រាជធានីភ្នំពេញ ៖ ក្រុមហ៊ុនវិនិយោគអាកាសយានដ្ឋានកម្ពុជា បានអះអាងថា នឹងរៀបចំពិធីទទួលអ្នកដំណើរ និងអបអរសាទរ ចំពោះការមកដល់អ្នកដំណើរទី១០លាននាក់ នៅព្រលានយន្តហោះអន្តរជាតិភ្នំពេញនាខែធ្នូខាងមុខនេះ ។ លោក…
រាជធានីភ្នំពេញ ៖ ក្រុមហ៊ុនវិនិយោគអាកាសយានដ្ឋានកម្ពុជា បានអះអាងថា នឹងរៀបចំពិធីទទួលអ្នកដំណើរ និងអបអរសាទរ ចំពោះការមកដល់អ្នកដំណើរទី១០លាននាក់ នៅព្រលានយន្តហោះអន្តរជាតិភ្នំពេញនាខែធ្នូខាងមុខនេះ ។
លោក ពេជ្រ សុប៉ុនតារា ប្រធានផ្នែកបង្កើនការហោះហើរនៃអាកាសយានដ្ឋានដែលគ្រប់គ្រងព្រលានយន្តហោះទាំងបីនៅកម្ពុជា បានឲ្យដឹងកាលពីចុងសប្តាហ៍មុនថា ក្រុមហ៊ុនវិនិយោគអាកាសយានដ្ឋានកម្ពុជា នឹងរៀបចំពិធីទទួលអ្នកដំនើរ១០លាននាក់នៅក្នុងសប្តាហ៍ទី៣នាខែធ្នូខាងមុខនេះ ព្រោះនៅឆ្នាំនេះព្រលានយន្តហោះភ្នំពេញ និងខេត្តសៀមរាប នឹងទទួលបានអ្នកដំណើរសរុប១០លាននាក់ ។
លោកបន្តថា ៖« យើងឃើញមានកំណើនអ្នកដំណើរឆ្លងកាត់ព្រលានយន្តហោះមានការកើនឡើងល្អប្រសើរ និងលើសផែនការដែលយើងរំពឹងទុក »។ លោកបញ្ជាក់ថា ៖« ព្រលានយន្តហោះអន្តរជាតិខេត្តសៀមរាប និងរាជធានីភ្នំពេញមានអាកាសចរណ៍ជាង៣០កំពុងប្រតិបត្តិការហោះឡើងចុះជាប្រចាំ »។ ដោយឡែកព្រលានយន្តហោះអន្តរជាតិកងកេង ខេត្តព្រះសីហនុ នឹងរំពឹងទទួលបានភ្ញៀវទេសចរ និងអ្នកដំណើរឆ្លងកាត់ប្រមាណ៧០ម៉ឺននាក់នៅឆ្នាំនេះ ។
លោក ពេជ្រ សុប៉ុនតារា បានបន្តថា វិស័យអាកាសចរណ៍នៅកម្ពុជាកំពុងមានការរីកចម្រើន ដោយសារការកើនឡើងនូវចំនួនភ្ញៀវទេសចរជាតិ អន្តរជាតិ និងកំណើននៃការមកដល់នូវអ្នកវិនិយោគកាន់តែច្រើន ។
ទាក់ទងនឹងការចរចារវាងអ្នកវិនិយោគ ព្រលានយន្តហោះកម្ពុជា ជាមួយរដ្ឋាភិបាល ដើម្បីសាងសង់ព្រលានយន្តហោះថ្មី លោកសុប៉ុនតារា មានប្រសាសន៍ថា លោកមិនបានដឹងពីករណីនេះទេ តែគម្រោងព្រលានយន្តហោះថ្មីនៅខេត្តសៀមរាប ឬប្រកាសធ្វើនៅស្រុកកណ្តាលស្ទឹង គឺមិនមានសកម្មភាពទេមកទល់ពេលនេះ ។
