតែជំរុញការប្រើប្រាស់ប្រាក់រៀលដោយប្រយោល»។
លោកជំទាវបញ្ជាក់ថា ៖« ការជំរុញការទូទាត់រូបិយប័ណ្ណចិនក្នុងផ្នែកពាណិជ្ជកម្មនេះមិនមែនមានន័យថា យើងជំរុញឱ្យគេ[ចិន] ដឹកក្រដាសលុយយន់មកប្រើនៅក្នុងប្រទេសកម្ពុជានោះទេ ។ កិច្ចសហការនេះ ខាងធនាគារជាតិនៃកម្ពុជាក៏មិនមែនធ្វើជាមួយភាគចិនដែរ ដោយបច្ចុប្បន្ននេះ នៅក្នុងតំបន់អាស៊ានគេចង់ជំរុញការទូទាត់លុយរូបិយវត្ថុជាតិរៀងៗខ្លួនជាមួយប្រទេសនៅក្នុងតំបន់ ដោយសារប្រទេសក្នុងតំបន់អាស៊ាន មិនចង់ពឹងផ្នែកខ្លាំងតែទៅលើលុយដុល្លារ អឺរ៉ូ ឬលុយផោននោះទេ »។ លោកជំនាវលើកឡើងថា ៖« ការធ្វើទូទាត់ពាណិជ្ជកម្មជារូបិយវត្ថុជាតិរៀងខ្លួនៗនេះ គឺជាការឱ្យតម្លៃទៅលើរូបិយវត្ថុជាតិរបស់ខ្លួន និងមិនរំពឹងទៅលើលុយប្រទេសផ្សេងច្រើនពេកខ្លាចនៅពេលលុយប្រទេសទាំងនោះមានបញ្ហាវាអាចធ្វើឱ្យប៉ះពាល់។ ដូចនេះត្រូវតែកាត់បន្ថយការប្រើប្រាស់លុយដុល្លារ ហើយជំរុញការទូទាត់លុយដែលជារូបិយវត្ថុជាតិរៀងខ្លួនៗ »។
លោកជំទាវសង្កត់ធ្ងន់ថា ៖« អ្វីដែលយើងធ្វើនេះ លុយមានតែនៅក្នុងប្រព័ន្ធធនាគារនោះទេ(តួលេខ) »។
ទេសាភិបាលរងធនាគារជាតិនៃកម្ពុជា លោក ស៊ុំ សន្និសីទ បានមានប្រសាសន៍ក្នុងវេទិកាមួយទាក់ទងនឹងការប្រើប្រាស់ប្រាក់យន់កាលពីពេលថ្មីៗនេះថា កន្លងមកធនាគារជាតិនៃកម្ពុជាបានអនុញ្ញាតឲ្យធនាគារចំនួន២ ធ្វើជាធនាគារផាត់ទាត់ប្រាក់យន់ គឺធនាគារBOC និងធនាគារICBC និងធនាគារពាណិជ្ជ ចំនួន១៣ផ្សេងទៀត ធ្វើប្រតិបត្តិការប្រាក់យន់ ។
តាមរយៈការដាក់ឲ្យដំណើរការនេះ វិនិយោគិន ពាណិជ្ជករ និងអ្នកទទួលចំណូលជាប្រាក់យន់ អាចទូទាត់ ខ្ចី និងដាក់ប្រាក់បញ្ញើជាប្រាក់យន់ក្នុងប្រព័ន្ឋធនាគារដែលអនុញ្ញាតឲ្យធនាគារជាតិនៃកម្ពុជា អាចគ្រប់គ្រងចរាចរប្រាក់យន់បានល្អប្រសើរ និងរួមចំណែកជំរុញកំណើនពាណិជ្ជកម្ម ការវិនិយោគ និងទេសចរណ៍មកពីប្រទេសចិន អាចចាយប្រាក់យន់នៅកម្ពុជាបាន ។ លោក ស៊ុំ សន្និសីទ បានគាំទ្រការប្រើប្រាស់ប្រាក់យន់នៅកម្ពុជា តាមរយៈប្រព័ន្ឋធនាគារ ដើម្បីសម្រួលពាណិជ្ជកម្មទ្វេភាគី ការវិនិយោគ និងទេសចរណ៍ជាដើម ។
នាយកមជ្ឈមណ្ឌលសិក្សាគោលនយោបាយ លោក ច័ន្ទ សុផល បានមានប្រសាសន៍ថា លំហូរប្រាក់យន់មកកម្ពុជា ជាសញ្ញាវិជ្ជមានក្នុងការជំរុញកំណើនសេដ្ឋកិច្ចកម្ពុជា ដោយលោកគិតថា វាផ្តល់ភាពងាយស្រួលដល់ភ្ញៀវទេសចរចិន មកទស្សនា និងវិនិយោគនៅកម្ពុជា ។ លោកបន្តថា ៖« ការទូទាត់ប្រាក់យន់ មិនមានបញ្ហាអ្វីឡើយនៅក្នុងសេដ្ឋកិច្ចកម្ពុជា តែមានតែចំណេញដល់សេដ្ឋកិច្ច »។
