រាជធានីភ្នំពេញ ៖ យោងតាមរបាយការណ៍របស់ក្រសួងរៀបចំដែនដីនគរូបនីយកម្ម និងសំណង់ បានឱ្យដឹងថា ក្នុងរយៈពេល៣ខែដើមឆ្នាំ២០១៣នេះការវិនិយោគលើវិស័យសំណង់អគារធុនតូច និងមធ្យមនៅក្នុងប្រទេសកម្ពុជាមានកើនឡើងប្រមាណ៧៥% បើប្រៀបធៀបនឹងរយៈពេលដូចគ្នាក្នុងឆ្នាំ២០១២ ។
រាជធានីភ្នំពេញ ៖ យោងតាមរបាយការណ៍របស់ក្រសួងរៀបចំដែនដីនគរូបនីយកម្ម និងសំណង់ បានឱ្យដឹងថា ក្នុងរយៈពេល៣ខែដើមឆ្នាំ២០១៣នេះការវិនិយោគលើវិស័យសំណង់អគារធុនតូច និងមធ្យមនៅក្នុងប្រទេសកម្ពុជាមានកើនឡើងប្រមាណ៧៥% បើប្រៀបធៀបនឹងរយៈពេលដូចគ្នាក្នុងឆ្នាំ២០១២ ។
របាយការណ៍ដដែលបង្ហាញថា ការវិនិយោគលើវិស័យសំណង់អគារនៅកម្ពុជាមានកំណើនគួរឲ្យកត់សម្គាល់ក្នុងឆ្នាំ២០១២កន្លងទៅក្នុងនោះការវិនិយោគលើសំណង់អគារទូទាំងប្រទេសមានគម្រោងសរុបចំនួន១.៦៩៥ ដែលមានផ្ទៃក្រឡាសាងសង់សរុបចំនួនជាង៦លានម៉ែត្រការ៉េ គិតតម្លៃប៉ាន់ស្មានសរុបប្រមាណជាង២.១០៩លានដុល្លារអាមេរិកគឺមានការកើនឡើងប្រមាណ៧២%បើប្រៀបធៀបនឹងឆ្នាំ២០១១ដែលមានទុនវិនិយោគសរុប១.២២៦លានដុល្លារអាមេរិកប៉ុណ្ណោះ ។ ទោះជាយ៉ាងណាតាមរបាយការណ៍ដដែលនោះបានបញ្ជាក់ថា ការវិនិយោគលើវិស័យសំណង់អគារនេះគឺមានការកើនឡើងតែសំណង់អគារធុនតូច និងមធ្យមប៉ុណ្ណោះ ប៉ុន្តែការវិនិយោគលើវិស័យសំណង់អគារធំៗពុំទាន់មានការកើនឡើងនៅឡើយទេ ។
របាយការណ៍ក៏បានបង្ហាញបណ្តាសំណង់ធំៗ និងបុរីជាច្រើននៅទីក្រុងភ្នំពេញ និងបណ្តាខេត្តមួយចំនួនកំពុងធ្វើការសាងសង់នាពេលបច្ចុប្បន្ននេះដូចជា អគារពាណិជ្ជកម្មរបស់ក្រុមហ៊ុនវឌ្ឍនៈកម្ពស់៣៨ជាន់ អគារស្នាក់នៅរបស់ក្រុមហ៊ុនDECASTLEកម្ពស់៣២ជាន់ អគារសណ្ឋាគារសុខានៅជ្រោយចង្វា ភ្នំពេញ និងនៅបូកគោ ខេត្តកំពត អគារផ្សារទំនើបរបស់ក្រុមហ៊ុនជប៉ុន AEON MALL រោងចក្រផលិតម៉ូទ័រខ្នាតតូច សណ្ឋាគារTOYOKO INN របស់ក្រុមហ៊ុនជប៉ុន រោងចក្រផលិតស្ករសនៅខេត្តក្រចេះរបស់ក្រុមហ៊ុនឥណ្ឌារោងចក្រកាត់ដេរ និងរោងចក្រអគ្គិសនីរបស់ក្រុមហ៊ុនចិន។ល។ ស្របពេលនេះនៅលើទីតាំងកោះពេជ្រក៏បានរៀបចំ និងបន្តសាងសង់សំណង់អគារខ្ពស់ៗនិងសំណង់ទំនើបជាច្រើនប្រភេទដូចជា RIVIERA អគារស្នាក់នៅរួម និងបុរីលំនៅឋានជាដើម ហើយនាពេលកន្លងទៅថ្មីៗនេះគម្រោងសាងសង់ទីក្រុងពាណិជ្ជកម្ម និងលំនៅឋាន BOOYOUNG TOWN1របស់ក្រុមហ៊ុន BOOYOUG GROUP ក៏បានចាប់ផ្តើមបើកការដ្ឋានសាងសង់ដែរ ។
ថ្លែងក្នុងពិធីចុះហត្ថលេខាលើអនុស្សរណៈយោគយល់គ្នារវាងក្រសួងរៀបចំដែនដីនគរូបនីយកម្ម និងសំណង់ ជាមួយសមាគមអ្នកសាងសង់កម្ពុជាកាលពីពេលថ្មីៗនេះ លោកទេសរដ្ឋមន្ត្រី អឹុម ឈុនលឹម រដ្ឋមន្ត្រីក្រសួងរៀបចំដែនដីនគរូបនីយកម្ម និងសំណង់ បានឲ្យដឹងថា ស្ថិតិក្រុមហ៊ុនសាងសង់ និងសិក្សាគម្រោងប្លង់ដែលបានចុះបញ្ជីនៅក្រសួងរៀបចំដែនដីនគរូបនីយកម្ម និងសំណង់ គិតចាប់ពីឆ្នាំ២០០០ដល់ចុងខែមេសា ឆ្នាំ២០១៣ មានចំនួនសរុប១.២៣៧ក្រុមហ៊ុន ក្នុងនោះក្រុមហ៊ុននៅមានសុពលភាពមានចំនួន៥៦១ គឺក្រុមហ៊ុនក្នុងស្រុកមានចំនួនសរុប៤៣៤ និងបរទេសមានចំនួន១២៧ ។ ក្នុងចំនួននេះដែរក្រុមហ៊ុនសិក្សាគម្រោងប្លង់ក្នុងស្រុកមានចំនួន១២ និងក្រុមហ៊ុនសិក្សាគម្រោងប្លង់បរទេសមានចំនួន៥ ៕
ចែករំលែកព័តមាននេះ