ប្រធានសមាគមទេសចរណ៍អាស៊ីប៉ាស៊ីហ្វិក លោក ធួន ស៊ីណាន បានមានប្រសាសន៍ថា ការកើនឡើងនៃចំនួនអ្នកដំណើរតាមផ្លូវអាកាសពិតជារឿងប្រសើរ ដោយសារវិស័យអាកាសចរណ៍នៅកម្ពុជាមានការរីកចម្រើន ពិសេសការតភ្ជាប់ជើងហោះហើរពីបណ្តាអាកាសចរណ៍នានាកាន់តែសកម្ម ដោយសារកម្ពុជាមានការរីកចម្រើន និងសុខសន្តិភាព។ លោកបន្តថា ជាមួយនេះក្រុមហ៊ុន SCA ដែលកំពុងវិនិយោគព្រលានយន្តហោះនៅកម្ពុជា ក៏បានចូលរួមចំណែកច្រើនក្នុងការផ្សព្វផ្សាយសក្តានុពល និងផលិតផលទេសចរណ៍កម្ពុជាទៅកាន់ពិភពលោកបានច្រើន ។ លោកបញ្ជាក់ថា ៖« គុណភាពសេវាកម្មអាកាសចរណ៍ និងសេវាកម្មនៅព្រលានយន្តហោះកម្ពុជាកាន់តែមានភាពប្រសើរឡើង ហើយការទទួលបានអ្នកដំណើរឆ្លងកាត់១០លាននាក់ឆ្នាំនេះ ជារឿងគួរឲ្យអបអរសាទរ »។
រយៈពេល៥ឆ្នាំចុងក្រោយនេះ កំណើននៃការធ្វើដំណើរតាមផ្លូវអាកាសមានការកើនឡើងជាបន្ដបន្ទាប់ ។ ក្នុងឆ្នាំ២០១៧ អាកាសយានដ្ឋានទាំង៣របស់កម្ពុជា ទទួលបានអ្នកដំណើរតាមផ្លូវអាកាសចំនួន៨លាននាក់ បើធៀបនឹងឆ្នាំ២០១៦ មានចំនួន៧លាននាក់ ។ ដោយសារតែកំណើនបែបនេះ បានធ្វើឲ្យអាកាសយានដ្ឋានអន្តរជាតិទាំងបីរបស់កម្ពុជា មានការជួសជុលកែលម្អ និងពង្រីកបន្ថែមជាបន្ដបន្ទាប់ ដើម្បីឲ្យឆ្លើយតបទៅនឹងតម្រូវការ ។
បើតាមលោក អេរិក ដេឡូបែល (Éric DELOBEL) នាយកប្រតិបត្តិអាកាសយានដ្ឋានកម្ពុជា បានឲ្យដឹងកន្លងមកថា វាជារឿងដែលគួរមានមោទនភាពទាំងអស់គ្នា ហើយជោគជ័យរបស់អាកាសយានដ្ឋានកម្ពុជា គឺជាជោគជ័យសម្រាប់ប្រទេសកម្ពុជាទាំងមូល ។ លោកបន្ថែមថា ៖« ក្រុមហ៊ុនអាកាសយានដ្ឋានកម្ពុជា នឹងខិតខំធ្វើការងារបន្តទៀតដើម្បីទទួលអ្នកដំណើរដែលនឹងមកដល់នៅពេលខាងមុខ »។ លោកបញ្ជាក់ថា ៖« ការខិតខំប្រឹងប្រែងរបស់ក្រុមហ៊ុនអាកាសយានដ្ឋានកម្ពុជា ក៏ដើម្បីផ្សារភ្ជាប់ជាមួយទស្សនវិស័យ និងការរំពឹងទុករបស់ក្រសួងទេសចរណ៍កម្ពុជា ដោយរំពឹងថា នឹងទទួលបានភ្ញៀវទេសចរអន្តរជាតិ៧លាននាក់នៅក្នុងឆ្នាំ២០២០ ខាងមុខនេះដែរ »៕
ចែករំលែកព័តមាននេះ