ប្រធាននាយកប្រតិបត្តិធនាគារអេស៊ីលីដាលោក អុិន ចាន់នី បានគាំទ្រការប្រើប្រាស់ប្រាក់យន់នៅកម្ពុជាផងដែរ ដោយលោកបានថ្លែងថា កន្លងមកធនាគារជាតិនៃកម្ពុជា មិនដែលបានហាមឃាត់ការចរាចរ ឬការទូទាត់ប្រាក់យន់នៅកម្ពុជានោះទេ ហេតុនេះ ការចរាចរប្រាក់យន់ មិនមែនជារឿងថ្មីនោះឡើយ ។ ផ្ទុយទៅវិញការដាក់ឲ្យចរាចរប្រាក់យន់កាន់តែទូលំទូលាយ វាផ្តល់នូវផលចំណេញ និងជម្រើសកាន់តែសម្បូរបែបក្នុងការទូទាត់ពាណិជ្ជកម្មនានា ។ លោកបណ្ឌិតបន្តថា ៖« ពីមុនការធ្វើពាណិជ្ជកម្មកម្ពុជា-ចិន ប្រើប្រាស់ជាប្រាក់ដុល្លារ តែពេលនេះអាចប្រើប្រាស់ប្រាក់យន់បានហើយ»។ លោកថា ៖« ការចាយប្រាក់យន់ដើម្បីទិញទំនិញប្រើប្រាស់ ក៏មិនមានការហាមឃាត់ដែរ មានន័យថា អ្នកកាន់ប្រាក់យន់អាចទិញកាហ្វេ និងបង់ប្រាក់សណ្ឋាគារជាដើម »។
លោកឧកញ៉ា លឹម ហេង អនុប្រធានសភាពាណិជ្ជកម្មកម្ពុជា ថ្លែងកន្លងមកថា ការប្រើប្រាស់ប្រាក់យន់ក្នុងវិស័យពាណិជ្ជកម្ម នឹងផ្ដល់ជាជម្រើស និងភាពងាយស្រួល ដោយយើងអាចជ្រើសរើសជាប្រាក់ដុល្លារ ឬប្រាក់យន់បាន ។លោកមានប្រសាសន៍ថា ៖« ការជំរុញឱ្យមានការប្រើប្រាស់ប្រាក់យន់ ក្នុងវិស័យពាណិជ្ជកម្មនេះ ខ្ញុំគិតថា វាជាចំណុចល្អមួយ ហើយក្នុងនាមជាសភាពាណិជ្ជកម្មតំណាងវិស័យឯកជនគាំទ្រ ព្រោះយើងមិនចង់បានការទូទាត់មានតែមួយជម្រើសទេ គឺចង់បានជម្រើសច្រើន ដើម្បីធានាការទូទាត់ពេលធ្វើពាណិជ្ជកម្ម ។ ការជំរុញការប្រើប្រាស់ប្រាក់យន់នៅកម្ពុជានេះ ខ្ញុំគិតថា វាមិនមានអ្វីជាបញ្ហាប្រឈមទេ ព្រោះចិនក៏ទទួលយកប្រាក់រៀលកម្ពុជាមកទូទាត់ទៅវិញទៅមក » ។
យ៉ាងណាក្ដី លោកបណ្ឌិត ម៉ី កល្យាណ ទីប្រឹក្សាឧត្តមក្រុមប្រឹក្សាសេដ្ឋកិច្ច ជាតិ បានថ្លែងថា ប្រវត្តិសាស្ត្រខ្មែរក្រោយសង្គ្រាម កម្ពុជាបានចាយរូបិយប័ណ្ណជាច្រើន ដូចជា មាស ប្រាក់ លុយបាត និងក្រោយមកយើងប្រើប្រាស់ប្រាក់ដុល្លារយ៉ាងទូលំទូលាយ ប៉ុន្តែអ្វីដែលលោកយល់គឺថា សម្រាប់រយៈពេលមធ្យម និងរយៈពេលវែង កម្ពុជាគួរប្រើប្រាស់រូបិយប័ណ្ណជាតិ ។លោកបណ្ឌិតបញ្ជាក់ថា ៖« ក្នុងពេលយើងកំពុងជំរុញការប្រើប្រាស់ប្រាក់រៀលក្នុងសេដ្ឋកិច្ចជាតិ បើយើងប្រើប្រាស់លុយយន់មួយទៀត វានឹងអាចធ្វើឲ្យមានភាពស្មុគស្មាញទៅវិញ »។លោកបន្តថា ៖« សម្រាប់ការយល់ឃើញរបស់ខ្ញុំ គឺយើងគួរបង្កើនការប្រើប្រាស់រូបិយប័ណ្ណជាតិ »។
យោងតាមទេសភិបាលរងធនាគារជាតិនៃកម្ពុជា គិតត្រឹមខែសីហា ឆ្នាំ២០១៧ ទ្រព្យសកម្មរបស់ធនាគារដែលមានជាប្រាក់យន់ចិន មានទំហំប្រមាណជា៦៨លានដុល្លារអាមេរិក ហើយការផ្ទេរប្រាក់យន់ចេញចូលក្នុងប្រទេសកម្ពុជា មានប្រមាណជា៥៥,៧លានដុល្លារអាមេរិក ។ ចំណែក អនុបាតទ្រព្យសកម្មជាប្រាក់យន់ចិន ធៀបនឹងទ្រព្យសកម្មសរុបក្នុងប្រព័ន្ធធនាគារមានប្រមាណ០,២៧%, អនុបាតឥណទានជាប្រាក់យន់ ធៀបនឹងឥណទានសរុបក្នុងប្រព័ន្ធធនាគារមានប្រមាណ០,១៦% និងអនុបាតប្រាក់បញ្ញើជាប្រាក់យន់ ធៀបនឹងប្រាក់បញ្ញើសរុបក្នុងប្រព័ន្ធធនាគារមាន០,០៣% ៕
ចែករំលែកព័តមាននេះ